ភ្នំពេញ៖ ក្នុងរយៈពេល ១០ ខែដំបូងក្នុងឆ្នាំ២០១៨ កម្ពុជាបាននាំចេញអង្ករជាង ៤ សែនតោនទៅលក់លើទីផ្សារអន្តរជាតិ ដែលចំនួននេះបានធ្លាក់ចុះអស់ ១៣,២០ ភាគរយធៀបនឹងរយៈពេលដូចគ្នាកាលពីឆ្នាំមុន។ យ៉ាងណាក៏ដោយ ក្រសួងកសិកម្មថា វាជារឿងធម្មតាក្នុងការរកស៊ី មានឡើងមានចុះ ។
លោក សេរីវឌ្ឍនៈជូនសេចក្តីរាយការណ៍៖
បើតាមរបាយការណ៍ផ្លូវការ របស់លេខាធិការដ្ឋានច្រកចេញចូលតែមួយ សម្រាប់បំពេញបែបបទនាំចេញអង្ករ បានបង្ហាញឲ្យឃើញថា កម្ពុជាបាននាំចេញអង្ករទៅលក់នៅលើទីផ្សាអន្តរជាតិ បានប្រមាណត្រឹមតែ ៤៣៤ ៨០៧ តោន ប៉ុណ្ណោះក្នុងរយៈពេល ១០ ខែ ឆ្នាំ២០១៨។
របាយការណ៍ដដែលបានបង្ហាញថា អង្ករកម្ពុជាបាននាំចេញទៅកាន់ទីផ្សារធំជាងគេ គឺប្រទេសចិន ក្នុងចំនួន ១១ ម៉ឺនតោន ប្រទេសបារាំង ៦ ម៉ឺនតោន ខណៈប្រទេសម៉ាឡេស៊ី មានប្រមាណជាង ៣ ម៉ឺនតោន។
យ៉ាងណាអ្នករកស៊ីក្នុងវិស័យស្រូវអង្ករលើកឡើងថា ការធ្លាក់ចុះការនាំចេញអង្ករ ដោយសារតែកង្វះស្រូវស្តុកទុកដើម្បីផ្គត់ផ្គង់ឧស្សាហកម្មនេះ។
អ្នកនាំពាក្យក្រសួងកិសិកម្ម និង រុក្ខាប្រមាញ់ លោក ស្រី វុទ្ធី បានផ្តល់បទសម្ភាសដល់វិទ្យុស្រ្តីថា ការធ្លាក់ចុះនៃការនាំចេញស្រូវអង្ករទៅលក់នៅលើទីផ្សារសហភាពអឺរ៉ុបនេះ នឹងមិនមានអ្វីប៉ះពាល់ធ្ងន់ធ្ងរដល់កម្ពុជានោះទេ។
លោកបន្តថា ការធ្លាក់ចុះនៃការនាំចេញស្រូវអង្ករនេះ គឺជារឿងសាមញ្ញធម្មតា ដោយលោកពន្យល់ថា ការបញ្ជាទិញស្រូវអង្ករ និង តម្រូវការនាំចូល ពុំសូវមានទើបធ្វើឲ្យការនាំចេញពុំសូវសកម្មភាពហក់ឡើងខ្លាំងដូចឆ្នាំមុន។
លោក ស្រី វុទ្ធី៖ ការធ្លាក់ចុះហ្នឹង! វាអាស្រ័យលើតម្រូវការបញ្ជាទិញខាងក្រៅ អញ្ជឹងនៅពេលដែលមានគេតម្រូវឲ្យលក់ តាមកិច្ចសន្យារបស់គេ ហើយយើងមិនអាចថាបានទេពីការធ្លាក់ចុះហ្នឹង ព្រោះវាជារឿងធម្មតា! ចាំមើលការឡើងចុះពេលចុងឆ្នាំវិញ។
ស្របពេលនេះដែរ លោក នង វាសនា អនុប្រធានសហព័ន្ធស្រូវអង្ករកម្ពុជា និង ជាអគ្គនាយកក្រុមហ៊ុន KOL Veasna Investment Co,.LTD បានមានប្រសាសន៍ថា ការធ្លាក់ចុះនៃការនាំចេញស្រូវអង្ករនេះ គឺបណ្តាលមកពីការនាំចេញស្រូវអង្កររបស់ប្រទេសមីយ៉ាន់ម៉ា មានប្រៀបជាងអង្ករកម្ពុជា។
ត្រង់ចំណុចនេះ លោកពន្យល់ថា អង្កររបស់ប្រទេសមីយ៉ាន់ម៉ា ដែលនាំចេញទៅលក់នៅក្រៅស្រុកមានប្រៀបជាងអង្ករកម្ពុជាគឺ តម្លៃអង្កររបស់មីយ៉ាន់ម៉ា មានតម្លៃថោកជាង ដោយសារកត្តារួចការអនុគ្រោះពន្ធEBA ដែលប្រទេសនេះទទួលបានកាលពីឆ្នាំ ២០១៣។
លោក នង វាសនា៖ នៅពេលនេះ អង្ករកម្ពុជាមានតម្លៃថ្លៃបើប្រៀបធៀបហ្នឹងអង្ករដែលនាំចេញពីប្រទេសធំៗ ជាពិសេសគឺប្រទេសថៃ ឥណ្ឌា និង វៀតណាម។ ហើយអង្ករកម្ពុជាដែលនាំចេញទៅទីផ្សាអឺរ៉ុប ក៏មានការប្រកួតប្រជែងខ្ពស់ជាមួយនឹងប្រទេសភូមា ដែលមានតម្លៃថោកជាង អង្ករសគេមួយតោន ១០០ ដុល្លារ ហើយការប្រកួតប្រជែងត្រង់ថា អង្ករកម្ពុជាមានតម្លៃថ្លៃជាងក៏ពិតមែន តែគុណភាពល្អជាង ហើយណាមួយ កម្ពុជាជាប្រទេដែលមានកម្រិត GDP ហ្នឹងខ្ពស់ជាង ប្រទេសភូមា សេដ្ឋកិច្ចគ្រាន់បើជាង អញ្ជឹងហើយ ការនាំចេញទៅលក់ក្រៅស្រុកមានតម្លៃខ្ពស់ជាង ហើយកាលណាខ្ពស់ជាង អ្នកទិញគេអាចពិចារណាមើលរបស់ជំនួស ណាដែលមានតម្លៃថោក សមរម្យ បាទ! ។
យ៉ាងណាក៏ដោយ លោកថា ការធ្លាក់ចុះនេះនឹងមិនមានអ្វីដែលធ្វើឲ្យកម្ពុជាខាតបង់ ឬ មានការព្រួយបារម្ភច្រើនឡើយ ដោយលោកសង្កត់ធ្ងន់ថា បើទោះបីជាការនាំចេញមានសភាពធ្លាក់ចុះ តែកម្ពុជាអាចកែខៃ ឬ ច្នៃអង្ករ លក់នៅក្នុងស្រុកបាន។
លោក នង វាសនា៖ ការព្រួយបារម្ភយើងចេះតែមានហើយ តែក៏មិនត្រូវព្រួយបារម្ភពេកដែរ ព្រោះការនាំចេញធ្លាក់ចុះ ក៏យើងពុំសល់ស្រូវក្នុងឃ្លាំង មានន័យថា តម្រូវការក្នុងស្រុកខ្ពស់ គឺយើងអាចនាំចេញ និង ធ្វើការកែច្នៃស្រូវអង្ករនៅក្នុងស្រុកបាទ!។
យោងតាមរបាយការណ៍ដដែរ សមាជិកសភាអឺរ៉ុបនាំអង្ករចូលពីកម្ពុជាមានចំនួន ២១២ ៥១៣តោន ប្រទេសចិនមានចំនួន ១១៣ ៥៣៧តោន និងសមាជិកអាស៊ានរួមមាន ប្រ៊ុយណេ វៀតណាម និងសឹង្ហបុរី មានចំនួន ៤៥ ៥២៦តោន។
ផ្អែកតាមតួលេខនេះសហភាពអឺរ៉ុបបានឈរលំដាប់លេខមួយក្នុងការនាំអង្ករពីកម្ពុជា បន្ទាប់មកគឺប្រទេសចិន។
កាលពីដើមខែកញ្ញាឆ្នាំ២០១៨ គណៈកម្មាការអឺរ៉ុបបានទទួលយកសំណើរបស់កសិករអ៊ីតាលីថា នឹងពិនិត្យឡើងវិញលើការអនុគ្រោះពន្ធនាំចូលអង្ករពីប្រទេសកម្ពុជា និងប្រទេសមីយ៉ាន់ម៉ា ព្រោះការលើកលែងពន្ធនាំចូលអង្ករពីកម្ពុជាបានប៉ះពាល់ដល់ទីផ្សារអង្កររបស់កសិករអ៊ីតាលី។ នេះបើតាមសេចក្តីប្រកាសព័ត៌មានគណៈកម្មាការអឺរ៉ុប។
កាលពីថ្ងៃទី ១៦ មិនា គណៈកម្មាការអឺរ៉ុបបានធ្វើការស៊ើបអង្កេតចំពោះការនាំចូលអង្ករកម្ពុជាទៅសហភាពអឺរ៉ុបថា តើមានភាពស្មើគ្នាចំពោះកសិករនៅអឺរ៉ុបដែរឬយ៉ាងណា។ ការស៊ើបអង្កេតនេះធ្វើឡើងតាមសំណើរបស់ប្រទេសអ៊ីតាលីស្នើសុំឱ្យមានវិធានការរឹតបន្តឹងលើការនាំចូល និងគិតអត្រាពន្ធអង្ករពីកម្ពុជា និងមីយ៉ាន់ម៉ា។
ជុំវិញបញ្ហានេះមន្ត្រីក្រសួងកសិកម្មសុំមិនធ្វើការអត្ថាធិប្បាយចំពោះវិធានការគណៈកម្មការអឺរ៉ុបគ្រោងពិនិត្យឡើងវិញលើកិច្ចព្រមព្រៀងអនុគ្រោះពន្ធលើទំនិញនាំចេញអង្ករពីកម្ពុជាទេ។
សូមជម្រាបថា កម្ពុជាបាននាំចេញអង្ករទៅកាន់ទីផ្សារបរទេស បានជាង៦៣ម៉ឺនតោនកាលពីឆ្នាំ២០១៧ ។
កម្ពុជាទើបនឹងគ្រងពានរង្វាន់អង្ករល្អជាងគេបំផុតក្នុងពិភពលោកសម្រាប់ឆ្នាំ ២០១៨នេះ ក្នុងសន្និសីទស្រូវអង្ករពិភពលោកលើកទី១០ នៅប្រទេសវៀតណាម។
អង្ករកម្ពុជានាំទៅទីផ្សារអឺរ៉ុបបានកើនឡើងជាបន្តបន្ទាប់ចាប់ពី ១៣ ភាគរយ កាលពីឆ្នាំ ២០១៣ និងកើនឡើងរហូតដល់ ២១ ភាគរយ កាលពីឆ្នាំ ២០១៧។ ប៉ុន្តែទីផ្សារអង្កររបស់កសិករអឺរ៉ុបបានធ្លាក់ចុះពី ៥២ ភាគរយ មកនៅត្រឹម ៣០ ភាគរយក្នុងរយៈពេលដូចគ្នា៕
