ភ្នំពេញ៖ ពលរដ្ឋខ្មែរបួននាក់របួសធ្ងន់ និងស្រាលក្នុងហេតុការណ៍បំផ្ទុះគ្រាប់បែកអត្តឃាតក្នុងរថយន្តមួយគ្រឿង នៅប្រទេសម៉ាលី កាលពីយប់រំលងអត្រាធ ថ្ងៃទី ១២ ខែ វិច្ឆិកា។ អ្នកនាំពាក្យកងកម្លាំងរក្សាសន្តិ ភាពមួកខៀវ អះអាងថា កងទ័ពមួកខៀវកម្ពុជាគ្មាននរណាម្នាក់របួសក្នុងហេតុការណ៍បំផ្ទុះគ្រាប់បែកអត្តឃាតនេះទេ។
យោងតាមសេចក្តីប្រកាសព័ត៌មានក្រសួងការពារជាតិចេញផ្សាយនៅថ្ងៃទី ១៤ ខែ វិច្ឆិកា ឱ្យដឹងថា នៅព្រឹកថ្ងៃទី ១៣ វិច្ឆិកា ម្សិលមិញ(ម៉ោងនៅកម្ពុជា) មានហេតុការណ៍បំផ្ទុះគ្រាប់បែកអត្តឃាតក្នុងរថយន្តមួយគ្រឿងបណ្តាលឱ្យជនជាតិម៉ាលីពីរនាក់ និងភេរវកម្នាក់ស្លាប់ ហើយជនស៊ីវិល ១៤ នាក់រងរបួស។ក្នុងចំណោមជនស៊ីវិលនោះ មានពលរដ្ឋខ្មែរបម្រើការងារនៅអង្គការសហប្រជាជាតិ(UN)រងរបួសធ្ងន់ម្នាក់ និងរបួសស្រាលបីនាក់។
ក្នុងខ្លឹមសារដើម៖ «ហេតុការណ៍នេះបានបណ្តាលឱ្យភេរវករម្នាក់ដែលធ្វើសកម្មភាពបំផ្ទុះគ្រាប់បែកស្លាប់នៅនឹងកន្លែង និងបាត់បង់ជីវិតជនជាតិម៉ាលីពីរនាក់ ព្រមទាំងមានអ្នករបួស ១៤ នាក់ ដែលក្នុងនោះ ក៏មានពលរដ្ឋខ្មែរដែលធ្វើការជាមួយអង្គការសហប្រជាជាតិ(UN)ចំនួន ៤ នាក់ផងដែរ ម្នាក់របួសធ្ងន់ និងបីនាក់ទៀតរបួសស្រាល»។
មន្ត្រីនាំពាក្យ និងក្រសួងការពារជាតិច្រានចោលថា គ្មានទាហានមួកខៀវខ្មែរដែលបំបេសកម្មរក្សាសន្តិភាព នៅប្រទេសម៉ាលី ក្រោមឆ័ត្រអង្គការសហប្រជាជាតិ មានគ្រោះថ្នាក់ក្នុងហេតុការណ៍ផ្ទុះគ្រាប់បែកអត្តឃាតក្នុងរថយន្តនៅទីក្រុង ហ្កាវ ទេ។
កញ្ញា កុសល ម៉ាលីនដា អ្នកនាំពាក្យមជ្ឈមណ្ឌលជាតិគ្រប់គ្រងកម្លាំងរក្សាសន្តិភាព បោសសំអាតគ្រាប់មីន និងគ្រាប់មិនទាន់ផ្ទុះ បានប្រាប់វិទ្យុស្ត្រីថា ជនស៊ីវិលខ្មែររបួសបួននាក់នោះ ម្នាក់ជាអ្នកបកប្រែភាសាខ្មែរ និងបីនាក់ទៀតជាបុគ្គលិក TDI ( Technical Development Initiative ) ។ ពួកគាត់ទាំងនោះ បម្រើការងា នៅអង្គការសហប្រជាជាតិ(UN)នៅប្រទេសម៉ាលី។
កញ្ញា កុសល ម៉ាលីនដា បន្ថែមថា ហេតុការណ៍ផ្ទុះគ្រាប់បែកអត្តឃាតនេះ នៅផ្ទះជួលក្រុមគ្រូបង្វឹក និងក្រុម មានចម្ងាយប្រហែល ៣ គីឡូម៉ែត្រ ពីបន្ទាយទាហានមួកខៀវកម្ពុជា ហើយកងកម្លាំងរក្សាសន្តិភាពមួកខៀវ កម្ពុជា ស្ថិតនៅក្នុងបន្ទាយដោយសុវត្ថិភាព និងបង្កើនការប្រុងប្រយ័ត្នខ្ពស់។
កញ្ញា កុសល ម៉ាលីនដា៖ «អ្នករបួសខ្មែរយើងដែរ ប៉ុន្តែខ្មែរស៊ីវិលដែលគាត់កុងត្រាឱ្យខាង UNMAS មិនមែនជាកងទ័ពមួកខៀវទេគឺគាត់ស៊ីវិល។គាត់ទៅជាអ្នកបងកប្រែជូន UNMAS»។
អ្នករងបួសទាំងនោះ ត្រូវបានបញ្ជូនទៅព្យាបាលក្នុងមន្ទីរពេទ្យចិនកម្រិត២នៅប្រទេសម៉ាលី និងអ្នករបួសស្រាលសម្រាកពន្យាបាលនៅមន្ទីរពេទ្យក្នុងទីក្រុងហ្កាវ។
លោកនាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិ បានបង្ហោះលើបណ្តាញសង្គមហ្វេសប៊ុករបស់លោកថា អ្នករងរបួសទាំងបួននាក់នោះ រួមមាន លោក ភិន សារ៉ាន់ ជាអតីតបុគ្គលិកបម្រើការ CMAC រងរបួសធ្ងន់ បាក់ឆ្អឹងជំនី និងរបួសក្បាល។ លោក សារ៉ាន់ បានចាប់ផ្តើមចូលបម្រើការជាអ្នកបកប្រែភាសាជាមួយ UNMAS ចាប់ពីថ្ងៃទី១៤ ខែវិច្ឆិកា ឆ្នាំ២០១៤។
អ្នករងរបួសស្រាល លោក ហ៊ុល សុខហេង ជាអតីតបុគ្គលិកបម្រើការ CMAC លោក រៀម ឌី ជាអតីតនាយកប្រតិបត្តិការកម្ទេចគ្រាប់មិនទាន់ផ្ទុះក្នុងអង្គការ CMAC និងលោក សំ រដ្ឋា ជាអតីតបុគ្គលិកអង្គការ Hello TRUST។
កាលពីខែ មីនា ឆ្នាំ ២០១៨នេះ ក្រុមឧទ្ទាមបានវាយឆ្មក់មូលដ្ឋានកងទ័ពរក្សាសន្តិភាពកម្ពុជានៅប្រទេសម៉ាលី ប៉ុន្តែពុំមានកងទ័ពមួកខៀវមាន ណាម្នាក់គ្រោះថ្នាក់ទេ។ តែកាលពីខែ ឧសភា ឆ្នាំ២០១៧ មានកងទ័ពមួកខៀវកម្ពុជាបួនរូបបានស្លាប់ ព្រោះតែការវាយឆ្មក់មួយពីក្រុមឧទ្ទាម ក្នុងសាធារណរដ្ឋអាហ្វ្រិកកណ្ដាល។
គិតចាប់ពីឆ្នាំ ២០០៦ មកដល់ឆ្នាំ ២០១៨នេះ កម្ពុជាបានបញ្ជូនកងទ័ពមួកខៀវទៅចូលរួមបេសកកម្ម រក្សាសន្ដិភាព របស់អង្គការសហប្រជាជាតិចំនួន ៥៥៧៩នាក់ ហើយក្នុងនោះ ២៦៧នាក់ជាស្ដ្រី ដោយឈរជើងនៅប្រទេសចំនួន ០៥ គឺ អាហ្វ្រឹកកណ្ដាល លីបង់ ម៉ាលី និងប្រទេសស៊ូដង់ខាងត្បូង៕
