ភ្នំពេញ៖ មន្ត្រីជាន់ខ្ពស់រាជរដ្ឋាភិបាលឱ្យដឹងថា ក្រសួងមហាផ្ទៃ សម្រេចកំណត់ជួបអង្គការសង្គមស៊ីវិលពីរដងក្នុងមួយឆ្នាំ ដើម្បីស្តារទំនាក់ទំនងឡើងវិញក្រោយពីមានភាពល្អក់កករនឹងគ្នា។ មន្ត្រីអង្គការសង្គមយល់ថា ការជួបជាមួយអង្គការក្រៅរដ្ឋាភិបាលនឹងអាចសម្រួលដល់កិច្ចការរបស់NGOនៅថ្នាក់មូលដ្ឋានក្នុងការបំពេញការងារជួយសហគមន៍។
លោក ធូ វិរៈ ជូនសេចក្តីរាយការណ៍
ក្នុងជំនួបជាមួយអនុរដ្ឋមន្ត្រីការបរទេសអាមេរិកនៅកិច្ចប្រជុំកំពូលអាស៊ានលើកទី៣៣ នៅប្រទេសសឹង្ហបុរី កាលពីសប្តាហ៍មុន លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស បានបកស្រាយបំភ្លឺចំពោះការព្រួយរបស់អាមេរិកជុំវិញ ការរឹតត្បឹតមកលើអង្គការសង្គមស៊ីវិល។ លោកថា សម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានកំណត់ជួបពិភាក្សាជាមួយអង្គការសង្គមស៊ីវិលនានាពីរដងក្នុងមួយឆ្នាំ ដើម្បីផ្លាស់ប្តូរព័ត៌មាន និងទស្សន។
លោកបន្តថាជាមួយគ្នានេះ ក្រសួងការបរទេសក៏គ្រោងនឹងជួបជាមួយអង្គការសង្គមស៊ីវិលអន្តរជាតិផងដែរ។ នេះបើតាមសេចក្តីប្រកាសព័ត៌មានរបស់ក្រសូងការបរទេស។
ក្នុងជំនួបនេះ លោក John J. Sullivan អនុរដ្ឋមន្ត្រីការបរទេសអាមេរិក ជំរុញឱ្យរាជរដ្ឋាភិបាលកម្ពុជាចាត់វិធានការជាក់ស្តែង ដើម្បីលើកកម្ពស់បរិយាកាសនយោបាយដោយអនុញ្ញាតឱ្យអង្គការសង្គមស៊ីវិល និងប្រព័ន្ធផ្សព្វផ្សាយបំពេញការងារដោយសេរី។ ព្រមទាំងដោះលែងអ្នកទោសនយោបាយ និងដកបំរាមលើតំណាងគណបក្សប្រឆាំង។
លោក ប្រាក់ សុខុន រដ្ឋមន្ត្រីក្រសួងការបរទេស បញ្ជាក់ថាគម្រោងជួបជាមួយអង្គការសង្គមស៊ីវិលនានាក៏ ដើម្បីលើកស្ទួយសិទ្ធិមនុស្សនៅប្រទេសកម្ពុជាផងដែរ។
សូមរំលឹកថា នៅអំឡុងខែ សីហា ឆ្នាំ ២០១៧ រាជរដ្ឋាភិបាលសម្រេចបិទអង្គការវិទ្យាស្ថានជាតិប្រជាធិបតេយ្យ NDI របស់អាមេរិក និងបិទស្ថាប័នវិទ្យុមួយចំនួន។ នៅពេលនោះក្រសួងការបរទេសបញ្ជាក់ថា ការបិទ ការិយាល័យNDI និងបញ្ចប់បេសកកម្មរបស់បុគ្គលិកបរទេសរបស់វិទ្យាស្ថាននេះ ព្រោះតែអង្គការអាមេរិកនេះ មិនគោរពច្បាប់ស្តីពីសមាគម និងអង្គការមិនមែនរដ្ឋាភិបាល និងច្បាប់ពន្ធដា។
លើសពីនេះ មន្ត្រីអង្គការសមាគមអាដហុកចំនួន ៤ រូប និង មន្ត្រីគ.ជ.ប មួយរូប ត្រូវបានចាប់ខ្លួននិងឃុំដាក់ពន្ធនាគារអស់រយៈពេលជាង១ឆ្នាំ ពាក់ព័ន្ធនឹងរឿងលោក កឹម សុខា អតីតប្រធានគណបក្សសង្គ្រោះជាតិត្រូវបានរំលាយ តែមន្ត្រីNGOទាំងនោះត្រូវបានតុលាការសម្រេចដោះលែងឱ្យនៅក្រៅឃុំបណ្តោះអាសន្ន កាលពីថ្ងៃទី ២៩ ខែ មិថុនា។
លោក អំ សំអាត មន្ត្រីការពារសិទ្ធិមនុស្សអង្គការលីកាដូ ស្វាគមន៍ចំពោះរាជរដ្ឋាភិបាលមានគម្រោងជួបពិភាក្សា និងផ្លាស់ប្តូរទស្សន ជាមួយអង្គការក្រៅរដ្ឋាភិបាល។ លោក អំ សំអាត យល់ថា យន្តការនេះនឹងអាចជួយសម្រួលដល់កិច្ចការអង្គការសង្គមស៊ីវិលនៅថ្នាក់មូលដ្ឋាននៃវគ្គបណ្តុះបណ្តាលដល់សហគមន៍។
លោក សំអាត ជាជនរងគ្រោះម្នាក់ត្រូវបានកងកម្លាំងខណ្ឌដូចពេញវាយឱ្យរងរបួសនៅពេលឃ្លាំមើលការហែក្បួនក្នុងទិវាសិទ្ធិលំនៅឋាន ហើយក៏រងបណ្តឹងមួយពាក់ព័ន្ធនឹងអំពើហិង្សានេះដែរ។
លោក សំអាត មានប្រសាសន៍ថា ប្រសិនបើលោកជួបជាមួយសម្តេច ស ខេង រដ្ឋមន្ត្រីក្រសួងមហាផ្ទៃ មន្ត្រីការពារសិទ្ធិមនុស្សរូបនេះ នឹងលើកឡើងឱ្យមានការដោះស្រាយបញ្ហាអាជ្ញាធរថ្នាក់ក្រោមរារាំងវគ្គបណ្តុះបណ្តាល ឬវេទិការរបស់អង្គការសង្គមស៊ីវិល និងច្បាប់ស្តីពីអង្គការសង្គមស៊ីវិល និងសមាគម។
លោក សំអាត៖ «អង្គការសង្គមស៊ីវិលទាំំងអស់ ពិសេសអង្គការដែលធ្វើការពាក់ព័ន្ធនឹងបញ្ហាសិទ្ធិមនុស្ស លទ្ធិប្រជាធិបតេយ្យ ការពង្រឹកនៃអភិបាលកិច្ចល្អ និងការតស៊ូមតិ អាចនឹងលើកជូនអំពីបញ្ហាជួបប្រទះកន្លងមកទៅក្រសួងមហាផ្ទៃ ដើម្បីឱ្យមានការកែសម្រួល ហើយមួយបញ្ហាច្បាប់សមាគម និងអង្គការមិន មែនរដ្ឋាភិបាលដែលមានមាត្រធ្វើឱ្យប៉ះពាល់ដល់ការងាររបស់អង្គការសង្គមស៊ីវិល។»
កាលពីថ្ងៃទី ២ វិច្ឆិកា ឆ្នាំ ២០១៨ រាជរដ្ឋាភិបាលសម្រចបង្កើតក្រុមការងារជួយដោះស្រាយបញ្ហាប្រឈមជាមួយអង្គការសង្គមស៊ីវិល ក្រោយពីក្រសួងមហាផ្ទៃណែនាំឱ្យអាជ្ញាធរថ្នាក់ក្រោមបើកចំហការជួបជុំរបស់អង្គការមិនមែនរដ្ឋាភិបាលជាមួយប្រជាពលរដ្ឋ។
លោក សំ គន្ធាមី នាយកប្រតិបត្តិអង្គការនិកហ្វិក ឱ្យដឹងថា លោកនឹងស្នើសុំឱ្យមានការកែសម្រួលមាត្រាមួយចំនួននៃច្បាប់ស្តីពីសមាគម និង អង្គការមិនមែនរដ្ឋាភិបាល ព្រោះ មាត្រាមួយចំនួនបិទសេរីភាពអង្គការសង្គមស៊ីវិល។
លោក សំ គន្ធាមី សាទរចំពោះបង្កើតឱ្យមានជំនួបនេះ ព្រោះជាឱកាសសម្រាប់ឱ្យអង្គការសង្គមស៊ីវិលបកស្រាយបំភ្លឺអំពីការរិះគន់ក្រុមអង្គការមិនមែនរដ្ឋាភិបាលមាននិន្នាការនយោបាយប្រឆាំងរដ្ឋាភិបាល តែលោកអង្គការសង្គមស៊ីវិលមិនដូច្នេះទេ។
លោក សំ គន្ធាមី៖ «លើកស្នើសុំថាច្បាប់នឹងចង្អៀតចង្អល់ប៉ះពាល់ដល់ការងារសេរីភាពរបស់យើង។យើងសុំឱ្យធ្វើវិសោធនកម្មដកមាត្រាខ្លះប៉ះពាល់ដល់ការងារសេរីភាពអង្គការណាបទ»។
ច្បាប់ស្តីពីសមាគម និងអង្គការមិនមែនរដ្ឋាភិបាល ត្រូវបានរាជរដ្ឋាភិបាលអនុម័ត នៅអំឡុង ខែ កក្កដា ឆ្នាំ ២០១៥ ។ មន្ត្រីអង្គការសង្គមស៊ីវិលទាំងពីរនេះចង់ឱ្យរដ្ឋាភិបាលវិសោធនកម្មមានត្រាមួយចំនួននៃច្បាប់នេះដើម្បីជាការបង្ហាញឡើងវិញនូវការបើកចំហសេរីភាពសង្គមស៊ី៕
