ភ្នំពេញ៖ អង្គការសង្គមស៊ីវិលកម្ពុជា បានគាំទ្រទៅសេចក្តីថ្លែងការណ៍មួយរបស់ស្ថានទូតសហរដ្ឋអាមេរិកប្រចាំនៅប្រទេសកម្ពុជា ដោយថ្កោលទោសជនបង្កអំពើហិង្សាលើតំណាងរាស្ត្របក្សប្រឆាំង ចំនួន ២ រូប និងជំរុញឱ្យមានការស៊ើបអង្កេតជាបន្ទាន់ លើករណីហិង្សានោះ។
ប្រធានបច្ចេកទេសឃ្លាំមើលការរំលោភសិទ្ធិមនុស្សរបស់ អង្គការលីកាដូ លោក អំ សំអាត បានមានប្រសាសន៍ជាមួយវិទ្យុស្ត្រី នៅថ្ងៃអង្គារ ទី២៧ ខែតុលា ឆ្នា២០១៥ នេះថា តំណាងរាស្ត្រដែលនៅមានអភ័យឯកសិទ្ធិ ដែលកំពុងបំពេញការងាររបស់ខ្លួនជាតំណាងរាស្ត្រ នៅពេលប្រជុំនោះ ត្រូវមានកិច្ចការពារសុវត្ថិភាពត្រឹមត្រូវ។
លោកថាប្រសិនបើតំណាងរាស្ត្រគ្រប់រូប ត្រូវបានគេប្រើប្រាស់អំពើហិង្សាតាមទំនើងចិត្តដូច្នេះ នេះវាមិនមែនជាលទ្ធិប្រជាធិបតេយ្យទេ ហើយម្យ៉ាងទៀត ការបំពេញការងារនោះ ក៏មិនបានពេញលេញដែរ ដោយពួកគាត់មានការភ័យខ្លាចពីសុវត្ថិភាពរបស់ពួកគេ។
លោក អំ សំអាត បន្ថែមទៀតថា រដ្ឋាភិបាលត្រូវចាត់វិធានការជាបន្ទាន់ ដើម្បីស្វែងរកជនដៃដល់មកផ្តន្ទាទោសទៅតាមច្បាប់។ លោកនិយាយថា៖ «យើងគាំទ្រទៅលើសេចក្តីថ្លែងការណ៍របស់ស្ថានទូតសហរដ្ឋអាមេរិក ដែលបានចេញសេចក្តីថ្លែងការណ៍ថ្កោលទោសពីការប្រើប្រាស់អំពើហិង្សាទៅលើតំណាងរាស្ត្រ ២ រូប កាលពីម្សិលមិញ។ រដ្ឋាភិបាលត្រូវចាត់វិធានការជាបន្ទាន់ ដើម្បីស្រាវជ្រាវ និងស៊ើបអង្កេតរកជនដៃដល់យកមកផ្តន្ទាទោសតាមផ្លូវច្បាប់ ហើយការស៊ើបអង្កេតនេះត្រូវតែធ្វើទ្បើងដោយលឿន ហើយមានឯករាជ្យ ហើយធ្វើដោយម៉ត់ចត់ ហើយមានតម្លាភាពត្រឹមត្រូវ»។
ទាក់ទងនឹងការប្រើប្រាស់អំពើហិង្សានេះ អ្នកនាំពាក្យក្រសួងមហាផ្ទៃ លោក ខៀវ សុភ័គ បានប្រាប់វិទ្យុស្ត្រីនៅថ្ងៃអង្គារ ទី ២៧ ខែតុលានេះដែរថា ក្រសួងមហាផ្ទៃបានថ្កោលទោសចំពោះការប្រើប្រាស់អំពើហិង្សា ដែលបង្កទ្បើងដោយក្រុមបាតុករ ទៅលើតំណាងរាស្ត្រ គណបក្សង្គ្រោះជាតិទាំង ២ រូប។ លោកបន្តថា លោកក៏កំពុងធ្វើការស៊ើបអង្កេត ស្វែងរកជនសង្ស័យដើម្បីយកមកផ្តន្ទាទោសតាមផ្លូវច្បាប់។
លោក ខៀវ សុភ័គ បានចាត់ទុកក្រុមបាតុករទាំងនោះ ថាជាជនអនាធិបតេយ្យ។ លោកថា៖«យើងសូមធ្វើការថ្កោលទោសចំពោះអំពើហិង្សា ហើយយើងក៏បានរៀបចំធ្វើការស៊ើបអង្កេត ដើម្បីស្វែងរកជនសង្ស័យ ដើម្បីធ្វើការផ្តន្ទាទោសតាមច្បាប់ បាទ បញ្ហាទី០១ ហើយបញ្ហាទី០២ ម្សិលមិញចង់ជម្រាបជូនថា ជាបាតុកម្មមួយដែលមិនបានគ្រោងទុកទេ ហើយក៏គ្មានយកញ្ញត្តិពីអាជ្ញាធរដែរ ប៉ុន្តែដោយការចូលរួមជាមួយសមត្ថកិច្ចរបស់យើង ក៏យើងបានខិតខំ
រំសាយបាតុករហ្នឹងតាំងពីម៉ោង ១០ កន្លះម្ល៉េះ ហើយដូច្នេះ អ្វីដែលកើតទ្បើង គឺបានកើតដល់ម៉ោង ១២ កន្លះ ក្រោយពេលរំសាយហើយ ដូច្នេះយើងចាត់ទុកជនល្មើសជាជនអនាធិបតេយ្យ»។
សូមជម្រាបថា កាលពីថ្ងៃចន្ទ ទី២៦ ខែតុលា ម្សិលមិញនេះ ស្ថានទូតសហរដ្ឋអាមេរិកប្រចាំកម្ពុជា បានចេញសេចក្តីថ្លែងការណ៍តាមរយៈបណ្តាញសង្គមហ្វេសប៊ុករបស់ខ្លួន ដោយបានថ្កោលទោស សកម្មភាពនៃការប្រើប្រាស់អំពើហិង្សាទៅលើតំណាងរាស្ត្រ គណបក្សសង្គ្រោះជាតិ ២ រូប នៅខាងមុខរបងរដ្ឋសភា និងបានអំពាវនាវឱ្យអាជ្ញាធរស៊ើបអង្កេត ឱ្យបានពេញលេញ និងប្រកបដោយតម្លាភាព ទៅលើការវាយដំពីក្រុមបាតុករទាំងនោះ។
គួររំឭកដែរថាតំណាងរាស្ត្រគណបក្សសង្គ្រោះជាតិដែលត្រូវបានក្រុមបាតុករវាយឱ្យរងរបួសធ្ងន់ និងសន្លប់ នោះរួមមាន លោក គង់ សភា និង លោក ញ៉យ ចំរើន ហើយពេលបច្ចុប្បន្ននេះលោកទាំង ២រូបនោះត្រូវបានបញ្ជូនទៅព្យាបាលរបួសនៅក្រៅប្រទេស៕
