ក្រុមកម្មករ និងអាជីវករដែលរស់នៅទល់ដែនប៉ោយប៉ែតជិត២០០នាក់ បានស្រែកតវ៉ាសុំឱ្យមន្ត្រីនគរបាល អន្ដោប្រវេសន៍ប្រចាំច្រកទ្វារអន្ដរជាតិប៉ោយប៉ែតបញ្ឃប់ការកៀបសង្កត់យកលុយពីកម្មករ និងបន្ធូរបន្ថយលើការបង់ពន្ធនានា នៅព្រឹកថ្ងៃទី២៥ ខែឧសភានេះ។
លោកសៀង ប្រុស ពលរដ្ឋរងគ្រោះដោយសារការជំរិតយកប្រាក់ពីមន្រ្ដីនគរបាល ប្រចាំច្រកទ្វារអន្ដរជាតិប៉ោយប៉ែត បានប្រាប់ឲ្យដឹងថា « ក្រុមកម្មករធ្វើការតវ៉ានៅព្រឹកថ្ងៃច័ន្ទនេះក្នុងគោលបំណងសុំឱ្យមន្រ្ដីនគរបាលនៅប្រចាំតំបន់នេះបញ្ឃប់រឿងរឹតបន្ថឹង យកប្រាក់ពីអ្នករកស៊ីនៅច្រកទ្វារប៉ោយប៉ែតនេះ»។ លោក សៀង ប្រុស បន្ដថា កម្មករអូសរទេះម្នាក់នៅពេលចេញចូលច្រកទ្វារអន្ដរជាតិប៉ោយប៉ែតតាមព្រំដែនប្រទេសថៃ ត្រូវបង់ពន្ធទៅអោយមន្រ្ដី ប្រចាំតំបន់ក្នុងម្នាក់ ១ពាន់រៀល រហូតដល់៦ម៉ឺនរៀល ឬ៦០ម៉ឺន ទៅជិត២លានរៀល។
កម្មករអូសរទេះមួយរូបទៀត លោក វិចិត្រ បានអោយដឹងផងដែរថា មូលហេតុដែលកម្មករ និងអាជីវករ ចូលរួមតវ៉ានៅថ្ងៃនេះពីព្រោះតែកន្លងមកមន្រ្ដីនគរបាលនៅប្រចាំច្រកទ្វារអន្ដរជាតិប៉ោយប៉ែត បានជំរិតយកប្រាក់ពីកម្មករលើសការកំនត់ ដែលធ្វើឲ្យពួកគេគ្មានសមត្ថភាពរកប្រាក់សម្រាប់បង់ឡើយ។ លោក វិចិត្រ ស្នើរអោយរាជរដ្ឋាភិបាល ក៏ដូចជាអង្គភាពប្រឆាំង អំពើពុករលួយ ចុះទៅស៊ើបអង្កេត និងចាត់វិធានការដោះស្រាយលើករណីនេះជាបន្ទាន់។
ជុំវិញបញ្ហានេះដែរ វិទ្យុស្រ្ដីមិនអាចទាក់ទងលោក ស៊ឹម សំអាត នាយប៉ុស្ដិ៍នគរបាលអន្ដោប្រវេសន៍ ច្រកទ្វារអន្ដរជាតិប៉ោយប៉ែត បាននោះទេនៅថ្ងៃនេះ។
ចំនែកឯមន្រ្ដីសម្របសម្រួលអង្គការអាដហុក ប្រចាំខេត្តបាត់ដំបង លោក ស៊ុម ចាន់គា ថ្លែងថាបញ្ហានេះ កើតឡើងជាច្រើនលើក ច្រើនសារមកហើយ តែរាជរដ្ឋាភិបាល មិនទាន់មានចំណាត់ការណាមួយទៅលើបញ្ហានេះនៅឡើយទេ។
បន្ទាប់ពីក្រុមកម្មករ ធ្វើការតវ៉ាបិទផ្លូវដោយមិនព្រមចូលតុចរចា ក្រុមអាជ្ញាធរ និងកងកម្លាំង សមត្ថកិច្ច ជាច្រើននាក់ បានធ្វើការបំបែកពួកគេ និងបានយក រទេះរុញដែលពួកគេដាក់ កណ្ដាលផ្លូវចេញ ដើម្បីឈានទៅដល់ការបើកចរាចរណ៍ឡើងវិញ។
គួរបញ្ជាក់ផងដែរថា ការប៉ះទង្គិចគ្នាមួយប្រាវ រវាងភាគីទាំងពីរ បានបណ្ដាលឱ្យបុរសកម្មករម្នាក់សន្លប់ និងបានបញ្ជូនទៅកាន់មន្ទីរពេទ្យភា្លមៗផង។ រីឯមន្ត្រីសន្តិសុខទីស្នាក់ការគយម្នាក់ក៏បានរងរបួសផងដែរ ព្រមទាំងមានរថយន្តមន្ត្រីគយ៣គ្រឿងរងការខូចខាត៕
