ភ្នំពេញ ៖ សត្វស្លាបបានកើនឡើងពីមួយឆ្នាំ ទៅមួយឆ្នាំជាលំដាប់។ ប្រធានមន្ទីរបរិស្ថានខេត្ដបាត់ដំបង បញ្ជាក់ថា ក្រោយពីរាជរដ្ឋាភិបាលបានអនុវត្ដច្បាប់តឹងរ៉ឹង ហើយទប់ស្កាត់បទល្មើសនេសាទ និងការបរបាញ់សត្វព្រៃ បានធ្វើឲ្យចំនួនសត្វស្លាបនៅតំបន់អភិរក្សព្រែកទាល់មានចំនួនកើនឡើង។
ចំនួនបក្សីកម្រជាង ១០០ប្រភេទ បានទៅបង្ហាញសម្រស់នៅតំបន់អភិរក្សព្រែកទាល់ ដែលជាដែនទេសភាពនៅកណ្ដាលបឹងទន្លេសាបដ៏ស្រស់ត្រកាល ស្ថិតនៅព្រំប្រទល់ទឹករវាងខេត្ដបាត់ដំបង និងខេត្ដសៀមរាម។ ការកើនឡើង នៃចំនួនបក្សីកម្រជាច្រើនប្រភេទនេះ ប្រធានមន្ទីររិស្ថានខេត្ដបាត់ដំបង បញ្ជាក់ថា គឺកើតចេពញពីការខិតខំរបស់អាជ្ញាធរ ក្នុងការបង្ក្រាបបទល្មើសផ្សេងៗនៅតំបន់នោះ។
លោក កប បូរ៉ាន់ ប្រធានមន្ទីរបរិស្ថានខេត្ដបាត់ដំបង មានប្រសាសន៍ប្រាប់វិទ្យុស្ដ្រីថា ចំនួនសត្វស្លាបនៅតំបន់អភិរក្សព្រែកទាល់ ខេត្ដបាត់ដំបង ក្នុងឆ្នាំ២០១៨នេះ មានកើនឡើងប្រមាណ ២០ភាគរយ។ ការសន្និដ្ឋាននេះ គឺផ្អែកទៅការរាប់ចំនួនសំបុកពងកូនរបស់សត្វស្លាបដែលអាស្រ័យនៅតំបន់នេះ និងការសង្កេតមើលជាក់ស្ដែងពីចំនួនបក្សី ដែលបង្ហាញខ្លួនជាប្រចាំ។
ប្រធានមន្ទីរបរិស្ថានបន្ដថា ចំពោះមូលហេតុដែលនាំឲ្យចំនួនសត្វស្លាបនៅតំបន់អភិរក្សព្រែកទាល់មានការកើនឡើង គឺដោយសារតែការអនុវត្ដច្បាប់របស់អាជ្ញាធរបានតឹងរ៉ឹង ទប់ស្កាត់ការនេសាទខុសច្បាប់ ចុះល្បាតជាប្រចាំ និងចុះអប់រំពលរដ្ឋឲ្យបានយល់ពីសារសំខាន់របស់សត្វព្រៃ ៖«យើងបានធ្វើការអនុវត្ដច្បាប់ដ៏តឹងរ៉ឹង យើងមានការចាប់យកមកប្រគល់ឲ្យតុលាការ ហើយអញ្ចឹងទៅវាមិនមានអ្នកទៅរុកគួនរំខានចាប់វាសម្លាប់វាបរបាញ់វា»។
ជាងនេះកត្ដាទឹកធំ នៅឆ្នាំនេះ ក៏ជាមូលហេតុរួមផ្សំមួយផងដែរ ដែលធ្វើឲ្យចំណីមានការកើនឡើង ទាក់ទាញសត្វស្លាបឲ្យមកប្រមូលផ្ដុំគ្នានៅតំបន់អភិរក្សព្រែកទាល់នេះ។ លោក កប បូរ៉ាន់ បញ្ជាក់ថា នៅព្រែកទាល់ គឺមានសត្វស្លាប់ប្រមាណជាង ១០០ប្រភេទ ដែលសុទ្ធសឹងតែជាពពួកសត្វស្លាបកម្រ ហើយបក្សីខ្លះគឺមានវត្ដមានតែនៅកម្ពុជាប៉ុណ្ណោះ ៖«មានជាង ១០០ប្រភេទ មានសត្វ ស្មោញ សត្វក្អែកទឹក សត្វទុង សត្វកុក។ បើនិយាយទៅសត្វកម្រៗ ដែលបាត់បង់នៅក្នុងពិភពលោកយើងនេះ គឺមានសល់នៅកន្លែងយើងច្រើន បើប្រៀបធៀបទៅនឹងប្រទេសដទៃ មិនមានប្រទេសណាមាន គឺមានការប្រមូលផ្ដុំនៅយើងហ្មង»។
ប្រធានមន្ទីរបរិស្ថានបន្ថែមថា ការកើនឡើងនៃចំនួនសត្វស្លាបនេះ បានធ្វើឲ្យមានភ្ញៀវទេសចរណ៍ទៅទស្សនាតំបន់កាន់តែច្រើនឡើង ហើយធ្វើឲ្យប្រជាពលរដ្ឋនៅតំបន់នេះអាចរកចំណូលបានជាប្រចាំ។ លោកបន្ថែមថា ជាផែនការបន្ដ អាជ្ញាធរ នឹងបង្កើនការផ្សព្វផ្សាយ ពីតំបន់អភិរក្សនេះ និងធ្វើយ៉ាងណាទប់ស្កាត់បទល្មើសនេសាទ ក៏ដូចជា ការបរបាញ់សត្វព្រៃនៅតំបន់នេះឲ្យកាន់តែខ្លាំងក្លាបន្ថែមទៀត។
លោក កប បូរ៉ាន់ អំពាវនាវដល់ប្រជាពលរដ្ឋទាំងនៅតំបន់អភិរក្សព្រែកទាល់ និងតំបន់ផ្សេងៗ សូមរួមគ្នាបញ្ឈប់ការបរចាញ់សត្វព្រៃ បញ្ឈប់ការបរិភោគ ហើយងាកមកចូលរួមទាំងអស់គ្នា ក្នុងការថែរក្សាអភិរក្សសត្វព្រៃ។ ជាងនេះលោកស្នើថា បញ្ឈប់ការបរចាញ់ហើយងាកមកប្រកបរបរទេសចរណ៍វិញ។
តំបន់អភិរក្សព្រែកទាល់ ស្ថិតក្នុងស្រុកឯកភ្នំ ខេត្ដបាត់ដំបង ជាប់ព្រំប្រទល់ទឹករវាងខេត្ដបាត់ដំបង និងខេត្ដសៀមរាប។ ព្រែកទាល់មានផ្ទៃក្រឡា ២១៣៤២ហិចតា ស្ថិតនៅកណ្ដាលបឹងទន្លេសាប។ ព្រែកទាល់ ត្រូវបានទទួលស្គាល់ជាផ្លូវការ ជាតំបន់ដីសើមអន្ដរជាតិ (Wetland of International Importance) ឬគេហៅថា តំបន់រ៉ាំសារ (Ramsar Site)៕
