នាយករដ្ឋមន្ត្រីនៃប្រទេសប៊ែលហ្សិក លោក Charles Michel បានដាក់លិខិតលាលែងពីតំណែងថ្វាយទៅព្រះមហាក្សត្រ បន្ទាប់ពីលោកមិនសប្បាយចិត្តការដែលក្រុមប្រឆាំងទាមទារឱ្យសភាបោះឆ្នោតសម្ដែងការទុកចិត្តលើរូបលោកជាថ្មីទៀត ករណីនាំអោយមានការខ្វែងគំនិតគ្នារឿងអន្តោប្រវេសន៍។
តាមទីភ្នាក់ងារសារព័ត៌មានReuters ការដែលលោកសម្រេចចិត្តដូចនេះ ដោយសារលោកបាត់បង់ការគាំទ្រជាខ្លាំងនៅក្នុងរដ្ឋាភិបាលចម្រុះរបស់លោក បន្ទាប់ពីមានករណីផ្ទុះការតវ៉ាប្រឆាំងសន្ធិសញ្ញាអន្តោប្រវេសន៍ចូលមកទ្វីបអឺរ៉ុប។
លោក Charles Michel បានចូលកាន់តំណែងជានាយករដ្ឋមន្ត្រីនៅឆ្នាំ ២០១៤។
មកដល់ពេលនេះ ព្រះមហាក្សត្រ Philippe នៅមិនទាន់ចេញព្រះរាជសារឆ្លើយតបនៅឡើយទេ ។ តែអ្នកសង្កេតការណ៍មើលឃើញថា ព្រះមហាក្សត្រអាចស្នើឱ្យលោក Charles Michel នៅបន្តជានាយករដ្ឋមន្ត្រីចាំផ្ទះ។
តាមរដ្ឋធម្មនុញ្ញប្រទេសប៊ែលហ្សិកនឹងមានការបោះឆ្នោតសភាឡើងវិញ នៅរយៈពេល ៤០ថ្ងៃយ៉ាងយូរ បន្ទាប់ពីសភាត្រូវបានរំលាយ ខណៈប្រទេសគ្មាននាយករដ្ឋមន្ត្រីចេញពីការបោះឆ្នោត៕