ភ្នំពេញ៖ មតិចម្រុះមួយចំនួន បានផ្ទុះឡើងជាថ្មីម្ដងទៀតតាមរយៈបណ្ដាញសង្គមហ្វេសបុក ពាក់ព័ន្ធរឿនរដ្ឋមន្ត្រីក្រសួងអប់រំកម្ពុជា មិនអនុញ្ញាតឱ្យមានការជជែករឿងនយោបាយនៅក្នុងសាលា ព្រោះជាការខុសច្បាប់ ។
រាយការណ៍ដោយលោក សោម លាភ
ជាថ្មីម្ដងទៀត រដ្ឋមន្ត្រីក្រសួងអប់រំ គឺលោក ហង់ ជួនណារ៉ុន អះអាងថា សិស្សានុសិស្ស មិនអាចជជែករឿងនយោបាយបានទេ ។
បើតាមការចុះផ្សាយនៅលើទំព័រហ្វេសបុករបស់លោក ពេជ្រ ស្រស់ ប្រធានគណបក្សយុវជនកម្ពុជា និងជាសមាជិកនៃឧត្តមក្រុមប្រឹក្សាពិគ្រោះ និងផ្ដល់យោបល់ កាលពីថ្ងៃទី ២៣ ធ្នូ បញ្ជាក់ថា រដ្ឋមន្ត្រីក្រសួងអប់រំ អះអាងថា សិស្សមិនអាចជជែកគ្នាបានទេអំពីរឿងនយោបាយនៅក្នុងសាលារៀន ។ លោកក៏បានបញ្ជាក់ពីមូលហេតុផងដែរ ពោលគឺលោករដ្ឋមន្ត្រីអះអាងថា ដោយសារតែច្បាប់បានហាមប្រាម មិនឱ្យជជែក នៅសាលារៀន ដោយហេតុថា សាលារៀន គឺជាកន្លែងអព្យាក្រឹត ។ យ៉ាងណា លោករដ្ឋមន្ត្រីអះអាងថា បើចង់ឲ្យសិស្សជជែកគ្នាអំពីរឿងបាយបាននៅក្នុងសាលារៀននោះ គឺត្រូវវិសោធនកម្មច្បាប់ដែលហាមឃាត់នោះចោលជាមុនសិន ។
ជាងនេះទៅទៀត រដ្ឋមន្ត្រីក្រសួងអប់រំរូបនេះបញ្ជាក់ថា ការតម្លើងនូវប្រាក់ខែជូនគ្រូបង្រៀន គឺ មិនអាចធ្វើបាននោះទេដោយសាររដ្ឋាភិបាលគ្មានលុយ ។
គួររំលឹកថា រដ្ឋមន្ត្រីក្រសួងអប់រំ លោក ហង់ ជួនណារ៉ុន កាលពីថ្ងៃទី ១១ ខែសីហា ឆ្នាំ២០១៥ ក៏បានចេញសេចក្ដីណែនាំមួយដោយបញ្ជាក់ថា សមាគម អង្គការ បុគ្គលិកអប់រំ និងគ្រូបង្រៀនជាប់កិច្ចសន្យាមួយចំនួន បានធ្វើសកម្មភាពមិនប្រក្រតី ដោយបានធ្វើការផ្សព្វផ្សាយបោះឆ្នោតជ្រើសរើសថ្នាក់ដឹកនាំរបស់ខ្លួន និងអូសទាញបុគ្គលិកអប់រំដទៃទៀតឲ្យចូលរួមជាមួយ ។ ក្រសួងអប់រំតាមរយៈលោកហង់ ជួនណារ៉ុន គឺចាត់ទុកទង្វើនេះថា ជាការជ្រៀតជ្រែកការងារផ្នែកអប់រំ និងប៉ះពាល់ដល់សណ្ដាប់ធ្នាប់ក្នុងសាលា ដែលផ្ទុយនឹងគោលការណ៍អព្យាក្រឹតភាពរបស់គ្រឹះស្ថានសិក្សា ។
រដ្ឋមន្ត្រីរូបនេះបញ្ជាក់ថា ក្រសួងអប់រំមិនអនុញ្ញាតឲ្យសមាគម អង្គការ ឬភ្នាក់ងារណាមួយ ធ្វើសកម្មភាពនៅក្នុងគ្រឹះស្ថានសិក្សាដោយគ្មានការអនុញ្ញាត ហើយជាពិសេស គឺមិនអនុញ្ញាតឲ្យធ្វើសកម្មភាពនយោបាយ ឬការឃោសនាឲ្យគណបក្សនយោបាយណាមួយនៅក្នុងសាលារដ្ឋ ឬស្ថាប័នអប់រំ ។ ក្នុងសេចក្ដីណែនាំនោះ ក៏បានលើកឡើងពីទោសទណ្ឌ ចំពោះករណីដែលមានការប្រព្រឹត្តផ្ទុយពីសេចក្តីណែនាំនោះ ពោលគឺអង្គការ សមាគម ឬបុគ្គលិកអប់រំ នឹងត្រូវទទួលទណ្ឌកម្មតាមមាត្រា៥២ នៃច្បាប់ស្ដីពីការអប់រំ ដែលចែងពីការពិន័យអន្តរការណ៍ជាប្រាក់ពី ១លានរៀលដល់២០លានរៀល ។ សម្រាប់ស្ថាប័នអប់រំវិញ បើមិនរាងចាល នឹងមានការពិន័យជាប្រាក់ទ្វេដង និងឈានដល់ការដកហូតជាស្ថាពរនូវអាជ្ញាប័ណ្ណអប់រំរបស់ស្ថាប័ននោះទៀតផង ។
លោកបណ្ឌិត មាស នី អ្នកវិភាគនយោបាយ និងជាអ្នកតាមដានការវិវត្តសង្គម បញ្ជាក់តាមរយៈទំព័រហ្វេសបុករបស់ខ្លួននៅថ្ងៃទី ២៤ ធ្នូថា «ការនិយាយគ្នាពីបញ្ហាសង្គមនិងនយោបាយស្រុកទេសវាជាសេរីភាពរបស់យុវជននៅក្នុងវ័យសិក្សា ហើយត្រូវបានគាំទ្រដោយរដ្ឋធម្មនុញ្ញ ។ តែបើនាំគ្នាធ្វើនយោបាយនៅក្នងសាលាវាជារឿងមួយផ្សេងដែលក្រសួងត្រូវតែវែកញែកអោយបានច្បាស់រវាងឃ្លាទាំងពីរនះ។
លោកបណ្ឌិតមាស នី ចោទសួរថា តើក្រសួងត្រូវធ្វើដូចម្ដេចដើម្បីអោយទំពាំងស្នងឬស្សី បានល្អ ។
អ្នកវិភាគនយោបាយរូបនេះ បញ្ជាក់ថា ប្រទេសកម្ពុជា នឹងត្រូវបន្តរគ្រប់គ្រងដោយគ្រួសារនិយម ឫបក្សពួកនិយម ដូចដែលបានកើតឡើងចាប់តាំងពីសម័យទសវត្សន៍ឆ្នាំ១៩៦០ឫមុននេះទៅទៀតរហូតមកដល់សព្វថ្ងៃ ។
ជុំវិញករណីនេះ ក៏មានការបញ្ចេញមតិក្នុងប្រអប់ខុមិនរបស់សាររបស់លោកបណ្ឌិតមាសនី ដោយបញ្ជាក់នូវការហួសចិត្តចំពោះបម្រាមនេះ ។
លោក Lak Leang ថាហាមនិយាយនយោបាយនៅក្នុងសាលារៀន តែពេល
ប្រឡងថ្នាក់ទី ១២ ឬបាក់ឌុប ឬប្រឡងសញ្ញាបត្រមធ្យមសិក្សាទុតិយភូមិ ចេញសុទ្ឋតែ
នយោបាយ ។ លោកបន្ថែមថា មិនដឹងជាសង្គមមួយនេះ ហៅថាសង្គមអ្វី ។
ដោយឡែក លោក Hea Um សរសេរថា កាលលោករៀននៅវិទ្យាល័យ នាយកសាលាតែងអោយបរិវេណសាលាទៅសកម្មជនបក្សប្រជាជនកម្ពុជាឃោសនា និងបញ្ចុះបញ្ចូលសិស្សអោយទៅប្រាប់ឪពុកម្តាយ ឬបងប្អូនដែលមានឈ្មោះបោះឆ្នោតទៅបោះឆ្នោតអោយគណបក្សប្រជាជនកម្ពុជា ។
លោកបន្ថែមថា មានគ្រូៗមួយចំនួនក៏បានយកម៉ោងសិក្សាឆ្លៀតឃោសនាអោយគណបក្សប្រជាជនកម្ពុជាដែរ ដោយឡែកចំពោះគ្រូផ្សេងដែលគាត់មាននិន្នាការទៅបក្សផ្សេង គាត់មិនហ៊ាននិយាយទេព្រោះខ្លាចត្រូវនាយកសាលាព្រមាន ។
លោកសរសេរក្នុងន័យដើមបន្ថែមទៀតថា គ្រូបង្រៀនម៉ោងប្រវត្តិវិទ្យាមិនហ៊ានបង្រៀនលំអិត និងស៊ីជំរៅលើមេរៀនប្រវត្តិសាស្ត្រខ្មែរទេ ព្រោះគាត់ខ្លាចចូលនយោបាយនិងទទួលការស្តីបន្ទោស ។
ជាងនេះទៅទៀត ក៏បានលើកឡើងដោយដាក់រូបពីរទន្ទឹមគ្នា រវាងលោក ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡាកម្ពុជា ដែលមិនឱ្យសិស្ស និងគ្រូ និយាយរឿងនយោបាយ និងរដ្ឋមន្ត្រីវ័យក្មេងនៃក្រសួងអប់រំយុវជននិងកីឡានៃប្រទេសម៉ាឡេស៊ី គឺលោក Syed Saddih Syed Abdul Rahman ដែលជម្រុញឱ្យយុវជនទាំងអស់ គួរតែចេះឈឺឆ្អាលពីបញ្ហាជាតិ ទើបប្រទេសរីកចម្រើន ។
សម្រាប់អ្នកប្រើប្រាស់បណ្ដាញសង្គមហ្វេសបុកម្នាក់ទៀតឈ្មោះថា Phi Kho Em Chhut ដែលដាក់តាំងរូប ព្រះករុណា ព្រះបាទសម្ដេច ព្រះបរមនាថ នរោត្ដម-សីហមុនី ព្រះមហាក្សត្រនៃព្រះរាជាណាចក្រកម្ពុជា ជារូបប្រូហ្វាល់នោះ ក៏បានបង្ហោះវីដេអូមួយ ស្ដីអំពីសកម្មភាពរបស់មន្ត្រីគណបក្សប្រជាជនកម្ពុជា ដែលចុះទៅចែកជូនសម្លៀកបំពាក់ដល់សិស្សសាលាតូចៗ ហើយណែនាំឱ្យពួកគេទៅប្រាប់ឪពុកម្ដាយឱ្យបោះឆ្នោតឱ្យគណបក្សប្រជាជនកម្ពុជា ដែលមានលេខរៀងទី២០ ។
លោក ពេជ្រស្រស់ ស្នើតាមរយៈហ្វេសបុក ដោយឱ្យលោក ហង់ ជួនណារ៉ុន បកស្រាយចំពោះសកម្មភាពរបស់គណបក្សប្រជាជនកម្ពុជា មុនអាណត្តិទី ៦នេះ ។
យ៉ាងណាមិញ ក៏មានការចែកចាយបន្តគា្ននូវទ្រីស្ដីរបស់លោក ប្លាតុង ទស្សនៈវិទូក្រិច ដែលមានអត្តន័យថា លើលោកនេះមានតែសត្វប៉ុណ្ណោះ ដែលមិនត្រូវខ្វល់ពីរឿងនយោបាយ ៕
