ភ្នំពេញ៖ សម្ដេច ហ៊ុន សែន បញ្ជាក់ថា អាណត្តិនេះជាអាណត្តិមួយដែលរាជរដ្ឋាភិបាលកម្ពុជា កំណែទម្រង់ស៊ីជម្រៅបំផុតដើម្បីបម្រើសេចក្ដីត្រូវការរបស់ពលរដ្ឋដែលជាម្ចាស់ឆ្នោត ។ អ្នកតាមដានសង្គមចង់ឃើញមានវិធានការយូរអង្វែងមួយពីរាជរដ្ឋាភិបាល មិនចង់ឃើញវប្បធម៌និទណ្ឌភាព ហើយសមាជិកសង្គមទទួលបានផលប្រយោជន៍ស្មើៗគ្នា ។
លោក សោម លាភ ជូនសេចក្ដីរាយការណ៍
បើតាមការចុះផ្សាយលើទំព័រហ្វេសបុករបស់សម្ដេច ហ៊ុន សែន នៅថ្ងៃទី ០១ ខែ មីនា ការបង្ហាញនូវជំហរអនុត្តន៍តាមអភិក្រមទាំង៥ ម្ដងទៀតនេះ គឺធ្វើឡើងក្រោយពេលដែលមានការដកដំណែងមន្ត្រីអាជ្ញាធរមួយចំនួន ។
សម្ដេចបញ្ជាក់ថា មន្ត្រីរាជការ កងកម្លាំងប្រដាប់អាវុធ នឹងទទួលការដកដំណែង ឬផ្ដន្ទាទោសតាមច្បាប់ ចំពោះអ្នកណាដែលរំខានដល់ពលរដ្ឋ ។
នាយករដ្ឋមន្ត្រីកម្ពុជាថា ខ្លួនបានដើមកដល់ដំណាក់កាលនៃការអនុវត្តន៍អភិក្រមទី៥ ហើយដំណាក់កាលនេះជាការវះកាត់ ។
សម្ដេចថា សម្ដេច ចង់ឱ្យមានការអភិវឌ្ឍទៅមុខឱ្យលឿនជាទីបំផុត ដោយគ្មានការរំខានពីមន្ត្រីដែលស៊ីប្រាក់ខែរដ្ឋបានមកពីការបង់ពន្ធពីពលរដ្ឋឡើយ ។
គួររំលឹកថា អភិក្រមទាំង ៥ មានដូចជា ១-ឆ្លុះកញ្ចក់, ២-ងូតទឹក ៣-ដុសក្អែល, ៤-ព្យាបាល និង ៥-វះកាត់ ។
ចូលដល់ដើមឆ្នាំ ២០១៩ នេះ គេសង្កេតឃើញថា ថ្នាក់ដឹកនាំកម្ពុជា ក្រសួង ស្ថាប័មានឬស្ថាប័នពាក់ព័ន្ធ បានចាត់វិធានការក្ដៅចំពោះអំពើអសកម្ម អំពើមិនប្រក្រតី និងអំពើបង្កចលាចលក្នុងសង្គមផ្សេងៗ ។
នៅថ្ងៃទី១ មីនា ឆ្នាំ ២០១៩ នេះ នាយករដ្ឋមន្ត្រីកម្ពុជា បានចេញអនុក្រិត្យ ស្ដីពីការបញ្ចប់មុខដំណែងមន្ត្រីរាជការចំនួន ពីររូបផងដែរ ។ តួយ៉ាងអ្នកទាំងពីរនាក់នោះ គឺអភិបាលរងនៃគណៈអភិបាលខេត្តព្រះសីហនុលោក ស្រ៊ុន ស្រ៊ន់ ឋានន្តរស័ក្ដិមន្ត្រីថ្នាក់លេខ ៣ និងលោក ឆៃ ប៊ុនវណ្ណៈ ឋានន្តរស័ក្ដិមន្ត្រីថ្នាក់លេខ ៥ ។
សម្ដេច សរសេរលើទំព័រហ្វេសបុកថា «ថ្ងៃនេះខ្ញុំបង្ខំចិត្តអនុវត្តន៍អភិក្រមទី៥គឺការវះកាត់ដោយដកអភិបាលរងខេត្តព្រះសីហនុពីររូបចេញពីតំណែង» ។
ក្នុងទំព័រហ្វេសបុករបស់លោក សុខសុវណ្ណវឌ្ឍនាសារពង្ស ប្រធានគណបក្សខ្មែរក្រោក បានសរសេរថា ក្រៅពីសម្ដេច ហ៊ុន សែន ដកដំណែងអភិរងខេត្តព្រះសីហនុរួចមក សម្ដេចក៏បានប្រគល់ការងារបន្តទៅអង្គភាពប្រឆាំងអំពើពុករលួយដើម្បីអនុវត្តន៍ច្បាប់លើបុគ្គលទាំង២នេះ ហើយមេយោធាខេត្តដដែលនេះក៏កំពុងប្រឈមនិងការបាត់បង់ដំណែងដូចគ្នាដែរ ។
មុនការចេញអនុក្រិត្យស្ដីពីការដកដំណែងនេះ មានការបញ្ជាក់ពីសមាជិកនៃឧត្តមក្រុមប្រឹក្សាពិគ្រោះ និងផ្ដល់យោបល់ ថាមានការលើកឡើងអំពីទំនាស់ដីធ្លីដែលកើតមានឡើងនៅក្រុងព្រះសីហនុ ដែលបណ្ដាលមានការប្រើអំពើហិង្សារពីសំណាក់មន្ត្រីកងកម្លាំងប្រដាប់អាវុធ ។
លោក ផៃប៊ុន វណ្ណៈ បានដឹកនាំកម្លាំងចម្រុះ ៣០០នាក់ រាប់ទាំងកម្លាំងយោធា ចុះទៅអនុវត្តសាលដីកាក្នុងជម្លោះដីធ្លីនៅ ឃុំបិតទ្រាំង ស្រុកព្រៃនប់ ដើម្បីវាស់វែងដីឲ្យអ្នកស្រី ហុង សួន ភរិយារបស់លោក ស៊ីវ គង់ទ្រីវ ។ ហើយនេះជាការចុះអនុវត្តសាលដីកា ធ្វើឲ្យពលរដ្ឋរាប់រយនាក់តវ៉ា ដុតកង់ឡាននិងបិទផ្លូវ ហើយក៏មានហិង្សាបណ្តាលពលរដ្ឋម្នាក់រងរបួសដោយគ្រាប់កាំភ្លើង ។
សម្ដេច ស ខេង ក៏ធ្លាប់មានប្រសាសន៍ដែរថា ការអនុវត្តដីកាតុលារការដោយកងកម្លាំងប្រដាប់អាវុធនេះ គឺមិនត្រឹមត្រូវតាមច្បាប់នោះទេ ។
សម្ដេច ស ខេង រដ្ឋមន្រ្តីក្រសួងមហាផ្ទៃ មកដល់ថ្ងៃទី ១ មីនានេះ បានព្រមានដល់បុគ្គលទាំងឡាយណា ដែលពាក់ព័ន្ធក្នុងកិច្ចអន្តរាគមន៍រឿងទំនាស់ដីធ្លីនៅខេត្តព្រះសីហនុ ត្រូវដកខ្លួនចេញជាបន្ទាន់ ។
សម្ដេច ស ខេង បញ្ជាក់ថា កិច្ចការនេះ គឺទុកឱកាសឱ្យរដ្ឋបាលខេត្តនេះជាអ្នកដោះស្រាយតាមនីតិវិធីច្បាប់ ។
រដ្ឋមន្ត្រីក្រសួងមហាផ្ទៃ អំពាវនាវមន្ត្រីអនុវត្តច្បាប់ ការពារដីរដ្ឋឲ្យបានល្អ ទប់ស្កាត់ការចូលទន្ទ្រានដីរដ្ឋដោយ ខុសច្បាប់ បង្កើនការដោះស្រាយទំនាស់ដីធ្លីកុំឲ្យកើតថ្មី រួមទាំងលើកកំពស់សមត្ថភាពមន្ត្រីជាដើម ។
សម្ដេចទៀ បាញ់ រដ្ឋមន្ត្រីក្រសួងការពារជាតិ ក៏បានចេញបទបញ្ជាដាច់ខាត មិនឱ្យមេបញ្ជាការគ្រប់ជាន់ថ្នាក់ បញ្ជាការកងទ័ព ចូលរួមសកម្មភាពទំនាស់ដីធ្លី របស់ប្រជាពលរដ្ឋនោះឡើយ ព្រោះមិនស្របតាមច្បាប់លក្ខន្តិកៈ របស់កងយោធពលខេមរភូមិន្ទ ។
ថ្មីៗនេះ ក៏មានការដកដំណែង មេបញ្ជាការកងរាជអាវុធហត្ថខេត្តរតនគិរីមួយរូប គឺលោក គឹម រស្មី ក្រោយពេលមានវីដេអូដែលលោក ចែកលុយឱ្យកូនរបស់ខ្លួនក្នុងម្នាក់ៗ ១០ ម៉ឺនដុល្លារ ។ យ៉ាងណា ព្រះមហាក្សត្រ ឡាយព្រះហស្ថលេខាត្រាស់បង្គាប់លុបឈ្មោះចេញពីកងយោធពលខេមរភូមិន្ទ ។
អង្គភាពប្រឆាំងអំពើពុករលួយក៏បានបញ្ចប់ការស៊ើបអង្កេតលើទ្រព្យសម្បត្តិរបស់លោកដែរ តែមិនទាន់មានព័ត៌មានយ៉ាងណានោះទេ ។
យ៉ាងណា អង្គភាពប្រឆាំងអំពើពុករលួយ ក៏កំពុងស៊ើបអង្កេតទ្រព្យសម្បត្តិ និងបំណុលរបស់ស្នងការរងខេត្តកណ្ដាលម្នាក់ គឺលោក ស្រេង សុខា ឋានៈឧត្ដមសេនីយ៍ត្រី ផ្កាយ១ ។
ចំណាត់ការរបស់អង្គភាពប្រឆាំងអំពើពុករលួយនេះ ធ្វើឡើង ក្រោយមានការរិះគន់ ពីអ្នកប្រើប្រាស់បណ្ដាញសង្គមហ្វេសប៊ុក ករណីលោក ស្រេង សុខា បានជូនថ្លៃបណ្ដាការ ១០ម៉ឺនដុល្លារ និងរថយន្តមួយគ្រឿង ទៅខាងស្រីក្នុងថ្ងៃភ្ជាប់ពាក្យ ។
សម្ដេច ហ៊ុន សែន តែងតែបញ្ជាក់ថា ការវះកាត់នេះ គឺជាការវះកាត់ដែលមានការឈឺចាប់ជាខ្លាំង ។
លោក សន ជ័យ នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជា ប្រាប់មណ្ឌលព័ត៌មានស្ត្រីកម្ពុជានៅថ្ងៃទី ១ មីនានេះថា ប្រសិនបើសាច់នោះស្អុយហើយ បើទុកបន្តបណ្ដាលឱ្យមហារីក ឬរកឃើញថាមន្ត្រីដែលទុកបន្តនឹងបង្ករភាពអយុត្តិធម៌ដល់សង្គម យកអំណាច និងតួនាទីទៅធ្វើបាប និងប៉ះពាល់ដល់ពលរដ្ឋម្ចាស់ឆ្នោត និងពលរដ្ឋទូទៅ នោះការដកដំណែងឬការវះកាត់នោះ មិនគួរណាមានភាពឈឺចាប់ឡើយ ។
លោក សន ជ័យថា ជាទូទៅវិធានការរបស់រាជរដ្ឋាភិបាលកម្ពុជាជាវិធានការភ្លើងចំបើង ។ លោកថា ត្រូវមានការរកមធ្យោបាយដើម្បីឱ្យមានការកម្រិតឥរិយាបទ និងទង្វើរបស់មន្ត្រីទាំងអស់ ។ លោកថា គ្រប់គ្នាមិនចង់ឃើញមន្ត្រីធ្វើអំពើមិនល្អ មានឱកាសបន្តទង្វើបែបនេះទៀតទេ ។
លោកថា មានបញ្ហាជាច្រើនដែលគួរតែដោះស្រាយជាមុន ដើម្បីកុំឱមានបញ្ហានៅថ្ងៃក្រោយ ។
នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជាបន្ថែមថា ត្រូវតែមានការរួមគ្នាដើម្បីកាត់បន្ថយ ឈានទៅដល់លុបបំបាត់វប្បធម៌និទណ្ឌភាព ទើបប្រទេសជាតិអភិវឌ្ឍ និងធ្វើឱ្យសមាជិកសង្គមទទួលបានផលស្មើៗគ្នា ។ លោកថា បញ្ហាធំនោះគឺមន្ត្រីដែលយកច្បាប់ដែលមានលក្ខណៈល្អហើយនោះ មកទ្រាប់អង្គុយ ៕
