ជប៉ុនជាប្រទេស ប្រជាធិបតេយ្យជឿនលឿន ចុងក្រោយគេហើយដែលបាន ប្រកាសទទួលស្គាល់ មេដឹកនាំបក្សប្រឆាំងលោកជួនហ្គាយដូ ជាប្រធានាធិបតី ដោយចាត់ទុកលោកនីកូឡាស់ម៉ាឌូរ៉ូ ជាមេដឹកនាំខុសច្បាប់ព្រោះតែកំចាត់គូប្រកួតមិនអោយចូលរួមបោះឆ្នោត។
ទីភ្នាក់ងារសារព័ត៌មាន AFP បានចុះផ្សាយថា លោករដ្ឋមន្ត្រីការបរទេស Taro Kono បានប្រកាសដូចនេះ កាលពីថ្ងៃទី១៩កុម្ភៈ។
លោកបានប្រកាសដូចនេះថា ៖«ប្រទេសរបស់យើង អំពាវនាវ ឱ្យមានការបោះឆ្នោតឡើងវិញ ដែលប្រកបដោយភាពសេរីនិងត្រឹមត្រូវហើយយើងក៏សូមគាំទ្រលោក ហ្គាយដូជាប្រធានាធិបតី បណ្ដោះអាសន្ន»។
ជំហររបស់រដ្ឋាភិបាលប្រទេសជប៉ុន ធ្វើឡើងចំពេលសហគមន៍អន្តរជាតិ ដែលគាំទ្រ មេបក្សប្រឆាំងជួនហ្គាយដូ បន្តដាក់សម្គាធកាន់តែខ្លាំងអោយលោកម៉ាឌូរ៉ូចុះចេញពីតំណែងហើយស្របពេលអាមេរិក មានផែនការលើកទ័ពទៅផ្ដួលរំលំលោកម៉ាឌូរ៉ូនៅពេលឆាប់ៗនេះ។ គិតមកដល់ពេលនេះ ជាង៦០ប្រទេសបានគាំទ្រលោកហ្គាយដូហើយភាគច្រើនសុទ្ធសឹងជាប្រទេសប្រកាន់លទ្ធិប្រជាធិបតេយ្យ។ ចំណែកលោកម៉ាឌូរ៉ូក៏មានការគាំទ្រច្រើនដែរ តែប្រទេសគាំទ្រលោកសុទ្ធសឹងជាប្រទេស ប្រជាធិបតេយ្យបែបផ្ដាច់ការនិងកុម្មុយនិស្ត។ អ្នកសង្កេតការណ៍ព្រមានថា អាសនៈរបស់វេណេហ្សូអេឡា នឹងផុយស្រួចនៅឯអង្គការសហប្រជាជាតិដោយអាចមានដកហូតទៅអោយមេបក្សប្រឆាំង៕
