មេបក្សប្រឆាំងនៃប្រទេសវេណេហ្សូអេឡា លោកជួនហ្គៃដូ បានប្ដេជ្ញាចិត្តថានឹងវិលចូលប្រទេស វិញដើម្បីដឹកនាំការតវ៉ា ក្នុងការទម្លាក់លោកនីកូឡាស់ម៉ាឌូរ៉ូពីអំណាច ទោះជាលោកដឹងថា លោកនឹងប្រឈមនឹងការចាប់ខ្លួនហើយដាក់អោយជាប់ពន្ធនាគារ៣០ឆ្នាំក៏ដោយ។
ការប្ដេជ្ញារបស់មេបក្សប្រឆាំងវ័យក្មេងរូបនេះ ធ្វើឡើងខណៈលោកស្ថិតនៅក្នុងប្រទេសកូឡំប៊ី ទីដែលលោកបានជួបរដ្ឋមន្ត្រីការបរទេស នៃសម្ព័ន្ធLima 14ប្រទេស ហើយក្នុងនោះអនុប្រធានាធិបតីអាមេរិក Mike Pence បានប្រកាសគាំទ្រលោកហ្គៃដូជាប្រធានាធិបតីបណ្ដោះអាសន្នវេណេហ្សូអេឡា ១០០ភាគរយ។
លោកហ្គៃដូបានតាំងចិត្តដូចនេះថា៖«នៅសប្ដាហ៍នេះ ខ្ញុំនឹងត្រឡប់ទៅវិញ។ តួនាទីនិងភារកិច្ចរបស់ខ្ញុំ គឺនៅក្នុងការ៉ាកាសទៅជា ប្រឈមនឹងគ្រោះថ្នាក់ក្ដី។វត្តមានរបស់ខ្ញុំគឺដើម្បីគាបសង្កត់លោកម៉ាឌូរ៉ូចុះចេញពីតំណែង»។
មេដឹកនាំគណបក្សប្រឆាំង លោក ហ្គៃដូ ដែលបានប្រកាសតែងតាំងខ្លួនឯងជា ប្រធានាធិបតីស្តីទីវេណេស៊ុយអេឡា ត្រូវប្រឈមមុខជាប់ពន្ធនាគាររយៈពេល ៣០ឆ្នាំ បើលោកហ៊ានចូលមកក្នុងប្រទេស វិញ ។នេះបើតាមការចុះផ្សាយរបស់សារព័ត៌មានរុស្ស៊ី RT។
អនុប្រធានតុលាការកំពូលវេណេស៊ុយអេឡា លោក Juan Carlos Valdez បានចោទថា៖«លោកហ្គៃដូបានរំលោភបំពានលើច្បាប់ ហើយអ្វីដែលកើតឡើង នោះគឺលោកបានរត់ចេញទៅក្រៅប្រទេស ដោយគ្មានការអនុញ្ញាតពីអាជ្ញាធរវេណេស៊ុយអេឡា។ ករណីនេះអាជ្ញាធរត្រូវតែចាប់ខ្លួន និងបញ្ជូនលោកទៅកាន់ពន្ធនាគារ ហើយប្រឈមមុខជាប់ពន្ធនាគារ ៣០ឆ្នាំ»។
មេដឹកនាំគណបក្សប្រឆាំង លោក ហ្គៃដូ នៅពេលនេះ បានក្លាយជាប្រមុខរដ្ឋមួយដែលមានប្រទេសជាង៦០បានទទួលស្គាល់លោកជាមេដឹកនាំបណ្ដោះសអាន្ននៃប្រទេសវេណេហ្សូអេឡា ។ បច្ចុប្បន្ន លោកជាប្រធានរដ្ឋសភា។ សហរដ្ឋអាមេរិក បានប្ដេជ្ញាថា នឹងការពារលោកហ្គៃដូ ហើយព្រមានរបបលោកម៉ាឌូរ៉ូបើហ៊ានចាប់ខ្លួន ឬធ្វើអោយបុរសនេះគ្រោះថ្នាក់។
មកដល់ពេលនេះ សហរដ្ឋអាមេរិកបានត្រៀមកងទ័ពរួចហើយដើម្បី ទម្លាក់លោកម៉ាឌូរ៉ូពីអំណាច៕
