ភ្នំពេញ ៖ ក្រសួងធនធានទឹក បានបញ្ជាក់ថា ចន្លោះពីថ្ងៃទី២៤ ដល់ថ្ងៃទី២៦ ខែវិច្ឆិកា រាជធានី-ខេតមួយចំនួន របស់កម្ពុជា នឹងប្រឈមជំនន់ទឹកភ្លៀងរយៈពេលខ្លី ចំណែកតំបន់មាត់សមុទ្រ ប្រឈមនឹងភ្លៀងលាយឡំ និងកម្លាំងខ្យល់បក់បោកខ្លាំង។ នេះបើតាសេចក្ដីជូនដំណឹង របស់ក្រសួងធនធានទឹក ដែលផ្សព្វផ្សាយកាលពីថ្ងៃទី២០ ខែវិច្ឆិកា។
ក្រសួងធនធានទឹក បានប្រាប់ថា មូលហេតុដែលនឹងនាំឲ្យកម្ពុជាមានស្ថានភាពបែបនេះ គឺបណ្ដាលមកពីឥទ្ធិពលវិសម្ពាធចំនួន ០២ ដែលកើតឡើងនៅមហាសមុទ្រប៉ាស៊ីហ្វិក ភាគខាងកើត ប្រទេសហ្វីលីពិន ហើយបានវិវត្ដខ្លួនទៅព្យុះទី២៨ និង២៩ នៅថ្ងៃទី២១ ខែវិច្ឆិកា។ ក្រសួងបន្ដថា ព្យុះទាំង ០២នេះ នឹងមាន ០១ ធ្វើដំណើរឆ្លងកាត់ប្រទេសហ្វីលីពីន ចូលមកសមុទ្រចិនខាងត្បូង រួចហើយបន្ដដំណើរមកដល់ឆ្នេរប្រទេវៀតណាម ភាកកណ្ដាល នៅថ្ងៃទី២៤ ខែវិចិ្ឆកា។ ព្យុះដែលមកដល់ឆ្នេររបស់វៀតណាមនេះ មិនទាន់មានឈ្មោះនៅឡើយទេ ។
ក្រសួងធនធានទឹក បញ្ជាក់ថា ចាប់ពីថ្ងៃទី ២៤ ដល់ថ្ងៃទី ២៦ ខែវិច្ឆិកា រាជធានី-ខេត្ដមួយចំនួន មានដូចជា ខេត្ដ មណ្ឌលគិរី ក្រចេះ ត្បូងឃ្មុំ កំពង់ចាម កំពង់ធំ ព្រៃវែង ស្វាយរៀង កណ្ដាល កំពង់ស្ពឺ តាកែវ ពោធិ៍សាត់ និងរាជធានីភ្នំពេញ អាចនឹងមានភ្លៀងធ្លាក់ពីបង្គួរទៅច្រើន ដែលប្រឈមនឹងជំនន់ទឹកភ្លៀងរយៈពេលខ្លី។
ចំណែកចន្លោះថ្ងៃទី២៥ ដល់ថ្ងៃទី ២៦ ខែវិច្ឆិកា តំបន់មាតសមុទ្រ និងលើផ្ទៃសមុទ្រអាចនឹងមានភ្លៀង និងខ្យល់បក់បោលខ្លាំង ហើយបង្កើតបានជារលកមានកម្ពស់ខ្ពស់ៗ ដែលប្រជានេសាទ និងអ្នកធ្វើដំណើរតាមសមុទ្រ គួរបញ្ចៀសការធ្វើដំណើរតាមសមុទ្រ ដើម្បីចៀសវាងនូវគ្រោះថ្នាក់ផ្សេងៗ។
ខណៈនេះក្រសួងធនធានទឹក និងឧតុនិយម បាននិងកំពុងតែបន្ដតាមដានយ៉ាងយកចិត្ដទូកដាក់លើបាតុភូតធម្មជាតិនេះ ហើយនឹងជម្រាបជួនដំណឹងជាបន្ដបន្ទាប់ទៀតក្នុងករណីចាំបាច់៕
