en     km
en     km

សម្ដេចហ៊ុន សែន បង្ហាញពីចំណុច៥យ៉ាងនៃនយោបាយឈ្នះៗតែអ្នកវិភាគ​ទទូចសុំឱ្យ​គ្មាន​អ្នកចាញ់

Share

ភ្នំពេញ៖ នៅថ្ងៃទី ២៩ធ្នូ ឆ្នាំ ២០១៨នេះ រាជរដ្ឋាភិបាលកម្ពុជានៃគណបក្សប្រជាជនកម្ពុជានឹងរៀបចំព្រឹត្តិការណ៍សម្ភោធវិមានឈ្នះឈ្នះ ដែលជាយុទ្ធសាស្ត្រនយោបាយរបស់សម្ដេចនាយករដ្ឋមន្ត្រី ហ៊ុន សែន ។ តាម សម្ដេច ហ៊ុន សែន វិមានឈ្នះឈ្នះ គឺជាតំណាងនៃការបង្រួបបង្រួមជាតិ ឯករាជ្យជាតិ សាមគ្គីភាព បូរណភាពទឹកដី វឌ្ឍនភាព និងវិបុលភាពនៃកម្ពុជាទាំងមូល។ តែអ្នកវិភាគថា ពាក្យឈ្នះៗនេះ គឺមិន​ត្រូវមានអ្ន​កចាញ់ឡើយ។

ជូនសេចក្ដីរាយការណ៍ ដោយ កញ្ញា​ ឆោម ពៅនិកា!

សម្ដេច ហ៊ុន សែន នាយករដ្ឋមន្ត្រីកម្ពុជាថា វិមានឈ្នះឈ្នះ គឺដើម្បីជាការបញ្ជាក់ថា កម្ពុជាឈ្នះលើ ៥ យ៉ាង ។ នេះបើតាមការចុះផ្សាយលើទំព័រហ្វេសបុករបស់សម្ដេច ហ៊ុន សែន ។ ​

តាមការចុះផ្សាយនេះបញ្ជាក់ថា ការបង្ហាញបែបនេះរបស់សម្ដេច ហ៊ុន សែន ធ្វើឡើងមុនពេលមួយថ្ងៃ ដែលជាថ្ងៃសម្ភោធវិមានឈ្នះ ឈ្នះ នឹងប្រព្រឹត្តទៅនៅថ្ងៃទី ២៩ ធ្នូ ២០១៨ ។

សម្ដេចសរសេរបន្ថែមទៀតថា កម្ពុជាអបអរសាទរចំពោះសមិទ្ធផលប្រវត្តិសាស្រ្តនៃវិមានឈ្នះឈ្នះ ដែលត្រូវបានកសាងរួចស្រេចជាស្ថាពរនៅលើទឹកដីសុវណ្ណភូមិ។

នាយករដ្ឋមន្ត្រីកម្ពុជា បញ្ជាក់ទៀតថា វិមានឈ្នះឈ្នះ គឺជាតំណាងនៃការបង្រួបបង្រួមជាតិ ឯករាជ្យជាតិ សាមគ្គីភាព បូរណភាពទឹកដី វឌ្ឍនភាព និងវិបុលភាពនៃកម្ពុជាទាំងមូល។

វិមានឈ្នះឈ្នះ បញ្ជាក់ថា កម្ពុជាឈ្នះទៅលើ ៥យ៉ាង គឺឈ្នះដោយរួចផុតពីសង្រ្គាម ឈ្នះរួចផុតពីរបបប្រល័យពូជសាសន៍ ឈ្នះរួចផុតពីការបែងចែកទឹកដីតំបន់ត្រួតត្រា ឈ្នះរួចផុតពីភាពក្រីក្រ និងឈ្នះរួចផុតពីការអុចអាលដោយបរទេស ។

ហាក់ផ្ទុយបន្តិចពីការពន្យល់របស់សម្ដេចនាយករដ្ឋមន្ត្រី  សម្រាប់អ្នកវិភាគថា ការ​អនុវត្ត​នយោបាយឈ្នះឈ្នះ គួរតែកុំមានការរើសអើងនិនា្នការនយោបាយ​ គឺត្រូវ​មានការ​បង្រួប​បង្រួមជាតិយ៉ាងពិតប្រាកដ។ លោកបណ្ឌិត មាស នី អ្នកវិភាគបញ្ហានយោបាយនិងសង្គម ទទូចសុំឱ្យ​គ្មាន​អ្នកចាញ់។

លោក មាស នី៖«កាលណាយើងនិយាយពីនយោបាយឈ្នះៗ មានន័យថា សង្ឃឹមថា ខ្មែរទាំងអស់នឹងមានការស្រុះស្រួលគ្នា និងឯកភាពជាតិក្ដីក្រោមការដឹកនាំរបស់រដ្ឋាភិបាលដែលគ្មានទំនាស់ក្នុងជាតិ។ អ៊ីចឹងបើយើងមើលពីទិដ្ឋភាពជាក់ស្ដែងនៃស្រុកយើង គឺមានអ្នកឈ្នះមានអ្នកចាញ់។អ៊ីចឹងយើងមិនអាចពាក្យឈ្នះៗក្នុងកាលៈទេសៈនេះ គឺសម្រាប់តែអ្នកឈ្នះ គឺអ្នកចាញ់មិនអាចទទួលយកបាន»

តែបែបនេះក្ដី លោក ផៃ ស៊ីផាន អ្នកនាំពាក្យរាជរដ្ឋាភិបាលបានច្រានចោលចំពោះការលើកឡើងរបស់អ្នកវិភាគ។

លោកបានពន្យល់ដោយលើកឡើងអំពីសន្ទុះពលរដ្ឋចេញទៅបោះឆ្នោតកាលពីថ្ងៃទី ២៧កក្កដា ឆ្នាំ ២០១៨ថា មានអត្រាជាង ៨០ភាគរយ គឺជាការបង្ហាញអំពីការគាំទ្រគណបក្សប្រជាជនកម្ពុជាដែលលោកគិតថា នេះកើតចេញពីនយោបាយឈ្នះឈ្នះរបស់សម្ដេច ហ៊ុន សែន ផងដែរ។

លោក ផៃ ស៊ីផាន៖«ចំនួន ៨៣ភាគរយនៃចំនួនប្រជាពលរដ្ឋលោកចេញទៅបោះឆ្នោត ហើយក្នុងយើងបានចំនួនលើសលុបដែលទទួលស្គាល់ស្នាដៃនិងទទួលស្គាល់ការដឹកនាំប្រកបដោយជោគជ័យរបស់សម្ដេចអគ្គមហាសេនាបតីតេជោ ហ៊ុន សែន ក្នុងកិច្ចអនុវត្តគោលនយោបាយឈ្នះៗ គេបានចេញមកបោះឆ្នោត គេបានចេញមកគាំទ្រ។ នេះជាសារមួយដ៏សំខាន់ក្នុងបង្ហាញជូនដល់អ្នកវិភាគដែលមាននិន្នាការប្រឆាំង»។

យ៉ាងណា សម្ដេច ហ៊ុន សែន អំពាវនាវឱ្យជនរួមជាតិ និងភ្ញៀវទេសចរអន្តរជាតិចូលរួមសម្ពោធ វិមានឈ្នះឈ្នះឱ្យបានគ្រប់គ្នា ។  

​ចាប់តាំងពី​ឆ្នាំ ​១៩៧៩​ មក​ ប្រទេស​កម្ពុជា​បាន​សាងសង់​រូបសំណាក​ជា​ច្រើន​ ដើម្បី​បញ្ជាក់​ការ​ដឹកនាំ​ប្រទេស​ ក្នុង​នោះ​ វិមាន​អនុស្សាវរីយ៍​នៃ​កងទ័ព​វៀតណាម​ចូល​មក​រំដោះ​កម្ពុជា​ពី​របប​កម្ពុជា​ប្រជា​ធិ​ប​តេ​យ្យ​ផង​ដែរ​។​ រូបសំណាក ​ឬ​ស្តូប​អនុស្សាវរីយ៍​នេះ​ ត្រូវ​បាន​សង់​ឡើង​នៅ​គ្រប់​ខេត្ត​ក្រុង​នៃ​ប្រទេស​កម្ពុជា​។

សូមរម្លឹក​ថា​ ស្តូប​វិមាន​ឈ្នះ​ឈ្នះ​ ចាប់ផ្តើម​សាងសង់​កាលពី​ខែកុម្ភៈ​ ឆ្នាំ​២០១៦​។​ វិមាន​ឈ្នះ​ឈ្នះ​សាងសង​លើ​ទំហំ​ដី​ ៨​ ហិក​តា​ ស្ថិត​នៅ​ខណ្ឌ​ជ្រោយចង្វា​ រាជធានី​ភ្នំពេញ​ ដែល​ជា​អំណោយ​របស់​លោក​ឧ​ញ៉ា​ លី​ យ៉ុ​ង​ផាត់​ ជា​សមាជិក​ព្រឹទ្ធសភា​មក​ពី​គណបក្ស​ប្រជាជន​កម្ពុជា​៕​

 

 

 

Share

Image
Image
Image