ក្រុមគ្រូបង្រៀនគ្រូអនុវិទ្យាល័យគគីរខេត្តកណ្តាល បានត្អូញត្អែរពីការដោះស្រាយយឺតយ៉ាវរបស់ក្រសួងអប់រំ យុវជន និងកីទ្បា ព្រមទាំងអង្គភាពប្រឆាំងអំពើពុករលួយ ចំពោះករណីពុករលួយ ដែលពួកគេចោទថា នាយកអនុវិទ្យាល័យនេះ បានប្រើប្រាស់ថវិកា PB ខុសគោលដៅ។
សូមជម្រាបថា កាលពីថ្ងៃទី១៩ ខែតុលា ឆ្នាំ២០១៥ ក្រុមគ្រូបង្រៀននៅអនុវិទ្យាល័យគគីរ បានដាក់ពាក្យបណ្ដឹងទៅក្រសួងអប់រំ យុវជន និងកីឡា ក៏ដូចជាអង្គភាពប្រឆាំងអំពើពុករលួយ ព្រមទាំងសមាគមគ្រូបង្រៀនកម្ពុជាឯករាជ្យផងដែរ ដោយចោទប្រកាន់នាយកសាលាឈ្មោះ យឹម នីរ៉ា អំពីភាពមិនប្រក្រតីនៃការប្រើប្រាស់ថវិកាផ្គត់ផ្គង់សាលា។
គ្រូបង្រៀនម្នាក់ ក្នុងចំណោមគ្រូបង្រៀននៅអនុវិទ្យាល័យគគីរ ជិត២០នាក់ គឺលោក អៃ ឈីម បាននិយាយថា គិតចាប់តាំងពីថ្ងៃដាក់ពាក្យបណ្តឹងមក ស្ថាប័នដែលពាក់ព័ន្ធទាំងនោះមិនទាន់បានដោះស្រាយជូនលោកគ្រូ អ្នកគ្រូ នៅទ្បើយទេ។
លោកបន្ថែមថា ប្រសិនបើនៅតែមិនមានដំណោះស្រាយទេនោះ លោកគ្រូ អ្នកគ្រូ នឹងជួបជុំគ្នារកវិធានការផ្សេងៗទៀត។ លោកថាបាននិយាយថា៖ «ដំណោះស្រាយដូចអត់ទាន់មានឃើញថាខាងក្រសួងសាមី អត់ទាន់បានចុះមកស៊ើបអង្កេតអីដូចព័ត៌មានមើលឃើញប្រាកដប្រជានៅទ្បើយនោះទេ។ រឿងហ្នឹងនៅពេលមិនទាន់មានដំណោះស្រាយពួកខ្ញុំមិនទាន់ដឹងថាត្រូវធ្វើយ៉ាងម៉េច ចាំមើលពេលដែលជុំគ្នា នឹងរកវិធីអ្វីបន្តទៀត មិនទាន់បានដឹងថាលទ្ធផលយ៉ាងម៉េច ព្រោះមិនទាន់មានចំណាត់ការមកពីខាងលើថា គេត្រូវដោះស្រាយជូនយើងយ៉ាងម៉េច ។ អញ្ចឹងមិនទាន់បានរៀបចំគម្រោងថាធ្វើយ៉ាងម៉េចនោះទេចាំមើលព័ត៌ពីលើមកសិន»។
ប្រធានស្តីទីសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី បានមានប្រសាសន៍ថា នៅថ្ងៃទី១៩ ខែតុលា ឆ្នាំ២០១៥ លោកស្រីបានដាក់លិខិតមួយទៅអង្គភាពប្រឆាំងអំពើពុករលួយ ឲ្យជួយអន្តរាគមន៍ករណីប្រព្រឹត្តអំពើពុករលួយរបស់នាយកសាលាអនុវិទ្យាល័យគគីរ គឺលោក យឹម នីរ៉ា ដែលត្រូវបាន លោកគ្រូ អ្នកគ្រូបង្រៀនចោទថា បានយកប្រាក់ PB ទៅចាយវាយខុសទិសដៅ។
លោកស្រីអ៊ុក ឆាយ៉ាវី បន្តថា គិតចាប់តាំងពីថ្ងៃដាក់លិខិតនោះមកដល់ថ្ងៃទី២៤ ខែតុលា ឆ្នាំ២០១៥នេះ អង្គភាពប្រឆាំងអំពើពុករលួយ មិនទាន់បានឆ្លើយតបនៅទ្បើយទេ ។ អ្នកស្រីបន្ថែមថា ប្រសិនបើក្រសួងស្ថាប័នពាក់ព័ន្ធ នៅតែមិនឆ្លើយតបទេនោះ អ្នកស្រីនឹងដាក់លិខិតនេះទៅអង្គភាពប្រឆាំងអំពើពុករលួយជាថ្មីម្តងទៀតនៅដើមខែវិច្ឆិកា ។ អ្នកស្រីថា៖ «តាមពិតទៅ រាល់ការដែលយើងដាក់លិខិតទៅតាំងពីសម័យលោក រ៉ុង ឈុន នៅម្ល៉េះ គឺអត់បានមានអ្នកណាឆ្លើយតបនូវអ្វីដែលជាលិខិតរបស់យើងទេ ហើយយុទ្ធសាស្ត្ររបស់យើង បើសិនអត់មានអ្នកណាឆ្លើយតបថ្ងៃណាមួយ ឬក៏ពេលវេលាដែលយើងដាក់ម្តងពីរដងទៀត បើសិនអត់ឃើញឆ្លើយតបនូវរាល់លិខិត គឺយើងប្រាប់ដល់អ្នកដែលគេកំពុងមានបញ្ហា ដូចជាម្ចាស់សាលា ឬបុគ្គលិកនៅសាលាហ្នឹង បើគាត់អត់យល់ទាស់ទេ គាត់ថាមិនសុខចិត្តទេក្នុងការមិនឆ្លើយតប គឺគាត់បង្ខំចិត្តធ្វើកូដកម្ម»។
ទាក់ទងនឹងបញ្ហានេះដែរ ប្រធានអង្គភាពប្រឆាំងអំពើពុករលួយលោក ឱម យ៉ិនទៀង បានប្រាប់វិទ្យុស្ត្រី នៅថ្ងៃ សៅរិ៍ទី ២៤ ខែតុលា ឆ្នាំ ២០១៥ នេះថា លោកបានឆ្លើយតបទៅនឹងលិខិតរបស់សមាគមគ្រូបង្រៀនកម្ពុជាឯករាជ្យរួចហើយ។ ប៉ុន្តែលោកឱម យ៉ិនទៀង មិនបានបញ្ជាក់ថា តើការឆ្លើយតបនោះមានខ្លឹមសារយ៉ាងណាទ ។ លោកបានមានប្រសាសន៍ថា«ខ្ញុំបានទទួលហើយ ខ្ញុំបានធ្វើលិខិតឆ្លើយតបទៅគាត់ហើយ បាទមុនចុងសប្តាហិ៍នឹងបាទ»។
សូមរំឭកថា ក្រុមគ្រូបង្រៀននៅអនុវិទ្យាល័យគគី បានដាក់ពាក្យបណ្តឹងទៅអង្គភាពប្រឆាំងអំពើពុករលួយនៅថ្ងៃទី ៣០ ខែកក្កដា ឆ្នាំ២០១៥ ហើយនៅថ្ងៃ១០ ខែសីហា ឆ្នាំ២០១៥ អង្គភាពប្រឆាំងអំពើពុករលួយបានអញ្ជើញតំណាង គ្រូបង្រៀនចូលបំភ្លឺ ពាក់ព័ន្ធនឹងបណ្តឹងនោះ ។ ប៉ុន្តែចាប់ពីពេលនោះមក ករណីនេះនៅតែមិនទាន់មានដំណោះស្រាយ ជាហេតុធ្វើឲ្យលោកគ្រូ អ្នកគ្រូ រង់ចាំដំណោះស្រាយរហូតមកដល់ពេលនេះ អស់រយៈពេលជាច្រើនខែ៕
