ប្រជាពលរដ្ឋមួយចំនួនបានសម្តែងការមិនពេញចិត្ត និងមានការសោកស្តាយទៅនឹងការផ្អាកការប្រារព្ធពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ដែលជាបុណ្យប្រពៃណីជាតិរបស់ខ្មែរ។ ពួកគេលើកទ្បើងថា ការផ្អាកនេះ អាចធ្វើឱ្យប៉ះពាល់ដល់មុខរបរអាជីវកម្ម ជាពិសេសគឺប៉ះពាល់ដល់ទំនៀមទម្លាប់ប្រពៃណីជាតិខ្មែរ។
ជារៀងរាល់ឆ្នាំនៅថ្ងៃប្រារព្ធពិធីបុណ្យអុំទូកប្រជាពលរដ្ឋជាច្រើនពាន់នាក់ បានមកពីបណ្តាខេត្ត ដើម្បីមកជួបជុំគ្នានៅរាជធានីភ្នំពេញក្នុងគោលបំណងចូលរួមពិធីបុណ្យអំទូក ដោយឡែកនៅឆ្នាំនេះប្រជាពលរដ្ឋបានសម្តែងការខកចិត្តដែលរាជរដ្ឋាភិបាលចេញសារាចរផ្អាកការប្រារព្ធពិធីបុណ្យអំទូក។
អាជីវករមួយរូបដែលរស់នៅរាជធានីភ្នំពេញ គឺអ្នកស្រី សំ ពៅ មានអាយុ៥០ឆ្នាំ បាននិយាយថា ការដែលផ្អាកប្រារព្ធពិធីបុណ្យអំទូក បណ្តែត ប្រទីប សំពះព្រះខែនៅឆ្នាំនេះ ធ្វើឱ្យខកចិត្តជាខ្លាំង ពីព្រោះពិធីបុណ្យអំទូកនេះមានសារៈសំខាន់ខ្លាំងណាស់ចំពោះប្រជាពលរដ្ឋខ្មែរ ដែលតែងតែប្រារព្ធពីធីនេះតាំងពីបុរាណកាលមកម្ល៉េះ។
អ្នកស្រីបន្តថាការផ្អាកពិធីបុណ្យអំទូកនេះនឹងធ្វើឱ្យប៉ះពាល់ដល់ការប្រកបមុខរបររបស់អ្នកស្រី ពីព្រោះថា នៅពេលដែលផ្អាកដូច្នេះនឹងមិនសូវមានប្រជាពលរដ្ឋមកលេងនៅក្នុងរាជធានីភ្នំពេញទេ ប្រាកដជាពលរដ្ឋត្រឡប់ទៅលេងនៅស្រុកកំណើតវិញ ព្រោះនៅតាមបណ្តាខេត្តនានា នៅតែបន្តប្រារព្ធធ្វើពិធីបុណ្យអុំទូកនេះ ដដែល។ ជាងនេះទៀត អ្នកស្រីបន្ថែមទៀតថា ការផ្អាកប្រារព្ធពិធីបុណ្យអំទូកនេះ អាចនឹងធ្វើឱ្យប៉ះពាល់ដល់ទំនៀមទម្លាប់ប្រពៃណីខ្មែរផងដែរ។
ដូចគ្នានេះដែរ ប្រជាកសិករមួយរូបដែលមកពីខេត្តស្វាយរៀងគឺ លោក តូច អុល ក៏បានសម្តែងអារម្មណ៍សោកស្តាយផងដែរ ចំពោះការផ្អាកប្រារព្ធពិធីបុណ្យអំទូកនៅឆ្នាំនេះ ដោយលោកថា ពិធីបុណ្យអំទូកនេះមិនគួររំលងចោលនោះទេ ព្រោះវាជាទំនៀមទម្លាប់ប្រពៃណីខ្មែរ ដែលតែងតែប្រារព្ធធ្វើជាយូរមកហើយ។
ផ្ទុយទៅវិញ យុវតី ងួន ស៊ីថា បាននិយាយថា ដែលជានិស្សិតរៀននៅវិទ្យាស្ថានមួយនៅក្នុងរាជធានីភ្នំពេញ បានលើកឡើងថា ការផ្អាកពិធីបុណ្យអុំទូកនៅឆ្នាំនេះ មិនធ្វើឱ្យប៉ះពាល់ដល់ទំនៀមទម្លាប់ប្រពៃណីខ្មែរនោះទេ។
សូមបញ្ជាក់ថាពិធីបុណ្យអំទូក បណ្តែតប្រទីប សំពះព្រះខែ អកអំបុក នៅតាមដងទន្លេសាបមុខព្រះបរមរាជវាំង ដែលគ្រោងប្រព្រឹត្តទៅនៅថ្ងៃ ២៤-២៥ និងទី២៦ ខែវិច្ឆិកា ឆ្នាំ២០១៥ ខាងមុខនេះ ត្រូវបានផ្អាកការរៀបចំវិញដោយយោងទៅលើ សារាចររបស់រាជរដ្ឋាភិបាលកម្ពុជា ដែលចេញកាលពីថ្ងៃ ទី៣១ ខែតុលា។ ការផ្អាកប្រារព្ធព្រះរាជពិធីបុណ្យអុំទូក នៅឆ្នាំនេះ ដោយមូលហេតុផល ទឹកទន្លេមានកម្រិតទាបពេក ហើយចំពោះមុខ ព្រះរាជាណាចក្រកម្ពុជាបាននិងកំពុងជួបប្រទះគ្រោះរាំងស្ងួត។
ទាក់ទងនឹងការផ្អាកការប្រារព្ធពិធីបុណ្យអុំទូកនៅឆ្នាំនេះដែរ លោកនាយករដ្ឋមន្ត្រី ហ៊ុន សែន បានមានប្រសាសន៍នៅក្នុងពិធីសំណេះជាមួយយុទ្ធជនពិការ និងប្រជាពលរដ្ឋ នៅស្រុកឈូក ខេត្តកំពត នៅថ្ងៃទី ១ខែ វិច្ឆិកានេះថា រាជរដ្ឋាភិបាលបានបង្វែរថវិកាសម្រាប់រៀបចំពិធីបុណ្យអុំទូកនៅក្នុងរាជធានីភ្នំពេញ ទៅជាថវិកាសម្រាប់ទិញប្រេងបូមទឹកដាក់ស្រែ ជូនប្រជាពលរដ្ឋដែលខ្វះទឹកធ្វើស្រែ នៅតាមបណ្តាខេត្តវិញ។
ទោះជារដ្ឋាភិបាលបានលុបចោលការប្រារព្ធពិធីបុណ្យអុំទូកនៅរាជធានីភ្នំពេញក៏ដោយ ប៉ុន្តែនៅតាមបណ្តាខេត្តនានា នៅតែបន្តប្រារព្ធពិធីបុណ្យអុំទូក ជាធម្មតាដដែល៕
