(កណ្តាល) ៖ ដោយសារភ្លើងប្រច័ណ្ឌ អន់ចិត្តស្រ្តីជាប្រពន្ធមិននិយាយរកខ្លួន ជនសង្ស័យបានសម្រេចចិត្តរៀបចំគម្រោងយកសាំងចាក់ដុតសម្លាប់ប្រពន្ធខ្លួនទាំងរស់ រួចរត់គេចខ្លួនទៅសំងំនៅខេត្តកំពង់ស្ពឺ។ បច្ចប្បន្នសមត្ថកិច្ចស្រាវជ្រាវចាប់ខ្លួនប្តីចាក់សាំងដុតសម្លាប់ប្រពន្ធនៅខេត្តស្រុកពញាឮ ខេត្តកណ្តាលបានហើយ។
កញ្ញា អ៊ុំ ច័ន្ទលក្ខិណា រាយការណ៍៖
សំណុំរឿងឃាតកម្មគិតទុកជាមុន ប្ដីចាក់សាំងដុតសម្លាប់ប្រពន្ធទាំងរស់ នៅស្រុកពញាឮ ខេត្តកណ្ដាល ត្រូវកម្លាំងនគរបាលតាមចាប់ខ្លួនជនដៃដល់បានហើយ នាថ្ងៃទី១០ ខែមិថុនា ឆ្នាំ២០២០នេះ គ្រាដែលជនសង្ស័យកំពុងសំងំរត់គេចខ្លួននៅក្នុងស្រុកឱរ៉ាល់ ខេត្តកំពង់ស្ពឺ ។
យោងទៅតាមការចេញផ្សាយរបស់អគ្គស្នងការនគរបាលជាតិ នាថ្ងៃពុធ ទី១០ ខែមិថុនា នេះបានឲ្យដឹងថា ប្រតិបត្ដិការនេះធ្វើឡើងដោយកម្លាំងនាយកដ្ឋាននគរបាលព្រហ្មទណ្ឌ ដឹកនាំសហការជាមួយកម្លាំងស្នងការដ្ឋាននគរបាលខេត្តកណ្ដាល និងនគរបាលខេត្តកំពង់ស្ពឺ។ ជនសង្ស័យត្រូវសមត្ថកិច្ចចាប់ខ្លួនបាន នៅភូមិសាស្ត្រចំការអំពៅ ក្រុមហ៊ុនស៊ូហ្គើ ស្ថិតក្នុងភូមិពាមសរ ឃុំរស្មីសាមគ្គី ស្រុកឱរ៉ាល់ ខេត្តកំពង់ស្ពឺ។
សមត្ថកិច្ចបានឲ្យដឹងថា កាលពីថ្ងៃទី០៦ ខែមិថុនា ឆ្នាំ២០២០កន្លងទៅ ជនសង្ស័យឈ្មោះ ងួន ហៅតឿ អាយុ៥១ឆ្នាំ មុខរបរកម្មករសំណង់ បានចាក់សាំងដុតសម្លាប់ប្រពន្ធឈ្មោះ សរ ចាន់ អាយុ៤៧ឆ្នាំ មុខរបរកម្មការិនីរោងចក្រ នៅចំណុចភូមិព្រៃផ្ចឹត ឃុំឈ្វាំង ស្រុកពញាឮ ខេត្តកណ្តាល ។ រឿងហេតុនេះត្រូវបានគេឲ្យដឹងថា កើតចេញពីរោគប្រច័ណ្ឌ មានទំនាស់មិននិយាយរកគ្នាជាមួយជនសង្ស័យដែលជាប្តី។
សូមជម្រាបថា ជនរងគ្រោះ និងជនសង្ស័យដែលបានស្លាប់នោះ បានមានទំនាក់ទំនងស្នេហា និងបានរស់នៅជាមួយគ្នាជាប្តី ប្រពន្ធតាំងពីឆ្នាំ២០១៨ ។ សមត្ថកិច្ចបន្តថា លុះមកដល់អំឡុងខែឧសភា ឆ្នាំ២០២០ ជនសង្ស័យជាប្តីបានផឹកស្រាស្រវឹង ហើយបានមករករឿងជនរងគ្រោះដែលជាប្រពន្ធ ដោយប្រចណ្ឌមកលើជនរងគ្រោះ និងចោទថា ជនរងគ្រោះ លួចមានប្រុសថ្មី ដោយមិននិយាយរកគ្នាជាង០១ខែមកហើយ។ លុះមកដល់ថ្ងៃកើតហេតុ ជនសង្ស័យជាប្តីបានសុំជនរងគ្រោះជាប្រពន្ធត្រូវគ្នាវិញ ប៉ុន្តែជនរងគ្រោះមិនព្រម ។ បន្ទាប់មកជនសង្ស័យ ទៅដេកលើគ្រែក្នុងផ្ទះតែម្នាក់ឯង ចំណែកជនរង គ្រោះបានដេកលើគ្រែខាងមុខជាមួយកូនស្រីឈ្មោះ ចាន់ ស្រីនិច អាយុ១៩ឆ្នាំ ពេលនោះស្រាប់តែជនសង្ស័យ បានធ្វើសកម្មភាពយកសាំងចំនួន០៤ដបទឹកបរិសុទ្ធ ដែលមួយដបមានចំណុះកន្លះលីត្រ សរុបជារួមមកស្មើនឹង០២លីត្រ ដោយជនសង្ស័យបានរៀបគម្រោងទិញទុករួចជាស្រេច នៅពេលដែលជនរងគ្រោះសម្រាកលង់លក់ ជនសង្ស័យក៏បានធ្វើសកម្មភាពយកសាំងចាក់ស្រោចលើជនរងគ្រោះជាប្រពន្ធ រួចដាក់ភ្លើងដុតទាំងរស់តែម្តង។ ដុតរួចហើយជនសង្ស័យជាប្តីបានលូនចេញតាមប្រឡោះក្តារជញ្ជាំងផ្ទះ គេចខ្លួនបាត់ទៅ។
ភ្លាមនោះកូនស្រីរបស់ជនរងគ្រោះភ្ញាក់ដឹងខ្លួន ឃើញភ្លើងឆេះម្តាយ ក៏ស្រែកឆោឡោឲ្យគេជួយពន្លត់ និងបានដឹកយកម្តាយទៅសង្គ្រោះនៅមន្ទីរពេទ្យកាល់ម៉ែតរាជធានីភ្នំពេញ រហូតដល់ម៉ោង១១ថ្ងៃខែឆ្នាំដដែល ជនរងគ្រោះបានស្លាប់នៅក្នុងមន្ទីរពេទ្យ ក៏ត្រូវបានរថយន្តរបស់មន្ទីរពេទ្យដឹកសពជនរងគ្រោះត្រឡប់មកផ្ទះវិញប្រគល់ជូនក្រុមគ្រួសារ។
បច្ចុប្បន្នបុរសជាប្តីត្រូវបានសមត្ថកិច្ចឃាត់ខ្លួន នាថ្ងៃទី១០ ខែមិថុនា ឆ្នាំ២០២០នេះ គ្រាដែលជនសង្ស័យកំពុងសំងំរត់គេចខ្លួននៅក្នុងស្រុកឱរ៉ាល់ ខេត្តកំពង់ស្ពឺ ។ សំណុំរឿងជនសង្ស័យត្រូវបានចោទពីបទឃាតកម្មគិតទុកជាមុន ក្រោមមាត្រា ២០០ នៃក្រមព្រហ្មទណ្ឌ ដែលមានន័យសេចក្តីថា ឃាតកម្មគិតទុកជាមុន គឺជាអំពើសម្លាប់មនុស្សដោយគិតទុកជាមុន ឬដោយការពួនស្ទាក់។ ការគិតទុកជាមុន គឺជាគម្រោងដែលង្កើតឡើងមុនអំពើបៀតបៀន ទៅលើរូបបុគ្គលនៃជនរងគ្រោះ។ ការពួនស្ទាក់ គឺជាអំពើឃ្លាំចាំបុគ្គលណាម្នាក់ ក្នុងរយៈពេលណាមួយរយៈដើម្បីប្រព្រឹត្តអំពើបៀតបៀនលើរូបបុគ្គលនៃជនរងគ្រោះ។ ឃាតកម្មគិតទុកជាមុនត្រូវផ្តន្ទាទោសដោក់ពន្ធធនាគារអស់មួយជីវិត។
នេះអាចមេរៀនមួយសម្រាប់សង្គមរស់នៅបច្ចប្បន្ន កំហឹងមួយពេលខាតប្រយោជន៍មួយជីវិត កំហឹងមិនគិតបាត់មនុស្សជាទីស្រឡាញ់។ បើមិនអាចរស់នៅជាមួយគ្នាបានទេ គួរតែបញ្ឈប់ចែកផ្លូវរាងខ្លួន កសាងអនាគតសារជាថ្មី មុននឹងកើតរឿងសោកដកម្មណាមួយ៕
អត្ថបទដោយ អ៊ុំ ច័ន្ទលក្ខិណា
