ភ្នំពេញ ៖ យោងតាមគេហទំព័រអគ្គស្នងការដ្ឋាននគរបាលជាតិផ្សព្វផ្សាយកាលពីថ្ងៃទី០៩ ខែធ្នូ ម្សិលមិញ បញ្ជាក់ថា កាលពីថ្ងៃទី០៨ ខែធ្នូ មានប្រជាពលរដ្ឋរស់នៅខេត្ដបន្ទាយមានជ័យម្នាក់បានប្រទះគ្រាប់យុទ្ធភណ្ឌមិនទាន់ផ្ទុះមួយគ្រាប់ ដែលស្ថិតនៅក្បែរដើមត្នោត លើភ្លឺស្រែ។
គ្រាប់មួយគ្រាប់នេះ ប្រភេទ KD ស្ថិតនៅខាងកើតភូមិថ្នល់ដាច់ ចំងាយប្រមាណ ៣គីឡូម៉ែត្រ។ ក្រោយពីទទួលបានដំណឹង អាជ្ញាធរបានទៅស្លាកសញ្ញាហាមឃាត់ ដើម្បីបង្ការកុំឲ្យមានពលរដ្ឋចូលទៅបរិវេណនោះ។
តាមរយៈបទសម្ភាសជាមួយវិទ្យុស្ដ្រី កាលពីពេលកន្លងទៅ លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីន ហៅកាត់ថា ស៊ីម៉ាក់ អំពាវនាវឲ្យប្រជាពលរដ្ឋគ្រប់រូប សូមកុំប៉ះពាល់ ឬយកទៅកែច្នៃ នូវគ្រប់មីន គ្រាប់បែក គ្រប់ប្រភេទ បើទោះជាឃើញសភាពចាស់ច្រែះចាប់យ៉ាងណាក៏ដោយ ត្រូវរូតរះផ្ដល់ដំណឹងទៅអាជ្ញាធរ ឬអង្គភាពស៊ីម៉ាក់ដើម្បីទៅកម្ទេចចោល៕