ភ្នំពេញ៖ ភរិយាលោក រ៉ាត់ រត្នមុនី និងសកម្មជនដីធ្លីក្នុងរាជធានីភ្នំពេញមួយចំនួននៅព្រឹកថ្ងៃ ១៨ ខែ ធ្នូ ឆ្នាំ ២០១៨ នេះ បានប្រមូលផ្តុំគ្នាដាក់ញាត្តិទាមទារឱ្យស្ថានទូតរុស្សីអន្តរាគមន៍ ឱ្យដោះលែងប្តីរបស់ខ្លួន បន្ទាប់ពីតុលាការរាជធានីភ្នំពេញឃុំខ្លួនបណ្តោះអាសន្ន ពីបទញុះញង់ឲ្យមានការរើសអើង ក្រោយជាប់ពាក់ព័ន្ធក្នុងករណីផលិតខ្សែវីដេអូរឿង«មា្តយខ្ញុំលក់ខ្ញុំ»។
លោកស្រី ឡុង គីមហ៊ាង ភរិយាលោក រត្ន មុនី ដែលជាសកម្មជនការពារសិទ្ធិការងារបានប្រាប់មកកាន់អ្នកសារព័ត៌មានក្នុងស្រុកថា ការដាក់ញាត្តិនេះ គឺដើម្បីសុំកិច្ចពីរដ្ឋាភិបាលរុស្សីជួយសម្របសម្រួលក្នុងការដោះលែងស្វាមីរបស់លោកស្រី។ អ្នកស្រីថា ប្តីរបស់ខ្លួនត្រូវបានគេចោទប្រកាន់ទាំងអយុត្តិធម៌។
លោកស្រី ឡុង គីមហ៊ាង៖ «ខ្ញុំមិនរំពឹងអីទេ ក្រៅពីរដ្ឋាភិបាលរុស្សីហ្នឹង! ត្រូវគិតគូរ និង ដោះស្រាយ អន្តរាគមន៍ជាមួយការឃុំខ្លួនប្តីខ្ញុំព្រោះថា ការពិតនិងមិនពិតគួរតែរដ្ឋាភិបាលរុស្សី និង រដ្ឋាភិបាលកម្ពុជា ជជែកគ្នា មិនមែនមកចាប់ប្តីខ្ញុំចេះទេ»
មកទល់នឹងពេលនេះ ពុំទាន់មានមន្រ្តីទូតរុស្សីណាម្នាក់ចេញមកទទួលញាត្តិពីភរិយា លោក រត្នមុនីនៅឡើយទេ។
តែយ៉ាងណាក្តីក្រុមនេះត្រូវបានរំសាយទៅវិញនៅរសៀលថ្ងៃដដែលនេះ ដោយផ្ញើញាត្តិតាមរយៈប្រអប់សារអេឡេចត្រូនិចទៅកាន់ស្ថានទូតរុស្សី។ ចំពោះចំណាត់ការបន្ត ភរិយាប្រធានសហជីពរូបនេះ ថាប្រសិនបើគ្មានការដោះស្រាយ និង ការអន្តរាគមន៍ណាមួយនោះទេ លោកស្រីនឹងមកតវ៉ាមកទូតរុស្សី និង ស្ថាប័នដែលធ្វើការពាក់ព័ន្ធលើរឿងនេះម្តងទៀត។
សំណុំរឿងនេះ ត្រូវបានអាជ្ញារកម្ពុជាចោទប្រកាន់ លោក រត្នមុនី ពីបទញុះញង់ឱ្យមានការស្អប់ខ្ពើម និងរើសអើង ក្រោយពីលោកមានជាប់ពាក់ព័ន្ធក្នុងការផលិតវីដេអូនិយាយពីម្តាយលក់ព្រហ្មចារីកូនស្រីបង្កើត នៅរាជធានីភ្នំពេញ ជាមួយទូរទស្សន៍រុស្ស៊ី RTកាលពីថ្មីនេះ។ លោក មុនី ត្រូវបានអាជ្ញាធរថៃឃុំខ្លូននៅមណ្ឌលឃុំឃាំងអន្តោប្រវេសន៍ថៃ ហើយប្រគលមកកាន់អាជ្ញាធរកម្ពុជា។
វិទ្យុស្រ្តីមិនទាន់សុំការឆ្លើយតប ពីលោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍គណៈកម្មាធិការជាតិប្រយុទ្ធ ប្រឆាំងអំពើជួញដូរមនុស្ស ស្រ្តីនិងកុមារ បាននៅឡើយទេ។ ប៉ុន្តែកន្លងមក លោកស្រី ធ្លាប់បានប្រាប់អ្នកសារព័ត៌មានក្នុងស្រុកថា សមត្ថកិច្ចកំពុងពិនិត្យចម្លើយ ដែលផ្តល់ដោយ លោក រត្នមុនី និង អ្នកពាក់ព័ន្ធមួយចំនួនក្នុងករណីនេះ។
នៅអំឡុងខែ តុលា ទូរទស្សន៍ Russia Today បានផ្សាយភាពយន្តឯកសារឈ្មោះថា«ម្តាយខ្ញុំលក់ខ្ញុំ» រាយការណ៍អំពីគ្រួសារក្រីក្រលក់ព្រហ្មចារីកូនស្រីបង្កើតក្នុងតម្លៃប្រហែល ៤០០ ដុល្លារ ហើយពេលកូនស្រីអស់ព្រហ្មចារី នាងនឹងត្រូវបង្ខំឱ្យលក់ខ្លួនទៀត។
កាលពីកំឡុងខែ កក្ដដា ឆ្នាំ ២០១៧ រដ្ឋាភិបាលបានអនុញាត្តិដល់អង្គការមេត្រី បន្តសកម្មភាពរបស់ខ្លួនឡើងវិញក្រោយនាយកប្រតិបត្តិអង្គការមួយនេះ បានសម្ដែងការសោកស្ដាយចំពោះការផ្សាយព័ត៌មានលើទូរទស្សន៍អាមេរិក ឈ្មោះ ស៊ី.អិន.អិន (CNN) ទាក់ទងនឹងការជួញដូរផ្លូវភេទនៅកម្ពុជា។
អង្គការមួយនេះ បានផលិតខ្សែវីដេអូមួយ ដែលនិយាយពីម្តាយលក់ព្រហ្មចារីយ៍កូនក្នុងតម្លៃ ៥០០ ដុល្លារ។ ក្រោយពី ព័ត៌មាននេះ ត្រូវបានផ្សព្វផ្សាយលើបណ្តាញទូរទស្សន៍បរទេស រដ្ឋាភិបាលតាមរយៈក្រសួងមហាផ្ទៃ បានផ្អាកសកម្មភាពអង្គការនេះជាបណ្តោះអាសន្ន។ តែដោយហេតុថា អង្គការមួយនេះ បានបម្រើផលប្រយោជន៍ជួយសង្គមជាច្រើន ទើបមានការសម្របសម្រួលឲ្យអង្គការមួយនេះអាចដំនើរការវិញបាន៕
