បាត់ដំបង៖ កាលពីពេលថ្មីៗនេះ សមាជិកយុវជនឃុំកកោះសហការជាមួយមន្រ្តីអង្គការទស្សនៈពិភពលោក(World Vision)បានចុះអប់រំពលរដ្ឋក្នុងស្ទឹងចក ឃុំព្រៃតូច ស្រុកមោងឫស្សី ខេត្តបាត់ដំបង ពីបញ្ហា«កង្វះអាហារូបត្ថម្ភចំពោះកុមារ»។

លោក អុត សុភាព​ មន្រ្តីគម្រោងផ្នែកសុខភាពនៃអង្គការទស្សនៈពិភពលោក និងអ្នកស្រី ណុល គឹមឡាង ជាអ្នកសម្របសម្រួលក្នុងភូមិស្ទឹងចក បានពន្យល់ណែនាំដល់ពលរដ្ឋក្នុងសហគមន៍ពីអត្ថប្រយោជន៍នៃអាហារូបត្ថម្ភដែលផ្តល់ទៅកាន់កុមារតូចៗ។

ក្រុមការងារណែនាំទៅកាន់ប្រជាពលរដ្ឋថា នៅពេលកុមារទទួលបានអាហារទទួលទានប្រចាំថ្ងៃដែលសម្បូរអាហារូបត្ថម្ភនោះកុមារនឹងមានសុខភាពរឹងមាំ ប្រាជ្ញាឈ្លាសវៃ រាង្គកាយមានភាពធុននឹងជំងឺនានាជាដើម។  ដោយឡែកកុមារដែលខ្វះអាហាររូបត្ថម្ភ អាចប្រឈមផលប៉ះពាល់ដល់រាង្គកាយដូចជា មិនសូវមានរាងកាយរឹងមាំ រៀនសូត្រមិនសូវចង់ចាំល្អ  បញ្ហាក្រិសក្រិនមិនសូវលូតលាស់ល្អផ្នែករាងកាយ។

ក្រុមការងារខាងលើបានបង្ហាញទៅកាន់ពលរដ្ឋប្រភេទអាហាដែលសម្បូរអាហាររូបត្ថម្ភដែលរួមមាន៖ពពួកបន្លែពណ៌បៃតង ត្រី សាច់ ស៊ុត ឈាម ឬថ្លើម ដំឡូង ល្ពៅ និងផ្លែចេកជាដើម។ល។

អ្នកស្រី ណុល គឹមឡាង ឱ្យដឹងថា សកម្មភាពចុះអប់រំពលរដ្ឋឱ្យយល់ដឹងពីអាហារូបត្ថម្ភនេះ ជាចំណែកមួយជួយដល់សង្គម ពិសេសកុមារក្នុងសហគមន៍ឱ្យទទួលបានសុខភាពល្អគ្រប់ៗគ្នា៕

អត្ថបទខ្លីសរសេរដោយ រឿប ស្រីម៉េត យុវជនខេត្តបាត់ដំបង ជាសិក្ខាកាមក្នុងវគ្គបណ្តុះបណ្តាលអំពីអក្ខរកម្មព័ត៌មាន និងប្រព័ន្ធផ្សព្វផ្សាយ (MIL) រៀបចំដោយមណ្ឌលព័ត៌មានស្រ្តីកម្ពុជា(WMC) ក្រោមជំនួយបច្ចេកទេសពីអង្គការអភិវឌ្ឍន៍ប្រព័ន្ធផ្សព្វផ្សាយអាឡឺម៉ង់(DW)។