លោក សម រង្ស៊ី ប្រធានស្ដីទីគណបក្សសង្គ្រោះជាតិ បានសរសេរលិខិតទៅ ក្រុមប្រឹក្សាសិទ្ធិមនុស្សអង្គការសហប្រជាជាតិ ជួយធានានិងការពារការធ្វើដំណើរមាតុភូមិនិវត្តន៍របស់មន្ត្រីបក្សប្រឆាំង ដែលនឹងធ្វើឡើង នៅថ្ងៃទី៩វិច្ឆិកាឆ្នាំ២០១៩។
លិខិត ដែលលោក សម រង្ស៊ី សរសេរទៅកាន់ប្រធានក្រុមប្រឹក្សាសិទ្ធិមនុស្សអង្គការសហប្រជាជាតិលោក ខូលី សេក ធ្វើឡើងកាលពីថ្ងៃទី១៧កញ្ញា ឆ្នាំ២០១៩នេះ ខណៈលោកកំពុងនៅលើទឹកដីអាមេរិក ក៏លោកបានជួបមន្ត្រីអាមេរិកគឺទាំងមន្ត្រី សេតវិមាន សមាជិកសភានិងព្រឹទ្ធសភា។
ក្នុងសារលិខិតនេះ លោក សម រង្ស៊ី បានប្រកាសវិលទៅប្រទេសកម្ពុជាវិញ របស់មន្ត្រីជាន់ខ្ពស់គណបក្សសង្គ្រោះជាតិ ដែលកំពុងនិទ្ទេសខ្លួននៅក្រៅប្រទេស ដើម្បីវិលទៅរកការចរចា និងការផ្សះផ្សាជាតិ ដែលលោកថាធ្វើឡើងស្របតាមអនុសាសន៍របស់អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា លោកស្រី រ៉ូណា ស្មីត ។
ឮនៅក្នុងរបាយការណ៍ប្រចាំឆ្នាំ ២០១៩ ទៅកាន់ក្រុមប្រឹក្សាសិទ្ធិមនុស្សអង្គការសហប្រជាជាតិ កាលពីថ្ងៃទី៩ ខែកញ្ញា លោកស្រី រ៉ូណា ស្មីត បានទទូច ដល់រាជរដ្ឋាភិបាលកម្ពុ្ជជា ឱ្យបង្កើតការសន្ទនាគ្នា រវាងរដ្ឋាភិបាល និង អ្នកនយោបាយនៃអតីតគណបក្សប្រឆាំង។
លិខិតរបស់លោកសមរង្ស៊ីធ្វើឡើងក៏ស្របពេល ក្រុមប្រឹក្សាសិទ្ធិមនុស្សអង្គការសហប្រជាជាតិ កំពុងជួបប្រជុំប្រចាំឆ្នាំរបស់ខ្លួន លើកទី៤២ នៅទីក្រុងហ្សឺណែវ ប្រទេសស្វីស ចាប់ពីថ្ងៃទី៩ ដល់ថ្ងៃទី២៧ ខែកញ្ញា។
ក្នុងលិខិតនោះ បានស្នើឱ្យស្ថាប័នសិទ្ធិមនុស្សអង្គការសហប្រជាជាតិនេះ គាំទ្រពេញទំហឹងចំពោះអនុសាសន៍របស់លោកស្រី រ៉ូណា ស្មីត ដែលស្នើឱ្យ ដោះលែងប្រធានគណបក្សសង្គ្រោះជាតិលោក កឹម សុខា ពីការឃុំខ្លួន និង បិទបញ្ចប់ការស៊ើបសួរឱ្យបានឆាប់ ឬទម្លាក់ចោលរាល់ការចោទប្រកាន់ទាំងអស់មកលើលោក កឹម សុខា និងអ្នកជាប់ឃុំ ព្រមទាំងអ្នកទោសនយោបាយទាំងអស់។
ជាមួយគ្នានេះ លោក សម រង្ស៊ីប្រធានស្ដីទីគណបក្សសង្គ្រោះជាតិ ក៏បានស្នើឱ្យបន្តអាណត្តិរបស់លោក ស្រី រ៉ូណា ស្មីត ពីរឆ្នាំបន្តទៀត ដើម្បីបន្តឃ្លាំមើលស្ថានភាពសិទ្ធិមនុស្ស នៅកម្ពុជា ដែលលោកគិតថាស្ថានការណ៍នយោបាយនៅកម្ពុជា នឹងប្រែប្រួលខ្លាំងនៅក្នុងពេលឆាប់ៗខាងមុខនេះ ជាពិសេសក្នុងដំណាក់កាលនៃការត្រៀមធ្វើដំណើរទៅកម្ពុជាវិញរបស់មន្ត្រីបក្សប្រឆាំង និងព្រឹត្តិការណ៍ដែលអាចកាន់តែអាក្រក់ នៅក្រោយថ្ងៃទី៩ ខែវិច្ឆិកា ដែលជាថ្ងៃកំណត់មាតុភូមិនិវត្តន៍របស់មន្ត្រីបក្សប្រឆាំងនោះ។
ចុងក្រោយ លោកលោក សម រង្ស៊ីទទូចថា វិធានការណ៍សំខាន់បំផុត ដែលអាចបង្ការការគំរាមប្រើហិង្សា និងគ្រឿងសព្វាវុធយោធា បង្ក្រាបមកលើប្រជាពលរដ្ឋស្លូតត្រង់ គឺមានតែស្ថាប័នអន្តរជាតិទាំងអស់ រួមទាំងអង្គការសហប្រជាជាតិ អាស៊ាន សហភាពអឺរ៉ុប សហរដ្ឋអាមេរិក សហភាពអន្តរសភាជាដើម គាំទ្រដល់ការប្តេជ្ញាចិត្តរបស់លោក និងមេដឹកនាំដទៃទៀតនៃអតីតគណបក្សសង្រ្គោះជាតិ ត្រូវធ្វើមាតុភូមិវិញ និង គាំទ្រការទាមទារឱ្យកម្ពុជាស្ដារសិទ្ធិមនុស្ស និង ប្រជាធិបតេយ្យឡើងវិញ។
នេះបើតាមការចុះផ្សាយបន្តដោយវិទ្យុអាស៊ីសេរីនៅថ្ងៃទី២៣កញ្ញានេះ។ សូមជម្រាបថា នៅពេលនេះ ស្ថានការណ៍របស់សកម្មជន នៃអតីតបក្សប្រឆាំង ដែលគាំទ្រលោកសមរង្ស៊ី កំពុងរងការកោះហៅនឹងចាប់ខ្លួន ជាបន្តបន្ទាប់ ដែលមានចំនួន២៩នាក់ ហើយ កាលពីថ្ងៃទី២២កញ្ញា បុរសម្នាក់ ជាអង្គរក្សរបស់លោកសមរង្ស៊ី ត្រូវវាយពីក្រោយខ្នង ដោយបណ្ដាលរយះក្បាល។ រាជរដ្ឋាភិបាលនិង បក្សកាន់អំណាច ព្រមានថានឹងចាប់ខ្លួនអ្នកធ្វើសកម្មភាព គាំទ្រ លោកសមរង្ស៊ី វិលចូកម្ពុជាវិញដោយផ្តន្ទាទោស ពី៥ឆ្នាំទៅ១០ ក្រោមបទចោទការប៉ុនប៉ងផ្ដួលរំលំរាជរដ្ឋាភិបាល៕
