គ្រូបង្រៀនមួយចំនួននៅអនុវិទ្យាល័យគគីរ កាលពីថ្ងៃចន្ទ ទី១៩ ខែតុលា បានដាក់ពាក្យបណ្ដឹងទៅក្រសួងអប់រំ និងអង្គភាពប្រឆាំងអំពើពុករលួយ ឲ្យចាត់វិធានការប្រឆាំងអំពើពុករលួយនៅក្នុងអនុវិទ្យាល័យនេះ។
លោកបង្រៀនម្នាក់ ក្នុងចំណោមគ្រូបង្រៀនអនុវិទ្យាល័យគគីរ ប្រមាណជាង១០នាក់ គឺលោក ទ្បាច វ៉េត បាននិយាយថា នាយកសាលាអនុវិទ្យាល័យគគីរ ឈ្មោះលោក យឹម នីរ៉ា បានប្រើប្រាស់ប្រាក់PB ខុសទិសដៅ នៃការអនុវត្តរបស់ក្រសួងអប់រំ ។ លោកក៏បានបញ្ជាក់ប្រាបផងដែរថា ក្រុមគ្រូបង្រៀនបានដាក់ពាក្យប្ដឹងករណីនេះទៅក្រសួងអប់រំ យុវជន និងកីឡា ក៏ដូចជាអង្គភាពប្រឆាំងអំពើពុករលួយ ប៉ុន្តែមិនមានដំណោះស្រាយ ។
លោកទ្បាច វ៉េត បានសង្កត់ធ្ងន់ថា ចាប់តាំងពីមានការដាក់ពាក្យប្តឹងករណីពុករលួយនោះ ចាប់ផ្តើមមានការគុំគួនដល់លោកគ្រូ អ្នកគ្រូដែលជាអ្នកពាក្យប្តឹង ធ្វើឲ្យពួកគាត់បាក់ទឹកចិត្តក្នុងការបង្រៀនសិស្ស ដោយសារនាយកសាលារូបនោះបានគំរាមដល់ពួកគាត់ ។ លោកគ្រូ អ្នកគ្រូក៏បានស្នើសុំ ឲ្យស្ថាប័នពាក់ព័ន្ធធ្វើការផ្លាស់ប្តូរនាយកសាលាអនុវិទ្យាល័យគគីររូបនេះចេញ និងស្នើឲ្យអង្គភាពប្រឆាំងអំពើពុករលួយដោះស្រាយតាមវិធានការច្បាប់ពីបញ្ហានេះ។
ទាក់ទងនឹងបណ្តឹងរបស់លោកគ្រូ អ្នកគ្រូបង្រៀននៅអនុវិទ្យាល័យគគីរនេះដែរ លោក យឹម នីរ៉ា នាយកសាលាអនុវិទ្យាល័យរូបនេះ បានប្រាប់វិទ្យុស្រី្ត នៃ WMC នៅថ្ងៃ អង្គារ ទី២០ ខែតុលាថា លោកមិនអាចបកស្រាយអ្វីបានទេ ទាក់ទងនឹងចោទប្រកាន់របស់លោកគ្រូ អ្នកគ្រូទាំងនោះ បើគ្មានការអនុញ្ញាតពីប្រធានមន្ទីរ ក្រសួងអប់រំជាមុនសិននោះ។
ជុំវិញករណីនេះដែរ ប្រធានមន្ទីរអប់រំខេត្តកណ្តាលគឺលោក អ៊ុង តុលា មានប្រសាសន៍ថា ខាងមន្ទីររបស់លោកមិនទាន់ទទួលបានព័ត៌មានទាក់ទងនឹងរឿងខាងលើនេះទេ។
ទាក់ទងនឹងការចោទប្រកាន់របស់ក្រុមគ្រូបង្រៀននៅអនុវិទ្យាល័យគគីរ ដែលបានប្ដឹងនាយកសាលារបស់ខ្លួនរឿងពុករលួយនេះ វិទ្យុស្ត្រីអេហ្វអឹម ១០២ មិនទាន់អាចទាក់ទងអ្នកនាំពាក្យក្រសួងអប់រំយុវជន និងកីឡា ក៏ដូចជាលោកឱម យ៉ិនទៀង ប្រធានអង្គភាពប្រឆាំងអំពើពុករលួយបានទេនៅថ្ងៃអង្គារ ទី២០ ខែតុលានេះS។
អ្នកស្រី អ៊ុក ឆាយ៉ាវី ប្រធានស្តីទីសមាគមគ្រូបង្រៀនកម្ពុជាឯករាជ្យបានមានប្រសាសន៍ថា ប្រាក់ PB ជាប្រាក់ដែលគេផ្តោតទៅលើវិស័យអប់រំ ហើយការចាយវាយប្រាក់ PB ត្រូវតែទាក់ទងនឹងការទិញសម្ភារៈប្រើប្រាស់ក្នុងការបង្រៀនសិស្ស។
អ្នកស្រីបញ្ជាក់ថាកន្លងមកនេះលោកគ្រូ អ្នកគ្រូដែលបង្រៀននៅអនុវិទ្យាល័យគគីរ ធ្លាប់ដាក់ពាក្យបណ្តឹងទៅស្ថាប័នពាក់ព័ន្ធរួចហើយ ក្នុងនោះមានអង្គភាពប្រឆាំងអំពើពុករលួយក៏ធ្លាប់បានអញ្ជើញតំណាងគ្រូបង្រៀនសួរនាំពីករណីនោះដែរ ប៉ុន្តែករណីនេះនៅតែមិនទាន់មានដំណោះស្រាយដដែល។ ដោយសារតែមានភាពយឺតយ៉ាវក្នុងការដោះស្រាយនោះហើយ ទើបគ្រូបង្រៀន ទាំងនោះដាក់លិខិតមកសមាគមគ្រូបង្រៀនកម្ពុជាឯករាជ្យ ដើម្បីឲ្យសមាគមនេះជួយជំរុញឲ្យស្ថាប័នពាក់ព័ន្ធខាងលើ ចុះដោះស្រាយអំពើពុករលួយជាថ្មីម្តងទៀត។
អ្នកស្រីលើកទ្បើងទៀតថា អ្នកស្រីទើបតែបានដាក់លិខិតនោះទៅអង្គភាពប្រឆាំងអំពើពុករលួយឲ្យជួយអន្តរាគមន៍ ពីករណីនៃការប្រព្រឹត្តអំពើពុករលួយនេះ កាលពីថ្ងៃ ទី១៩ ខែតុលា ប៉ុន្តែអង្គភាពប្រឆាំងអំពើពុករលួយមិនទាន់បានឆ្លើយតបនឹងលិខិតនោះនៅទ្បើយទេ។
បើតាមក្រុមគ្រូបង្រៀននៅអនុវិទ្យាល័យគគីរឲ្យដឹងថា ពួកគាត់បានប្តឹងទៅក្រសួងអប់រំយុវជន និងកីទ្បា និងអង្គភាពប្រឆាំងអំពើពុករលួយមួយដង ពីរដងមកហើយ ហើយនៅថ្ងៃទី១០ ខែសីហា ឆ្នាំ២០១៥ អង្គភាពប្រឆាំងអំពើពុករលួយ បានអញ្ជើញតំណាង គ្រូបង្រៀន ចូលបំភ្លឺ ពាក់ព័ន្ធនឹងបណ្តឹងអំពីនាយកសាលាពុករលួយនេះ។ ប៉ុន្តែករណីនេះមិនទាន់មានដំណោះស្រាយដែល លោកគ្រូ អ្នកគ្រូ រង់ចាំដំណោះស្រាយរហូតមកដល់ពេលនេះអស់រយៈពេលជាច្រើនខែ៕
