ខេត្តបាត់ដំបង៖ បញ្ហាខ្វះទឹកប្រើប្រាស់នៅរដូវប្រាំងសម្រាប់ប្រជាពលរដ្ឋក្នុងស្រុកមោងឫស្សីនឹងត្រូវបានដោះស្រាយ ព្រោះអាជ្ញាធរបានប្រកាសបើកគម្រោងទឹកស្អាតដែលទទួលជំនួយពីអង្គការអន្តរជាតិមួយនឹងជួយជីកអណ្តូងទឹកយ៉ាងតិចមួយក្នុងមួយភូមិ។
អភិបាលស្រុកមោងឫស្សី លោក ទេព ហន នៅព្រឹកថ្ងៃទី ១០ ឧសភា ឆ្នាំ ២០១៩នេះ បានប្រកាសបើគម្រោងទឹកស្អាតសម្រាប់ប្រជាពលរដ្ឋចំនួន ១៨ ភូមិ និង ៧ ឃុំ នៅស្រុកមោងឫស្សី ខេត្តបាត់ដំបង។ គម្រោងទឹកស្អាតនេះ ទទួលបានជំនួយពីអង្គការសាម៉ារីតាន់ភឺសសង្រោះអន្តជាតិ (Samaritan Purse)។
លោក ទេព ហន អភិបាលនៃគណអភិបាលស្រុកមោងឫស្សី បានថ្លែងនៅកម្មវិធីប្រកាសបើកគម្រោងនៅព្រឹកថ្ងៃ សុក្រនេះថា គម្រោងនេះមានរយៈពេលបីឆ្នាំចាប់ពីឆ្នាំ ២០១៩ ដល់ ឆ្នាំ ២០២១ ដែលអង្គការសាម៉ារីតាន់ភឺសនឹងផ្តល់ជំនួយក្នុងការជីកអណ្តូងនៅក្នុងភូមិនិមួយៗ ដោយតបណ្តាញទុយោទឹកដល់ផ្ទះអ្នកភូមិ។
ទោះបីយ៉ាងណា លោកមិនអាចបញ្ជាក់ថា គម្រោងនេះនឹងត្រូវចំណាយថវិកាចំនួនប៉ុន្មាន ឬ ជីកអណ្តូងចំនួនប៉ុន្មាននៅឡើយទេ ព្រោះម្ចាស់ជំនួយនឹងចុះសិក្សានៅតាមភូមិនិមួយៗជាមុនសិន។
កាលពីថ្ងៃទី ៣០ មេសា ឆ្នាំ ២០១៩ ក្រុមអង្គការសាម៉ារីតាន់ភឺស បានបើកកិច្ចប្រជុំមួយជាមួយអ្នកភូមិទួលព្រំ២ ឃុំកកោះ ស្រុកមោងឫស្សី ខេត្តបាត់ដំបង ដើម្បីបង្ហាញអំពីគម្រោងទឹកស្អាតនេះ។
ក្នុងកិច្ចប្រជុំនោះ អង្គការបានស្នើ៎ឲ្យអ្នកភូមិចូលរួមថវិកាចំនួន ២០ ម៉ឺនរៀលក្នុងមួយគ្រួសារ សម្រាប់ទិញទុយោតបណ្តាញចូលផ្ទះ។ អ្នកភូមិយ៉ាងតិច ៩០ គ្រួសារ ក្នុងចំណោម ១៨៨ គ្រួសារ បានចូលរួមថវិកា។
ក្រុមអង្គការនេះបញ្ជាក់ថា កាលណាអ្នកភូមិចូលរួមថវិកាខ្លះ ពួកគាត់នឹងចេះថែរក្សាអណ្តូងទឹកឲ្យបានល្អ ព្រោះមានចំណែកថវិការបស់គាត់៕ អត្ថបទ៖ តឿម រាត្រី
