លោក កឹម សុខា អតីតប្រធានគណបក្សសង្គ្រោះជាតិគិតមកដល់ថ្ងៃទី៤មិនានេះ លោកបានជាប់ឃុំខ្លួនក្រោមអំណាចរបស់តុលាការគឺ១៨ខែមួយថ្ងៃហើយ។ យោងតាមក្រមនីតិវិធីព្រហ្មទណ្ឌការឃុំខ្លួនមនុស្សអាចប្រព្រឹត្តបាន១៨ខែប៉ុណ្ណោះ បើពុំនោះត្រូវដោះលែងជាបន្ទាន់។ចំពោះលោកកឹមសុខាមកដល់ពេលនេះពុំមានសេចក្ដីសម្រេចថ្មីណាមួយទៀតពីតុលាការត្រូវបានផ្សព្វផ្សាយជាសាធារណៈថាតើត្រូវបន្ដឃុំខ្លួនឬ បើកជំនុំជម្រះក្ដីនោះទេ ។សម្ដេចហ៊ុនសែន ប្រកាសថាមកដល់ថ្ងៃនេះពុំមានអ្នកនយោបាយណាត្រូវបានលើកលែងទោសឡើយ។អ្នកច្បាប់ម្នាក់ពន្យល់ថាបើពុំដោះលែងជនត្រូវចោទត្រូវតែជំនុំជម្រះក្ដីជាបន្ទាន់។
កញ្ញា ហេង នីទី រាយការណ៍៖
សម្ដេចនាយករដ្ឋមន្ត្រី ហ៊ុន សែន បានប្រកាសជាសាធារណៈនៅថ្ងៃនេះថា សម្ដេចនឹងមិនលើកលែងទោសដល់ជនណាឡើយ (លោក កឹម សុខា) ខណៈមេដឹកនាំបក្សប្រឆាំងរូបនេះ ត្រូវបានចាប់ដាក់ឃុំទាំងនៅពន្ធនាគារ និងនៅក្នុងផ្ទះអស់រយៈពេល ១៨ខែគត់។
សម្ដេចហ៊ុន សែន ពុំបានលើកចំឈ្មោះអ្នក នយោបាយរូបណានោះឡើយ ប៉ុន្តែ លោកថ្លែងបែបនេះគឺតែមួយថ្ងៃប៉ុណ្ណោះក្រោយពីការឃុំខ្លួនមេដឹកនាំគណបក្សសង្គ្រោះជាតិ លោក កឹម សុខា បានដល់១៨ខែគត់ គិតត្រឹមម៉ោង១២យប់ថ្ងៃម្សិលមិញទី៣មីនា។
សម្ដេចហ៊ុន សែន បានប្រកាសបែបនេះក្នុងកម្មវីធី បើកការដ្ឋានសាងសង់សំណង់ការពារទឹកជំនន់ និងកែលម្អប្រព័ន្ធប្រឡាយ-លូ នៅរាជធានីភ្នំពេញ នៅព្រឹកថ្ងៃនេះ។
អ្នកច្បាប់ម្នាក់ គឺលោកមេធាវីហុងគឹមសួន បានពន្យល់ថា ការឃុំខ្លួនបណ្ដោះអាន្នអាចប្រព្រឹត្តទៅ៦ខែដំបូង ហើយបន្ត ៦ម្ដង និង៦ខែម្ដងទៀត ជាដំណាក់ទី៣។ តែលោកថា ចៅក្រមស៊ើបសួរត្រូវ បញ្ចប់នីតិឃុំខ្លួន ជនត្រូវចោទជាបន្ទាន់ បើឈានដល់ថ្ងៃចុងក្រោយ រយៈពេល១៨ខែនៃការឃុំខ្លួនបណ្ដោះអាសន្ន ។ មួយវិញទៀតត្រូវស្វែងរកនីតិវីធីថ្មីទៅកាន់ចៅក្រមជំរុំជម្រះដើម្បីបើកសំណុំរឿងកាត់ក្ដីតែម្ដងបើពុំនោះទេ ត្រូវដោះលែងជនត្រូវចោទនេះ។ លោកថានេះបើយោងតាមច្បាប់ព្រហ្មទណ្ឌ។
សូមស្ដាប់ការពន្យល់របស់លោកមេធាវី ហុង គឹមសួន៖
នៅពេលសួរអំពី ករណីលោកកឹមសុខា លោកមេធាវី និយាយថាលោកបកស្រាយរឿងនេះទេ។ កាលពីថ្ងៃម្សលមិញ អតីតគណ បក្សសង្រ្គោះជាតិបានចេញសេចក្ដីថ្លែងការណ៍ មួយជាបន្ទាន់ដោយទទូចឱ្យរដ្ឋាភិបាល និងតុលាការដោះលែងលោកកឹមសុខាជាបន្ទាន់ដោយគ្មានលក្ខខណ្ឌ ដោយបក្សនេះចាត់ទុកថាជារឿងនយោបាយ ហើយការឃុំខ្លួននេះបានដល់ថ្ងៃចុងកក្រោយហើយនៃរយៈពេល១៨ខែ ដែលតាមច្បាប់អស់ឱកាសឃុំខ្លួនជនត្រូវចោទនេះហើយ ។
យ៉ាងណាងក៏ដោយ លោកស្រីមេងសុធារី មេធាវីការពារក្ដីលោកកឹមសុខា បានបដិសេធ នឹងការសុំសួរថាតើក្រុមមេធាវីមានបានទទួលដីកាអ្វីទៀតទេ ទាក់ទិនលោកកឹមសុខា។
លោកកឹមសុខាត្រូវបានចាប់ខ្លួនទាំងកណ្ដាលយបថ្ងៃទី៤ កញ្ញា ឆ្នាំ២០១៧ ក្រោមបទក្បត់ជាតិ ដែលបក្សកាន់អំណាចចោទថាលោកចង់ផ្ដួលរំលំរដ្ឋាភិបាល ដែលបរទេស(អាមេរិក)នៅពីក្រោយ។ ករណីនេះ មន្ត្រីទូតអាមេរិកថាខ្លួនមានសិទិ្ធចូលពាក់ព័ន្ធព្រោះខ្លួនជាសមាជិកមួយនៃកិច្ចព្រមព្រៀងសន្តិភាពក្រុងប៉ារីស២៣តុលា១៩៩១៕
