ភ្នំពេញ ៖ ក្រសួងធនធានទឹកអំពាវនវា ឲ្យប្រជាពលរដ្ឋមានការប្រុងប្រយ័ត្ន ខណៈកូនព្យុះ USAGI បានវិវត្ដខ្លួននិងបង្កើនឥទ្ធិពលទៅព្យុះទីហ្វុង នឹងមកដល់កម្ពុជា នៅយប់ថ្ងៃទី២៥ ខែវិច្ឆិកានេះ។ នេះបើតាមសេចក្ដីជូនដំណឹងរបស់ក្រសួងធនធានទឹក ផ្សព្វផ្សាយកាលពីថ្ងៃទី២៤ ខែវិច្ឆិកា។
ក្រសួងធនធានទឹក បញ្ជាក់ថា ព្យុះ USAGI នឹងមកដល់ដោយនាំមកជាមួយនូវទឹកភ្លៀង ដែលនឹងបង្កឲ្យកម្ពុជាមានភ្លៀងធ្លាក់ក្នុងក្របខ័ណ្ឌទូទាំងប្រទេស លាយឡំជាមួយខ្យល់បក់បោកខ្លាំងក្នុងល្បឿនពី១៣ ទៅ ១៥ ម៉ែត្រក្នុងមួយវិនាទី ពិសេសគឺនៅតំបន់ទំនាបកណ្ដាលភាគខាងត្បូង និងតំបន់មាត់សមុទ្រ ចាប់ពីថ្ងៃទី២៥ ដល់ថ្ងៃទី២៧ ខែវិច្ឆិកា។
បន្ថែមពីនេះក្រសួងសង្កត់ធ្ងន់ថា ការមកដល់របស់ព្យុះទីហ្វុងនេះ រាជធានី-ខេត្ដ នៃតំបន់ទំនាបកណ្ដាលភាគខាងត្បូង និងតំបន់មាត់សមុទ្រ របស់កម្ពុជា ប្រឈមនឹងជំនន់ទឹកភ្លៀង។ លើសពីនេះក្រសួង អំពាវនាវឲ្យប្រជានេសាទ និងអ្នកធ្វើដំណើរតាមសមុទ្រទាំងអស់ត្រូវតែផ្អាកសកម្មភាពនានានៅលើផ្ទៃសមុទ្រ ចាប់ពីថ្ងៃទី២៥ ដល់ថ្ងៃទី ២៧ ខែវិច្ឆិកានេះ ដើម្បីចៀសវាងនៅគ្រោះថ្នាក់ផ្សេងៗ៕
