ភ្នំពេញ៖ សម្ដេច ហ៊ុន សែន ប្រកាសហៅឱ្យលោក លឺ ឡាយស្រេង អាចចូលមកកម្ពុជាវិញ ដោយភ្ជាប់ជាមួយលក្ខខ័ណ្ឌមួយចំនួន ហើយអាជ្ញាធរមិនចាប់ខ្លួនឡើយ ។ ការថ្លែងនេះក្រោយពេលដែលលោក លឺ ឡាយស្រេង ស្នើសុំសម្ដេច ហ៊ុន សែន ចូលមកប្រទេសកំណើតខ្លួនវិញ ។
រាយការណ៍ដោយ លោក សោម លាភ
អតីតឧបនាយករដ្ឋមន្ត្រី លោក លឺ ឡាយស្រេងកាលពីពេលថ្មីៗនេះ បានបង្ហាញនូវការនឹករលឹកកម្ពុជាដែលជាស្រុកកំណើតរបស់ខ្លួន ហើយសុំសម្ដេច ហ៊ុន សែន អនុញ្ញាតឱ្យខ្លួនអាចវិលចូលកម្ពុជាវិញ ។
លោក លឺ ឡាយស្រេង ថ្លែងតាមរយៈគណនីហ្វេសប៊ុករបស់ខ្លួនកាលពីថ្ងៃព្រហស្បតិ៍ថា លោកនឹកស្រុក ហើយចង់វិលមកវិញឆាប់ៗនេះ ។
លោកបានរៀបរាប់អំពីប្រវត្តិតស៊ូជាមួយនឹងរាជរដ្ឋាភិបាលជាច្រើនអាណត្តិកន្លងទៅ ។
មកដល់ថ្ងៃនេះ គឺថ្ងៃទី ០១ មេសា ឆ្នាំ ២០១៩ សម្ដេច ហ៊ុន សែន បានប្រកាសដោយបើកចំហសេរីភាពឱ្យលោក លឺ ឡាយស្រេង អាចចូលមកកម្ពុជាវិញបាន ដោយពុំមានអាជ្ញាធរចាប់ខ្លួននោះទេ ។
ការប្រកាសបែបនេះរបស់សម្ដេច ហ៊ុន សែន ធ្វើឡើងក្នុងពិធីប្រគល់សញ្ញាបត្រដល់និស្សិត នៃវិទ្យាស្ថានវ៉ាន់ដា នៅកោះពេជ្រ ។
នាយករដ្ឋមន្ត្រីកម្ពុជា បាន ហៅ លោក លឺឡាយ ស្រេង ដែលកំពុងរស់នៅក្នុងប្រទេសថៃ អោយវិលត្រឡប់មកប្រទេសកម្ពុជាវិញដោយគ្មានការភ័យខ្លាចអ្វីឡើយ ។
សម្តេច បានប្រកាសជាសាធារណៈថានឹងគ្មានការចោទប្រកាន់ទៅលើរូប លោក លឺ ឡាយស្រេង ទេ ហើយបានប្រាប់ទៅអាជ្ញាធរ និងសមត្ថកិច្ចកុំអោយចាប់ចងរូបគាត់ទៀតផង។
តែយ៉ាងណា សម្ដេចថាការចូលមកកម្ពុជារបស់លោក លឺ ឡាយស្រេង ធ្វើទៅបានលុះត្រាបញ្ឈប់ការប្រមាថ រួមទាំងមិនធ្វើជាព្រឹទ្ធាចារ្យនយោបាយជាដើម ។
លោក លឺ ឡាយស្រេង ត្រូវបានកាត់ទោសពីបទបរិហារកេរ្តិ៍លោក ហ៊ុន សែន និងប្រមាថព្រះជេស្តាព្រះមហាក្សត្រ ។
យ៉ាងណា តុលាការបានសម្រេចពិន័យពីលោក លឺ ឡាយស្រេង ចូលជាថវិកាជាតិចំនួន៨លានរៀល និងសំណងជំងឺចិត្ត៥០០លានរៀល ពីបទជេរប្រមាថជាសាធារណៈ ដែលមានចែងក្នុងមាត្រា ៣០៥នៃក្រមព្រហ្មទណ្ឌឆ្នាំ ២០០៩ ។
ការប្ដឹង និងចោទប្រកាន់លោក លឺ ឡាយស្រេង គឺផ្អែកលើសំឡេងនៃការសន្ទនាតាមទូរស័ព្ទឯកជនរបស់អតីតឧបនាយករដ្ឋមន្ត្រីកម្ពុជារូបនេះ ត្រូវបានគេលួចថត ហើយបង្ហោះជាសាធារណៈតាមរយៈទំព័រហ្វេសប៊ុកឈ្មោះ «សីហា» ។
ក្នុងខ្សែអាត់សំឡេងនោះ លោក លឺ ឡាយស្រេង បានលើកឡើងពីគម្រោងដែលគណបក្សហ៊្វុនស៊ិនប៉ិច ត្រៀមទទួលយកអាសនៈរបស់គណបក្សសង្គ្រោះជាតិ ដែលប្រឈមនឹងការរំលាយនាពេលនោះ និងថាសម្ដេច ហ៊ុន សែន ឲ្យលុយទៅមន្ត្រីគណបក្សហ៊្វុនស៊ិនប៉ិចម្នាក់២ម៉ឺនដុល្លារសហរដ្ឋអាមេរិក ។
ក្នុងសំឡេងនោះ លោកក៏បានចំអកដាក់ព្រះបាទនរោត្តមសីហមុនី ពាក់ព័ន្ធនឹងស្ថានភាពនយោបាយកម្ពុជានាពេលនោះផងដែរ។
ច្បាប់រដ្ឋធម្មនុញ្ញកម្ពុជាឆ្នាំ ១៩៩៣ មាត្រា ៣៣ ចែងថា «ប្រជាពលរដ្ឋខ្មែរមិនអាចត្រូវបានដកសញ្ជាតិ និរទេស ឬ ចាប់បញ្ជូនខ្លួនទៅឱ្យប្រទេសក្រៅណាមួយឡើយ លើកលែងតែមានកិច្ចព្រមព្រៀងជាមួយគ្នាទៅវិញទៅមក»។
ជាងនេះ មាត្រា ៤០ នៃច្បាប់ដដែលចែងថា «សេរីភាពក្នុងការដើរឆ្ងាយ ជិត និង តាំងទីលំនៅក្នុងស្ថានភាពស្របច្បាប់របស់ប្រជាពលរដ្ឋត្រូវបានគោរព ។ ប្រជាពលរដ្ឋខ្មែរ អាចចេញទៅតាំងទីលំនៅនៅប្រទេសក្រៅ ឬ វិលត្រឡប់មកវិញបាន។
ការរក្សាសិទ្ធិមិនឲ្យរំលោភលើលំនៅឋាន និងអាថ៌កំបាំងនៃការឆ្លើយឆ្លងតាមលិខិត តាមសារទូរលេខ ទូរពុម្ព ទូរគមន៍ និងតាមទូរស័ព្ទ ត្រូវបានធានា»។
អត្តបទដោយ៖ សោម លាភ
