លោកកឹម សុខា សរសេរនៅក្នុងទំព័រហ្វេសប៊ុករបស់លោកថា៖ «កាលពី ថ្ងៃទី២៦ តុលា ២០១៥នេះ ជនពាលមួយក្រុមបានមកព័ទ្ធគេហដ្ឋានរបស់ខ្ញុំ ហើយបានប្រើអំពើហិង្សាដោយមានការគប់ដំថ្មចូលក្នុងរបងផ្ទះខ្ញុំ បណ្តាលឲ្យភរិយារបស់ខ្ញុំត្រូវជាប់ក្នុងផ្ទះ អស់រយៈពេល៦ម៉ោង ដោយពុំមានការជួយអន្តរាគមន៍ពីសមត្ថកិច្ច ទោះជាមានការស្នើសុំពីសំណាក់ យើងខ្ញុំក៏ដោយ»។
អនុប្រធានទី១នៃរដ្ឋសភាបានសរសេរដូចនេះ បន្ទាប់ពីមានក្រុមបាតុករមួយក្រុមធ្វើបាតុកម្មហិង្សា នៅចំពីមុខផ្ទះ លោក កឹម សុខា ម្ដុំត្រឡោកបែក ក្នុងខណ្ឌទួលគោក រួចមក នៅវេលាម៉ោងជាង១២យប់ ចូលថ្ងៃអង្គារ ទី ២៧ ខែតុលា ឆ្នាំ២០១៥។ ករណីនេះ អ្នកនាំពាក្យក្រសួងមហាផ្ទៃថា លោកមិនអាចអន្តរាគមន៍ឆ្វេចឆ្វាចបានទេ។
នៅក្នុងទំព័រហ្វេសប៊ុករបស់លោកកឹម សុខា ដដែលបានសរសេរបន្ដទៀតថា តំណាងរាស្ត្រគណបក្សសង្គ្រោះជាតិពីររូប ក៏ត្រូវបានវាយដំនៅម្តុំរដ្ឋសភាផងដែរ។ ករណីនេះលោក កឹម សុខា យល់ឃើញថា នេះគឺជា ភាពខ្វះការទទួលខុសត្រូវរបស់សមត្ថកិច្ច និងរាជរដ្ឋាភិបាល ដែលមានតួនាទីការពារសុវត្ថិភាព សាធារណៈដោយមិនរើសអើងនិន្នាការ។
លោកកឹម សុខា បានសំណូមពរ ឲ្យសមត្ថកិច្ចស្វែងរកជនដៃដល់ និងស៊ើបអង្កេតរកជននៅពីក្រោយខ្នង នឹងអ្នកពាក់ព័ន្ធទៅនឹងអំពើហិង្សានេះ មកផ្តន្ទាទោស ដើម្បីចៀសវាងកុំឲ្យ ប្រជាពលរដ្ឋកាន់តែអស់ជំនឿលើប្រពន្ធ័យុត្តិធម៌ និងរាជរដ្ឋាភិបាល។
លោកកឹម សុខា បានសរសេរបន្ថែមថា៖ សូមចាំទុកថា សុវត្ថិភាពរបស់បុគ្គលគ្រប់រូប មិនថាមកពីគណបក្សណា គឺជាទំនួលខុសត្រូវរបស់រាជរដ្ឋាភិបាល។ ដូច្នេះ សូមរាជរដ្ឋាភិបាល បង្ហាញនូវសមត្ថភាព និងសុឆន្ទៈ ក្នុងការបំពេញ តួនាទីរបស់ខ្លួនដោយឥតលក្ខខណ្ឌ។
ជុំវិញរឿងនេះ លោក ខៀវ សុភ័គ អ្នកនាំពាក្យក្រសួងមហាផ្ទៃ មានប្រសាសន៍ថា ទោះជាលោក កឹម សុខា និយាយយ៉ាងម៉េចក៏ដោយចុះ លោកមិនថាអ្វីនោះទេ ប៉ុន្ដែ លោករីករាយណាស់ ដែល លោក កឹម សុខា មិនមានរបួសស្នាមនោះ។
លោក ខៀវ សុភ័គ ថា៖ «ទោះជាគាត់ថាម៉េចថាចុះ អាហ្នឹងយើងមិនថាទេ ក៏ប៉ុន្ដែយើងរីករាយណាស់ ដែល លោក កឹម សុខា លោក អត់មានរបួសស្នាមអ៊ីចឹង ព្រោះថា ការធម្មតា ការអន្ដរាគមន៍ វាមិន ជាជាង ការចរចា ឬ ក៏ណែនាំ ជជែកតាមមាត់ សម្ដីទេ ចង់និយាយអ៊ីចឹង។ យើងទៅអន្ដរាគមន៍ ឆ្វេចឆ្វាចអី អាសំខាន់– បាទ៎ចង់និយាយអ៊ីចឹងណា៎ ។ ហើយបើគាត់ថា ម៉េចថាទៅ យើងសប្បាយរីករាយ ដែលលោកកឹមសុខា អត់ត្រូវរបួសស្នាមរបួសអី…»។
សូមរម្លឹកដែរថា កាលពីព្រឹកម្សិលមិញនៅពីមុខរដ្ឋសភា មានក្រុមបាតុករមួយក្រុមបានតវ៉ា លើកបដា និងស្រែកទាទារឲ្យដកលោក កឹម សុខា ចេញពីតំណែងអនុប្រធានទី១ នៃរដ្ឋ សភា ។ នៅក្នុងការតវ៉ានោះ ហ្វូងបាតុករ បានវាយតំណាងរាស្ត្រពីររូបរបស់គណបក្សសង្គ្រោះជាតិឲ្យរងរបួសធ្ងន់ធ្ងរ និងធ្វើឲ្យខូចរថយន្តមួយគ្រឿង។ ចំណែកនៅភូមិគ្រឹះលោកកឹម សុខា ក្នុងខណ្ឌទួលគោកឯណោះវិញ ហ្វូងបាតុករបានគប់ដុំថ្ម និងដបទឹកសុទ្ធចូលក្នុងបរិវេណផ្ទះរបស់លោកផងដែរ៕
