MC ៖ អង្គការស្នាមញញឹមកម្ពុជាគ្រោងនឹងធ្វើការវះកាត់មាត់ឆែបជូនប្រជាពលរដ្ឋកម្ពុជា នៅថ្ងៃទី១៩ ដល់ថ្ងៃទី២៤ ខែឧសភាខាងមុខនេះ។ នេះបើតាមការលើកឡើងរបស់វេជ្ជបណ្ឌិតជំនាញនៃអង្គការស្នាមញញឹមកម្ពុជា នៅក្នុងជំនួបទស្សនកិច្ចពិនិត្យមើលស្ថានភាពកុមារមានបញ្ហាមាត់ឆែប នៅមន្ទីរពេទ្យមិត្តភាពខ្មែរ-សូវៀតដឹកនាំដោយលោក លីង ឈុនអ៊ីង (Leung Chun-Ying) អតីតអភិបាលក្រុងហុងកុង និងក្រុមគ្រូពេទ្យជំនាញ កាលពីថ្ងៃទី០៣ ខែឧសភាកន្លងទៅ។
លោក កែវ សុខា រាយការណ៍,ប្រភពអត្ថបទ៖ លោក សំណាង
លោកវេជ្ជបណ្ឌិត ម៉ុក ធាវី នាយកគ្រប់គ្រងវេជ្ជសាស្ត្រនៃអង្គការស្នាមញញឹមកម្ពុជា បានលើកឡើងថា ការវះកាត់រយៈពេល៦ថ្ងៃខាងមុខនេះ អង្គការស្នាមញញឹមកម្ពុជា សហការជាមួយក្រុមគ្រូពេទ្យស្ម័គ្រចិត្ត Face to Face មកពីសហរដ្ឋអាម៉េរិក និងមន្ទីរពេទ្យមិត្តភាពខ្មែរ-សូវៀត នឹងធ្វើការវះកាត់មាត់ឆែប ក្រអូមឆែបប ពិការត្រចៀក និងពិការមុខមាត់ផ្សេងៗជូនដល់ប្រជាពលរដ្ឋដោយឥតបង់ប្រាក់។
លោកវេជ្ជបណ្ឌិត ម៉ុក ធាវី នាយកគ្រប់គ្រងវេជ្ជសាស្ត្រ នៃអង្គការស្នាមញញឹមកម្ពុជា ៖ “ដំណើរការរហូតមកដល់បច្ចុប្បន្ន យើងបានព្យាបាលបានជាង ៥ពាន់នាក់ហើយ យើងនឹងបន្តវះកាត់បន្តទៀតក្រោមការជួយឧបត្ថម្ភពីសប្បុរសជនទាំងស្រុកនិងក្រៅស្រុក ! យើងសង្ឃឹមថា នឹងមានកិច្ចសហប្រតិបត្តិការថ្មីទៀតជាមួយនឹងអតីតអភិបាលក្រុងហុងកុង (ឯកឧត្តម Leung Chun-Ying) ដែលគាត់បានអញ្ជើញមក យើងនឹទំនាក់ទំនងនៅថ្ងៃខាងមុខទៀត”។
នាយកគ្រប់គ្រងវេជ្ជសាស្ត្រនៃអង្គការស្នាមញញឹមកម្ពុជា ក៏អំពាវនាវដល់ប្រជាពលរដ្ឋកម្ពុជា មាតាបិតា អាណាព្យាបាលដែលមានកូនមានបញ្ហាឆែបមាត់ អាចមកពិគ្រោះនិងព្យាបាលបញ្ហាទាំងនេះបាន នៅមន្ទីរពេទ្យមិត្តភាពខ្មែរ-សូវៀត ឬទាក់ទងទៅអង្គការស្នាមញញឹមកម្ពុជា។
សូមជម្រាបថា ចាប់តាំងពីឆ្នាំ២០០២មក អង្គការស្នាមញញឹមកុមារកម្ពុជា បានជួយវះកាត់ និងព្យាបាលកុមារកម្ពុជា ដែលមានបញ្ហាមាត់ឆែប និងក្រអូមមាត់ ឲ្យជាសះស្បើយជាច្រើននាក់មាននៅរាជធានីភ្នំពេញ និងតាមបណ្ដាខេត្តមួយចំនួន។ វេជ្ជបណ្ឌិតជំនាញបានបញ្ជាក់ថា កុមារដែលមានបញ្ហាមាត់ឆែប ក្រអូមឆែប ពិការត្រចៀក និងពិការមុខមាត់ អាចព្យាបាលជាសះស្បើយ ប្រសិនបើម្តាយឪពុក ឬអាណាព្យាបាលកុមារប្រញាប់ព្យាបាលទាន់ពេលវេលា។
យោងតាមការគូសបញ្ជាក់ពីនាយកគ្រប់គ្រងវេជ្ជសាស្ត្រ នៃអង្គការស្នាមញញឹមកម្ពុជាកាលពីគ្រាមុន បានបង្ហាញថាក្នុងចំណោមទារកនៅលើពិភពលោកចំនួនមួយពាន់នាក់ មានម្នាក់ដែលកើតជំងឺឆែបមាត់ និងឆែបក្រអូម។ ដោយឡែក សម្រាប់ប្រទេសកំពុងអភិវឌ្ឍន៍ របាយការណ៍បានរកឃើញថា ទារកពី៥០០នាក់ ទៅ៧០០នាក់ មានម្នាក់កើតជំងឺនេះ ហើយកម្ពុជាក្នុងចំណោមទារក ៥០០ ទៅ៦០០នាក់ ក៏មានម្នាក់មានបញ្ហាឆែបមាត់ និងក្រអូមនេះដែរ។
តាមការស្រាវជ្រាវបង្ហាញថា កត្តាដែលនាំឱ្យបានបញ្ហាឆែបមាត់ និងក្រអូមនេះ គឺបណ្តាលមកពីការហូបចំណីអាហារមិនល្អ និងការលេបថ្នាំមួយចំនួន ដែលរាំងស្ទះដល់ការលូតលាស់ដល់ទារកនៅក្នុងផ្ទៃ និងមួយចំនួនទៀត គឺកង្វះវីតាមីន បេ៩៕
