ភ្នំពេញ ៖ ក្រសួងធនធានធម្មជាតិ និងបរិស្ថាន នៃហព័ន្ធរុស្ស៊ី បានអញ្ជើញ រដ្ឋមន្ដ្រីក្រសួងបរិស្ថាន ដើម្បីចូលរួមប្រជុំលើកទី១ នៃក្រុមការងារស្ដីពីកិច្ចសហប្រតិបត្ដិការក្នុងវិស័យគាំពារបរិស្ថាន ដែលនឹងប្រព្រឹត្ដទៅនៅទីក្រុងមូស្គូ នៃសាធារណរដ្ឋសហព័ន្ធរុស្ស៊ី។ កិច្ចប្រជុំរវាងក្រុមការងារកម្ពុជា-រុស្ស៊ី ត្រូវធ្វើឡើងចាប់ពីថ្ងៃទី២៦ រហូតដល់ថ្ងៃទី២៨ ខែវិច្ឆិកា ឆ្នាំ២០១៨នេះ។
យោងតាមហ្វេសប៊ុករបស់ក្រសួងបរិស្ថានផ្សព្វផ្សាយនៅថ្ងៃទី២៦ ខែវិច្ឆិកានេះ បញ្ជាក់ថា លោក អ៊ាង សុផល្លែត រដ្ឋលេខាធិការក្រសួងបរិស្ថាន គឺជាតំណាងរដ្ឋមន្ដ្រី បរិស្ថានកម្ពុជា ទៅចូលរួមកិច្ចប្រជុំរវាងក្រុមការងារកម្ពុជា-រុស្ស៊ី ដែលនឹងពិនិត្យលើកិច្ចសហប្រតិបត្ដិការក្នុងវិស័យការពារបរិស្ថាន ដោយផ្ដោតជាសំខាន់លើការគ្រប់គ្រងទឹកកខ្វក់ សំណល់សំរាម ការគ្រប់គ្រងបរិស្ថានទីក្រុង និងការបង្កើតជាឧទ្យាននៅតាមទីក្រុង មន្ទីរពិសោធន៍ និងការគ្រប់ក្រងការបំពុលនៅទីក្រុងជាដើម៕
