ភ្នំពេញ៖ បញ្ហាធំៗមួយចំនួនរាប់ចាប់តាំងពីការបោះបង្គោលព្រំដែន ភាគីកម្ពុជា និងឡាវ បន្តព្រមព្រៀងគ្នាដើម្បីសហការដោះស្រាយ ឈានឱ្យព្រំដែនប្រទេសទាំងពីរជាព្រំដែនសន្តិភាព មិត្តភាព សហប្រតិបត្តិការ និងសេដ្ឋកិច្ច។ ការព្រមព្រៀងនេះធ្វើឡើងនៅក្នុងជំនួបទ្វេភាគីរវាងរដ្ឋមន្រ្តីក្រសួងការបរទេសកម្ពុជា និងឡាវនៅរដ្ឋធានីវៀងចន្ទន៍ ប្រទេសឡាវ កាលពីថ្ងៃទី២១ និង២២កុម្ភៈ។
នេះបើយោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ចុះផ្សាយកាលពីថ្ងៃទី២៣ កុម្ភៈដែលក្រសួងទើបបង្ហោះផ្សាយលើទំព័រហ្វេសប៊ុកផ្លូវការនៅថ្ងៃម្សិលមិញ។
តាមរយៈសេចក្តីប្រកាសព័ត៌មានរបស់ក្រសួងការបរទេសបង្ហាញថា ភាគីទាំងពីរបានពិភាក្សាអំពីការដោះស្រាយបញ្ហាព្រំដែន លើកទឹកចិត្តឱ្យក្រសួងការបរទេសប្រទេសទាំងពីរបញ្ចប់សេចក្តីព្រាងបែបបទបច្ចេកទេស(TOR) ឱ្យបានឆាប់ស្របតាមខ្លឹមសារនៃលិខិតរួមរបស់នាយករដ្ឋមន្រ្តីទាំងពីការពីថ្ងៃទី៦កញ្ញា ឆ្នាំ២០១៧ ដែលបានផ្ញើជូនប្រធានាធិបតីបារាំង។
ភាគីទាំងពីរបានឯកភាពគ្នាលើកកម្ពស់ការយល់ដឹងរបស់ប្រជាពលរដ្ឋរបស់ខ្លួន លើឯកសារព្រំដែនដែលបានព្រមព្រៀងដោយប្រទេសទាំងពីរ ដើម្បីពង្រឹងកិច្ចសហប្រតិបត្តិការលើការងារ អន្តោប្រវេសន៍ខុសច្បាប់ ពាណិជ្ជកម្មខុសច្បាប់ និងការឆ្លងដែនខុសច្បាប់តាមបណ្តោយព្រំដែន។
កិច្ចប្រជុំរវាងរដ្ឋមន្រ្តីការបរទេសកម្ពុជា-ឡាវនេះ ភាគីទាំងពីរក៏បានឯកភាពលើវិស័យមួយចំនួនផងដែរ ក្នុងនោះរួមមាន អប់រំ ព័ត៌មាន កសិកម្ម ទេសចរណ៍វប្បធម៌ សុខភាពសាធារណៈ ប្រៃសណីយ៍ និងទូរគមនាគមន៍ ច្បាប់ កិច្ចសហប្រតិបត្តិការតុលាការ និងកុងស៊ុលជាដើម។
ក្រៅពីពិភាក្សាលើផ្នែកព្រំដែននេះ ភាគីទាំងពីបានឯកភាពគ្នាសម្រួលពាណិជ្ជកម្មទ្វេភាគីបន្ថែមទៀត ដើម្បីបង្កើនការអនុវត្តកិច្ចព្រមព្រៀងស្តីពីការជំរុញ និងការការពារវិនិយោគ ព្រមទាំងបង្កើនបរិយាកាសអំណោយផលដល់អ្នកវិនិយោគិន។ ធ្វើបែបនេះដើម្បីលើកកម្ពស់លំហូរចេញចូលនៃវិនិយោគរវាងប្រទេសទាំងពីរ។
គួររំឭកដែរថា កាលពីខែកុម្ភៈ ឆ្នាំ ២០១៧ យោធាឡាវរាប់រយនាក់បានចូលមកទឹកដីកម្ពុជាក្បែរតំបន់អូរអាឡៃ និងអូរតាង៉ាវស្រុកសៀមប៉ាង ខេត្តស្ទឹងត្រែង ដើម្បីរារាំងកម្លាំងវិស្វកម្មកម្ពុជាមិនឲ្យសង់ផ្លូវតាមក្រវាត់ព្រំដែនក្នុងទឹកដីកម្ពុជា និងបានឈរជើងនៅទីនោះរហូតដល់សម្តេច ហ៊ុន សែន នាយករដ្ឋមន្ត្រីព្រមាន និងបានដាក់ឱសានវាទ ៦ ថ្ងៃឲ្យដកទ័ពចេញពីទឹកដីកម្ពុជា។
កម្ពុជា និងឡាវ មានព្រំដែនជាប់គ្នាប្រវែង ៥៤០ គីឡូម៉ែត្រដែលត្រូវបោះបង្គោលប្រមាណ ១៤៥ ប៉ុន្តែរហូតមកទល់ពេលនេះ ទើបតែបោះបាន ១២១ បង្គោលស្មើនឹង ៨៣ ភាគរយហើយសល់ប្រមាណ ២៤ បង្គោលទៀតនៅក្នុងខេត្តព្រះវិហារ និងខេត្តស្ទឹងត្រែងរបស់កម្ពុជា៕
