ភ្នំពេញ៖ មន្ត្រីជាន់ខ្ពស់អតីតគណបក្សសង្គ្រោះជាតិ ថ្លែងថានឹងបន្តតស៊ូធ្វើនយោបាយស្វែងរកដំណោះស្រាយកាទូត ដោយបង្ហាញក្ដីសង្ឃឹមថាប្រទេសថៃនឹងបើកឱ្យបក្សពួកខ្លួនចូលមកកម្ពុជាតាមរយៈប្រទេសនេះ ។ យ៉ាងណា នាយករដ្ឋមន្ត្រីកម្ពុជា ថាអាជ្ញាធរកម្ពុជា និងថៃ សហការណ៍គ្នាខ្ពស់ជុំវិញការអនុវត្តច្បាប់ចាប់ក្រុមលោក សម រង្ស៊ី ។
រាយការណ៍ដោយលោក សោម លាភ
លោក អេង ឆៃអ៊ាង អនុប្រធានអតីតគណបក្សសង្គ្រោះជាតិ មានប្រសាន៍ប្រាប់វិទ្យុអាស៊ីសេរីថា អាជ្ញាធរថៃហាមថ្នាក់ដឹកនាំគណបក្សសង្គ្រោះជាតិ អ្នកស្រី មូ សុខហួរ មិនឱ្យចូលទឹកដីថៃ គ្រាន់តែជាការហាមបណ្ដោះអាសន្នតែប៉ុណ្ណោះ ។
លោក អេង ឆៃអៀង ថានយោបាយការបរទេសថៃអាចនឹងប្រែប្រួលនៅពេលក្រោយ ដែលលោកថាប្រហាក់ប្រហែលកាលពីពលរដ្ឋខ្មែរជម្លៀសខ្លួនទៅប្រទេសថៃកាលពីសម័យកងទ័ពវៀតណាមចូលមកកម្ពុជា ។
លោកអេង ឆៃអៀង ជឿជាក់ថាថៃនឹងអនុញ្ញាតឲ្យមន្ត្រីគណបក្សសង្គ្រោះជាតិចូលទឹកដីថៃវិញ នៅមុនថ្ងៃទី៩ វិច្ឆិកា ។
គួររំលឹកថា កាលពីថ្ងៃទី២១ ខែតុលា អាជ្ញាធរថៃ មិនអនុញ្ញាតឲ្យលោកស្រី មួ សុខហួរ អនុប្រធានគណបក្សសង្គ្រោះជាតិ ចូលប្រទេសថៃ ។
យ៉ាងណាលោកស្រីមូ សុខហួរ មានប្រសាសន៍ក្នុងបទសម្ភាសន៍ជាមួយវិទ្យុបារាំងអន្តរជាតិកាលពីថ្ងៃទី ២៤ តុលាថា លោកស្រីនឹងវិលចូលប្រទេសអាស៊ានវិញ ។
លោកស្រីថា ការណ៍នេះមិនមែនបានន័យថាជាបរាជ័យនៃផែនការមាតុភូមិនិវត្តន៍នោះទេ ។
លោកស្រីមូ សុខហួរថា នឹងស្វែងរកដំណោះស្រាយ ដើម្បីធ្វើមាតុភូមិនិវត្តន៍មកកម្ពុជាតាមរយៈប្រទេសថៃ ។
ទាំងលោកស្រីមូ សុខហួរ និងលោក អេងឆៃអៀង អះអាងថាដំណើរមាតុភូមិនិវត្តន៍របស់ក្រុមមន្ត្រីអតីតគណបក្សសង្គ្រោះជាតិ នៅតែដដែល ហើយនៅតែមានយុទ្ធសាស្ត្រនយោបាយសម្រាប់ធ្វើយ៉ាងណា ឱ្យគម្រោងនេះសម្រេចបាន ។
យ៉ាងណា វិទ្យុស្រ្តី មិនអាចសុំការអធិប្បាយជុំវិញករណីនេះពីអ្នកនាំពាក្យរាជរដ្ឋាភិបាលកម្ពុជាគឺលោក ផៃ ស៊ីផាន និងអ្នកនាំពាក្យក្រសួងមហាផ្ទៃ លោក ខៀវ សុភ័គបានឡើយ ដោយហៅទូរស័ព្ទចូលហើយ ពុំមានអ្នកទទួល ។
យ៉ាងណាសម្ដេច ហ៊ុន សែន ថាសកម្មភាពរបស់ក្រុមលោក សម រង្ស៊ី គឺជាសកម្មភាពប៉ុនប៉ងផ្ដួលរំលំរដ្ឋាភិបាល ដែលមិនឱ្យសម្រេចបានឡើយ ខណៈសម្ដេចថា កម្ពុជានឹងថៃសហការគ្នាបានយ៉ាងល្អក្នុងការអនុវត្តច្បាប់ ។
មិនត្រឹមតែប្រទេសថៃតែប៉ុណ្ណោះនោះទេ គឺប្រទេសទាំងអស់ទូទាំងអាស៊ាន គឺកម្ពុជាបានបញ្ជូនដីការចាប់ខ្លួនក្រុមលោក សម រង្ស៊ីឱ្យបញ្ជូនមកកម្ពុជារួចរាល់អស់ហើយ ខណៈប្រទេសម៉ាលេស៊ីតាមរយៈនាយករដ្ឋមន្ត្រីនៃប្រទេសនេះថាមិនទាន់បានទទួលនៅឡើយ ។
ក្រៅពីប្រទេសថៃ គឺមានប្រទេសវៀតណាម និងប្រទេសឡាវដែលជាប្រទេសជិតខាងរបស់កម្ពុជា ។ យ៉ាងណាប្រទេសឡាវ បានបង្ហាញជំហរថា នឹងមិនអនុញ្ញាតឱ្យក្រុមលោក សម រង្ស៊ី ចូលកម្ពុជាដោយឆ្លងកាត់ប្រទេសខ្លួនឡើយ ។ ដោយឡែក ចំពោះប្រទេសវៀតណាមវិញ មិនទាន់ឃើញមានបង្ហាញជំហរបែបណានៅឡើយនោះទេជុំវិញរឿងនេះ ។
យ៉ាងណាតុលាការកម្ពុជាបានសម្រេចចោទប្រកាន់ នឹងបង្គាប់បញ្ជាឱ្យចាប់ខ្លួនក្រុមមន្ត្រីអតីតគណបក្សសង្គ្រោះជាតិ និងសកម្មជនគាំទ្រជាបន្តបន្ទាប់ ។ អ្នកវិភាគថា ការណ៍នេះនឹងធ្វើឱ្យអន្តរជាតិកាន់តែវាយតម្លៃថាស្ថានភាពនៃការគោរពសិទ្ធិមនុស្ស និងការអនុវត្តន៍គឺកាន់តែអាក្រក់ថែមទៀត ៕
