របាយការណ៍របស់UNWTO ឬ អង្គការទេសចរណ៍ពិភពលោកអង្គការ សហប្រជាជាតិបានបង្ហាញនូវលំដាប់ប្រទេសក្នុងអាស៊ានដែលទទួលបានចំណូលទេសចរណ៍អន្ដរជាតិឆ្នាំ២០១៨។ក្នុងនោះកម្ពុជាជាប់លំដាប់ថ្នាក់លេខ៧ ខណៈប្រទេសថៃជាប់លំដាប់ទី១។តាមរយៈការតាមដានកន្លងមក អ្នកសិក្សាសង្គមសង្ស័យថាអាចមានករណីពុករលួយពីការប្រមូលថវិកាព្រោះចំនួនលុយទទួលបាននេះមិនសមនឹងតួលេខឡើយ។យ៉ាងណា លោក ប៉ាចន្ទរឿន យកកត្តាទាក់ទាញទេសចរណ៍ប្រទេសថៃមកធ្វើការវែកញែកជាគម្រូ។
កញ្ញា ឆោមពៅនិការាយការណ៍៖
ប្រទេសទាំង១០នៃសមាគមប្រជាជាតិអាស៊ីអាគ្នេយ៍មានភាពល្អឯកផ្សេងៗគ្នានៃទេសចរណ៍ក្នុងទម្រង់វប្បធម៌ស្រដៀងគ្នា។ តាមគេហទំព័រ Farandwide.com តំបន់អាស៊ានបានក្លាយជាគោលដៅទេសចរណ៍អន្ដរជាតិលំដាប់ទី៣ក្នុងពិភពលោក។ស្របពេលជាមួយគ្នានេះ គឺថ្មីៗនេះ UNWTO បានចេញតារាងលំដាប់ពិន្ទុអំពីលំដាប់ចំណូលជាតិនៃបណ្ដាប្រទេសអាស៊ានទាំង១០បានមកពីវិស័យទេសចរណ៍នៃការស្រូបទាញភ្ញៀវបរទេសមកទស្សនាប្រទេស។បើតាមតារាងដដែលដែលរៀបរៀងបន្ថែមដោយទំព័រហ្វេសប៊ុក ASEAN Skyline ប្រទេសជាប់លំដាប់ទី១ រកចំណូលបានច្រើនជាងគេគឺប្រទេសថៃ ប្រមាណ៦៣លានដុល្លារ ស្របពេលដែលប្រទេសមីយ៉ាន់ម៉ាមិនមានទិន្នន័យផ្ដល់ឱ្យ។ចំណែកប្រទេសសិង្ហបុរីដែលមានភាពស៊ីវិល័យនៃនគរូបនីយកម្ម រកបានចំណូលជាប្រចាំឆ្នាំ២០១៨ ប្រមាណ២០លានដុល្លារតាមដោយម៉ាឡេស៊ី ១៩លានដុល្លារ ពីមុខ ប្រទេសឥណ្ឌូនេស៊ីដែលទទួលបានត្រឹម១៤លានដុល្លារ ខណៈវៀតណាម រកចំណូលបាន១០លានដុល្លារក្នុងឆ្នាំដដែលនោះ។ ចំណែកប្រទេសកោះ ហ្វីលីពីន វិញ រកបានប្រមាណ៧លានដុល្លារ។ ដោយឡែក ប្រទេសកម្ពុជាដែលមានសំណង់ស្ថាបត្យកម្មបុរាណ ប្រាសាទអង្គរវត្តជាប់ក្នុងអច្ឆរយៈទាំង៧លើពិភពលោក និង បានធ្លាប់ជាប់ជាប្រទេសមានឆ្នេរខ្សាច់សស្អាតជាង គេ រកចំណូលបានត្រឹម៤លានដុល្លារតែប៉ុណ្ណោះនិងជាប់ជាប្រទេសរកចំណូលទេសចរណ៍បានចំណាត់ថ្នាក់លេខ៧ក្នុងតំបន់។ក៏ប៉ុន្ដែបើធៀបទៅនឹងឆ្នាំ២០១៧ កម្ពុជា រកចំណូលសរុបពីវិស័យទេសចរណ៍បាន ៣,៦៣ ពាន់លានដុល្លារ ក្នុងឆ្នាំ២០១៧ ហើយនេះគឺកើនឡើង១៣ភាគរយ បើប្រៀបធៀបនឹងឆ្នាំ២០១៦ ។
នៅក្នុងទិន្នន័យយ៉ាងដូច្នេះ លោក ប៉ាចន្ទរឿន អ្នកសិក្សាសង្គម និង ជាសាស្រ្ដាចារ្យទស្សនវិជ្ជាមួយរូប បានធ្វើការតាមដានយ៉ាងយកចិត្តទុកដាក់ពីចំណូលជាតិបានពីវិស័យទេសចរណ៍កម្ពុជា ទាំងភាពជាក់ស្ដែង និង តាមរយៈការផ្ដល់ព័ត៌មានពីក្រសួងទេសចរណ៍។ លោកសាស្រ្ដាចារ្យមិនមានទំនុកចិត្តឡើយលើប្រព័ន្ធគ្រប់គ្រង និង រកចំណូលថវិកាជាតិ និង សង្ស័យថាអាចមានបាតុភាពពុករលួយ។
ដោយមានមន្ទិលក្នុងការផ្ដល់ឱ្យនូវតួលេខរបស់រដ្ឋាភិបាលបែបនេះ លោកសាស្រ្ដាចារ្យរំពឹងថា នឹងមានការបើកយ៉ាងតម្លាភាពនូវទិន្នន័យដែលក្រសួងបានប្រមូលបាន ដោយធ្វើការតម្លើងទិន្នន័យជាទៀងទាត់ ជាប្រចាំថ្ងៃ សប្ដាហ៍ ខែ ត្រីមាស ឆមាស រហូតដល់ពេញមួយឆ្នាំ។
បើនិយាយពីទេសចរណ៍វប្បធម៌ធម្មជាតិ ប្រវត្តិសាស្រ្ដ និង វប្បធម៌ ថ្វីបើកម្ពុជាមានភាពចំណាស់និងគួរឱ្យចាប់អារម្មណ៍ប៉ុន្ដែនៅខ្វះកត្តាទាក់ទាញជាច្រើនដែលបង្កភាពងាយស្រួលដល់ទេសចរ។ទាក់ទិនទៅនឹងចំណុចទាំងនេះ លោកប៉ាចន្ទរឿនបានយកប្រទេសថៃជាឧទាហរណ៍ដោយហេតុថៃបានជាប់ជាប្រទេសរកចំណូលបានលំដាប់លេខមួយមានភ្ញៀវទេសចរណ៍មិនតិចជាង៣០ទៅ៤០លានក្នុងមួយឆ្នាំ ព្រោះកត្តាទាក់ទាញនិង សម្រួលដល់ទេសចរណ៍បីយ៉ាង៖
ទាក់ទិនទៅនឹងបញ្ហាទាំងអស់ខាងលើ វិទ្យុស្រ្ដីបានធ្វើការទំនាក់ទំនងទៅកាន់ក្រសួងទេសចរណ៍ជាច្រើនលើកដើម្បីសុំធ្វើការឆ្លើយតបប៉ុន្ដែទូរស័ព្ទហៅចូលតែមិនមានអ្នកទទួល។
បណ្ដាប្រទេសនីមួយៗនៃអាស៊ាន មានពាក្យស្លោកទេសចរណ៍ជាតិរៀងៗខ្លួន ក្នងនោះ ប្រទេសថៃ មានពាក្យស្លោកថា ថៃដ៏អស្ចារ្យ តែងតែធ្វើឱ្យអ្នកស្ងើបចិត្តជានិច្ច ចំណែក ប្រទេសកម្ពុជាបានប្រកាន់ពាក្យស្លោកថាកម្ពុជាព្រះរាជាណាចក្រអច្ឆរិយ ចំពោះវៀតណាមមានពាក្យស្លោកថា មន្ដស្នេហ៍ជាប់ជានិច្ច។
បើតាមរបាយការណ៍របស់ក្រសួងទេសចរណ៍បង្ហាញថា អ្នកទេសចរបរទេសទៅទស្សនាតំបន់អង្គរ បានធ្លាក់ចុះប្រមាណជាង ៧ភាគរយ រយៈពេល ៥ខែនៅ ដើមឆ្នាំ២០១៩។ អាជ្ញាធរអប្សរាអះអាងថា អាជ្ញាធរបានរកប្រាក់ចំណូលបានប្រមាណជាង ៥០លានដុល្លារ ក្នុងរយៈពេល៥ខែ។ ក្រៅពីជនជាតិចិន ជនជាតិកូរ៉េខាងត្បូង និងអាមេរិក គឺជាទេសចរផ្ដល់ប្រាក់ចំណូលច្រើនជាងគេ។ កាលពីឆ្នាំ២០១៨ កម្ពុជាទទួលបានភ្ញៀវទេសចរអន្តរជាតិប្រមាណជាង ៦លាននាក់ ដែលក្នុងនោះមាន ២លាននាក់មកពីប្រទេសចិន ហើយទទួលបានប្រាក់ចំណូលសរុបប្រមាណជាង ៤ពាន់លានដុល្លារអាមេរិក ឬប្រមាណជិត ១៣ភាគរយនៃផលទុនសរុប GDP របស់កម្ពុជា។ តាមរយៈសម្ភាសកន្លងមករបស់វិទ្យុស្រ្ដីនិង ក្រុមមគ្គុទ្ទេសក៍ ពួកគេបានអះអាងថា ទេសចរចិន មិនបានផ្ដល់ផលចម្រើនដល់ប្រព័ន្ធសេដ្ឋកិច្ចក្នុងស្រុកឡើយ ព្រោះចិនមានភ្នាក់ងារក្នុងស្រុករបស់គេ បម្រើសេវាកម្មទេសចរជនជាតិចិនក្នុងប្រទេសកម្ពុជា និងមានតម្លៃសីលធម៌មួយធ្វើឱ្យខើចការទស្សនាកម្ពុជារបស់ពួកបស្ចឹមប្រទេស។ ពោលគឺ ក្នុងឆ្នាំ២០១៨ នៃរបាយការណ៍នោះ ចំនួនភ្ញៀវទេសចរចិនមានការកើនឡើងស្របពេលដែលចំនួនភ្ញៀវទេសចរណ៍ពីអឺរ៉ុបនិងអាមេរិកមានការធ្លាក់ចុះចំនួន ៤និង៥ភាគរយ ៕
