ភ្នំពេញ៖ លោក សម រង្ស៊ី ប្រកាសបន្តសកម្មភាពនយោបាយខណៈលោក កឹមសុខា មិនទាន់មានសេរីភព ។ កាលពីការជ្រើសតាំងលោកជាប្រធានស្ដីទី លោកថាលោកនឹងលាលែងពីឋានៈនេះ នៅពេលដែលលោកកឹម សុខា វិលមកធ្វើជាប្រធានគណបក្សសង្គ្រោះជាតិឡើងវិញ ។ រហូតតាំងពីលោក សម រង្ស៊ី ធ្វើជាប្រធានស្ដីទី លោក កឹម សុខា មិនដែលថ្លែងអ្វីពាក់ព័ន្ធនឹងករណីនេះនោះទេ ។
រាយការណ៍ដោយ លោក សោម លាភ
ប្រធានស្ដីទីអតីតគណបក្សសង្គ្រោះជាតិ គឺលោក សម រង្ស៊ី បានថ្លែងសារទៅកាន់ប្រជាពលរដ្ឋកម្ពុជា ដែលគាំទ្រអតីតគណបក្សប្រឆាំងនេះទូទាំងពិភពលោក ដោយបង្ហាញនូវការកោតសសើរយ៉ាងជ្រាលជ្រៅចំពោះទឹកចិត្ត និងការលះបង់របស់ពួកគាត់ចំពោះការស្នេហាជាតិ ។
លោកថាការណ៍នេះ ជាការធ្វើឱ្យអតីតគណបក្សសង្គ្រោះជាតិ នៅតែរឹងមាំតាមរចនាសម្ព័ន្ធ និងសាខា ។
លោកសម រង្ស៊ី ក៏បានអំពាវនាវដល់អ្នកគាំទ្រទាំងអស់រក្សាគោលជំហររឹងមាំ និងប្ដេជ្ញាចិត្តខ្ពស់បំផុត ដើម្បីជម្រុញឱ្យមានការផ្លាស់ប្ដូរជាវិជ្ជមានតាមបែបប្រជាធិបតេយ្យនៅកម្ពុជា ។
លោកថាអ្នកគាំទ្រអតីតគណបក្សសង្គ្រោះជាតិទាំងអស់ ត្រូវពង្រឹងឯកភាពផ្ទៃក្នុង ប្រកាន់ស្មារតីបង្រួបបង្រួមកម្លាំងស្នេហាជាតិ ព្រោះលោកថាមានតែគណបក្សនេះតែមួយទេដែលជាក្ដីសង្ឃឹមរបស់ពលរដ្ឋ ។
លោកបញ្ជាក់បន្ថែមទៀតថា ក្នុងនាមលោកជាប្រធានស្ដីទីអតីតគណបក្សសង្គ្រោះជាតិ ខណៈពេលលោក កឹម សុខា មិនទាន់មានសេរីភាព លោកនូវតែបន្តសកម្មភាពនយោបាយដូចតទៅ៖
នៅតែរក្សាការទំនាក់ទំនងជាមួយប្រជាពលរដ្ឋខ្មែរគ្រប់រូប គ្រប់តំបន់ គ្រប់ក្រុម និងគ្រប់ប្រទេសដែលលោកហៅថាជាអ្នកសេ្នហាជាតិ ជាអ្នកប្រជាធិបតេយ្យ ដែលប្រកាសគាំទ្រអតីតគណបក្សសង្គ្រោះជាតិដោយគាំទ្រពាក្យស្លោក សម រង្ស៊ី និងកឹម សុខាជាមនុស្សតែមួយ ។
លោកបន្ថែមថាបើសិនជាអាច លោកនឹងចូលរួមក្នុងកិច្ចប្រជុំសាធារណៈ ឬជាឯកជន ក្នុងទ្រង់ទ្រាយធំឬតូច ដែលរៀបចំដោយពលរដ្ឋខ្មែរ គាំទ្រគណបក្សសង្គ្រោះជាតិ ។
ជាងនេះ លោកក៏អំពាវនាវឱ្យអ្នកគាំទ្រអតីតគណបក្សសង្គ្រោះជាតិ ខិតខំធ្វើសកម្មភាពរួមគ្នា ពង្រឹងឯកភាព ដើម្បីឱ្យគណបក្សនេះឈានទៅដឹកនាំប្រទេសនាពេលខ្លីខាងមុខ ។
បើតាមសេចក្ដីថ្លែងការណ៍គណបក្សសង្គ្រោះជាតិក្រៅប្រទេសដែលចុះហត្ថលេខាដោយលោក ស៊ុយ សេងហុង ប្រធានអង្គសន្និសីទដែលធ្វើឡើងក្នុងទីក្រុងអាត្លង់តាកាលពីថ្ងៃទី ១ និងទី ២ ខែធ្នូ ឆ្នាំ ២០១៨ ដែលមានខ្លឹមសារថា លោក សម រង្ស៊ី ដែលជាសហស្ថាបនិកអតីតគណបក្សសង្គ្រោះជាតិជាមួយលោក កឹម សុខា ឱ្យធ្វើជាប្រធានស្ដីទីនៃអតីតគណនេះ ក្នុងរយៈពេលអន្តរកាលដែលលោក កឹម សុខា កំពុងស្ថិតក្នុងការត្រួតពិនិត្យរបស់តុលាការមិនអាចដឹកនាំគណបក្សបាន ។
បន្ទាប់ពីមានការជ្រើសតាំងលោក សម រង្ស៊ី ជាប្រធានស្ដីទី លោកអះអាងថាលោកធ្វើសកម្មភាពក្នុងអន្តរកាលដែលលោក កឹម សុខាមិនទាន់មានសេរីភាពធ្វើសកម្មភាពតំណាងឱ្យអតីតគណបក្សប្រឆាំងធំជាងគេនេះ ។ លោកប្ដេជ្ញាថា ធ្វើអ្វីៗដើម្បីគណបក្សសង្គ្រោះជាតិ ហើយនៅពេលលោក កឹម សុខា មានសម្បទានធ្វើជាប្រធានវិញ លោកនឹងលះបង់ដំណែងជាប្រធានស្ដីទីនេះវិញ ។
គួររំលឹកថា ការតែងតាំងនេះ ធ្វើឡើងដោយគណៈកម្មការនៃអតីតគណបក្សនេះ នៅសហរដ្ឋអាមេរិក ក្រោមសន្និសីទ្ធពិភពលោករយៈពេល ២ ថ្ងៃ ។ ដោយឡែក ចំពោះអ្នកដែលមានទំនោរទៅរកលោក កឹម សុខា បង្ហាញការជំទាស់ និងមិនទទួលស្គាល់ចំពោះការតែងតាំងនេះទេ ។ ពួកគេចេញសេចក្ដីថ្លែងការណ៍ថា ចំពោះការសម្រេចរបស់សន្និសីទនេះមិនអាចចាប់បង្ខំ ឬតម្រូវឲ្យគណបក្សសង្គ្រោះជាតិ ឬគណៈកម្មាធិការអចិន្រៃ្តយ៍គណបក្សត្រូវតែធ្វើតាមនោះទេ ព្រោះអ្នកចូលរួមធ្វើសេចក្ដីសម្រេចនេះមិនមាននីតិសម្បទាដែលមានសិទ្ធិជា អ្នកស្នើ ឬអ្នកសម្រេចជ្រើសរើស ឬជ្រើសតាំងប្រធានស្ដីទីគណបក្សឡើយ។ ដូច្នេះសេចក្ដីសម្រេចនេះគ្រាន់តែជាមតិយោបល់របស់មនុស្ស ១ ក្រុមតែប៉ុណ្ណោះ។
យ៉ាងណា លោក កឹម សុខា ដែលជាប្រធាននៃអតីតគណបក្សសង្គ្រោះជាតិ ត្រូវទទួលការចោទប្រកាន់ពីបទសន្ទិដ្ឋិភាពជាមួយបរទេសមុនពេលដែលគណបក្សសង្គ្រោះជាតិត្រូវបានរំលាយ ដែលលោកទទួលរងនូវការដាក់ពន្ធនាគារ និងស្ថិតនៅក្នុងផ្ទះក្រោមការត្រួតពិនិត្យតាមផ្លូវតុលាការគ្មានសេរីភាពប្រមាណ ២ ឆ្នាំ ។ លោក កឹម សុខា មិនមានសិទ្ធិធ្វើនយោបាយ ជួបអ្នកមុខអ្នកការ និងដើរហើរជិត ២ ឆ្នាំ ទើបចៅក្រមស៊ើបសួរបើកឱ្យលោកអាចធ្វើដំណើរ និងជួបអ្នកនយោបាយជាតិ និងអន្តរជាតិ ក្នុងរយៈពេលខ្លី ហើយសំណុំរឿងរបស់លោក ត្រូវបានបញ្ជូនទៅជំនុំជម្រះ ។
នៅពេលដែលសំណុំរឿងលោក កឹម សុខា ត្រូវបានជំនុំជម្រះ លោកបានថ្លែងទៅកាន់អ្នកសារព័ត៌មាននូវសារនយោបាយមួយចំនួន តែមិននិយាយពាក់ព័ន្ធទៅនឹងការណ៍ដែលលោក សមរង្ស៊ីធ្វើជាប្រធានស្ដីទីអតីតគណបក្សសង្គ្រោះជាតិនោះទេ ។ លោកគ្រាន់តែបង្ហើបថា លោកមិនមែនជាអ្នកនយោបាយជើងមិនដល់ដីក្បាលមិនដល់មេឃនោះទេ ។
បើទោះបីជាយ៉ាងណាក៏ដោយ លោក សម រង្ស៊ី ធ្លាប់ និងតែងតែអះអាងថា សម្ដីលោក កឹម សុខា ដែលនឹងធ្វើឱ្យលោកជឿបាន លុះត្រាតែលោក កឹម សុខា និយាយនៅពេលលោក មានសេរីភាពពេញលេញ ឬចេញទៅក្រៅប្រទេសទៅជួបលោក ក្នុងរយៈពេលណាមួយសិន ។
អ្នកវិភាគតែងតែព្រមានបរាជ័យដែលបានមកពីការបែកបាក់ផ្ទៃក្នុងរបស់អតីតគណបក្សសង្គ្រោះជាតិនេះ ពោលគឺមិនអាចយកឈ្នះបក្សកាន់អំណាច ។
សូមបញ្ជាក់ថាសំណុំរឿង លោក កឹម សុខា ត្រូវបានជំនុំជម្រះ និងបន្តជំនុំជម្រះនៅសាលាដំបូងរាជធានីភ្នំពេញ រយៈពេល ៣ ខែ ដោយក្នុងមួយសប្ដាហ៍គឺជំនុំជម្រះ ២ ថ្ងៃគឺនៅថ្ងៃពុធ និងថ្ងៃព្រហស្សត្តិ៍នៃសប្ដាហ៍នីមួយៗ ។ លោក កឹម សុខា ខ្លួនឯងផ្ទាល់ បដិសេធចំពោះការចោទប្រកាន់នេះ ហើយលោក សង្ឃឹមថាលោកនឹងទទួលបានយុត្តិធម៌ ៕
