ភ្នំពេញ៖ សាលាឧទ្ធរណ៍នឹងបើកសវនាការអតីតសមាជិកព្រឹទ្ធសភាគណបក្សសម រង្ស៊ី លោក ហុង សុខហួរ សុំនៅក្រៅឃុំ នៅថ្ងៃទី០៤ខែវិច្ឆិកា ឆ្នាំ ២០១៥ ខាងមុខនេះ។
លោក ជួង ជូងី មេធាវី ការពារក្តី លោក ហុង សុខហួរបានឱ្យដឹងថា សាលាឧទ្ធរណ៍នឹងបើកសវនាការសុំនៅក្រៅឃុំរបស់កូនក្តីលោកធ្វើឡើងនៅម៉ោង៨ព្រឹក ថ្ងៃទី០៤ ខែវិច្ឆិកា ឆ្នាំ២០១៥ ខាងមុខនេះ។ លោក ជួង ជូងីបន្តថា លោកនឹងខិតខំព្យាយាមការពារកូនក្តីរបស់លោកនៅពេលបើកសវនាការថ្ងៃនោះ និងតម្កល់ប្រាក់១០លានរៀល ក្នុងការសុំនៅក្រៅឃុំផងដែរ។
កាលពីថ្ងៃទី០៧ ខែតុលា ឆ្នាំ២០១៥ កន្លងមក សាលាដំបូងរាជធានីភ្នំពេញ បានសម្រេចពន្យារពេលសវនាការជំនុំជម្រះ ករណីលោក ហុង សុខហួរ ពាក់ព័ន្ធនឹងការចោទប្រកាន់ប្រើឯកសារក្លែងក្លាយ ទៅពេលក្រោយទៀត ដោយមិនកំណត់។
អតីតសមាជិកព្រឹទ្ធសភាគណបក្សសម រង្ស៊ី លោក ហុង សុខហួរ កំពុងតែស្ថិននៅក្នុងពន្ធនាគារព្រៃស ជាបណ្តោះអាសន្ន ក្រោមបទចោទប្រកាន់៣ករណីគឺ បទក្លែងឯកសារសាធារណៈ ប្រើប្រាស់ឯកសារសាធារណៈក្លែងក្លាយ និងញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម៕
