ភ្នំពេញ៖ តុលាការក្រុងភ្នំពេញកោះហៅលោក រ៉ុង ឈុនក្នុងនាមជាដើមបណ្ដឹង ឲ្យចូលបំភ្លឺនៅចុងខែកុម្ភៈនេះ ករណីប្ដឹងសុំមោឃភាពសេចក្ដីប្រកាសរបស់ក្រសួងអប់រំដែលបានលុបឈ្មោះគ្រូបង្រៀនជាង១០នាក់ដែលការកោះហៅនេះ ចំពេល លោកសរ៉ុងឈុនកំពុងនៅក្រៅប្រទេស។
ដីកាកោះនេះធ្វើឡើងថ្ងៃទី៨ ខែកុម្ភៈ ដោយចៅក្រមសាលាដំបូងរាជធានីភ្នំពេញ លោក រស់ ពិសិដ្ឋ ដោយបានកោះហៅលោក រ៉ុង ឈុន ឲ្យចូលឆ្លើយបំភ្លឺនាថ្ងៃទី២៧ ខែកុម្ភៈ ឆ្នាំ២០១៩ វេលាម៉ោង៩ព្រឹក។
ដីការបស់លោកចៅក្រមបានព្ជាក់ថា៖ «ចំពោះសាម៉ីភាគី បើពុំចូលខ្លួននោះ តុលាការអាចទទួលស្គាល់ថា សេចក្ដីអះអាងអំពីចំណុចសាកសួររបស់ភាគីម្ខាងទៀតជាការពិតបាន»។
កាលពីថ្ងៃទី១៦ ខែមករា លោករ៉ុង ឈុន រួមជាមួយអតីតគ្រូបង្រៀន១០នាក់ផ្សេងទៀតបានដាក់ពាក្យប្ដឹងដោយប្ដឹងរដ្ឋមន្ត្រីក្រសួងអប់រំ លោក ហង់ ជួនណារ៉ុន ករណីលុបឈ្មោះគ្រូបង្រៀន ដែលលោកថា ជាការរំលោភសហលក្ខខន្តិកៈមន្ត្រីរាជការ។ លោកបានស្នើឱ្យតុលាការបដិសេធសេចក្ដីប្រកាសរបស់ក្រសួងអប់រំកាលពីថ្ងៃទី៣០ ខែមករា ឆ្នាំ២០១៨ និងផ្ដល់ក្របខណ្ឌជាគ្រូបង្រៀន ដល់ពួកគេវិញ។
រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន បានសម្រេចលុបឈ្មោះគ្រូបង្រៀន និងបុគ្គលិកអប់រំចំនួន១១នាក់ ដែលជាអតីតមន្ត្រីជាប់ឆ្នោត និងមន្ត្រី គ.ជ.ប កូតា មកពីបក្សប្រឆាំង ចេញពីក្របខ័ណ្ឌក្រសួងអប់រំ កាលពីដើមឆ្នាំ២០១៨ ក្រោមហេតុផលថាគ្រូបង្រៀនទាំងនោះអវត្តមានពីការងារដោយគ្មានច្បាប់អនុញ្ញាតត្រឹមត្រូវ។
ក្រោយការលុបឈ្មោះចេញពីក្របខ័ណ្ឌរដ្ឋ ក្រុមគ្រូបង្រៀនទាំងនោះបានដាក់លិខិតអន្តរាគមន៍ជាច្រើនទៅក្រសួងអប់រំ ទៅលោកនាយករដ្ឋមន្ត្រី និងទៅសហគមន៍អន្តរជាតិប៉ុន្តែរហូតមកដល់ពេលនេះ ពុំមានដំណោះស្រាយអ្វីឡើយ។
ប្រព័ន្ធតុលាការកម្ពុជា ត្រូវបានមជ្ឈដ្ឋានមួយចំនួន មើលឃើញថា នៅមិនទាន់ប្រកាន់បាននូវភាពអព្យាក្រឹត្យ និងឯករាជ្យបានឡើយ ៕
