កាលពីថ្ងៃទី ២៦តុលា ប្រធានាធិបតី Maithripala Sirisena បានបណ្ដេញលោក នាយករដ្ឋន្ត្រី Ranil Wickremesinghe ពីតំណែងដែលនាំឱ្យ មានការបែកបាក់ក្នុងរដ្ឋាភិបាលចម្រុះកើតចេញពីការបោះឆ្នោតកាលពីឆ្នាំ២០១៥។ ហេតុផលនាំឱ្យមានស្ថានភាពបែបនេះ គឺមានកត្តាជាច្រើននៅពីក្រោយ។ តែបែបនេះក្ដី រដ្ឋមន្ត្រីម្នាក់របស់ប្រទេសនេះ បាននិយាយថា ការបែកបាក់នយោបាយនៅពេលនេះ គឺដោយសារតែចិនបានចំណាយលុយច្រើនលានដុលា្លរទិញតំណាងរាស្ត្ររបស់ប្រទេសនេះ។
អតីតប្រធានាធិបតី Mahinda Rajapaksa ជាអ្នកឈ្នះសង្រ្គាមស៊ីវិលជិត៣ទសវត្ស។ បុរសនេះ ត្រូវបានប្រជាជនស្រីលង្កា ហៅថាជាបុរសខ្លាំង ដោយ សារតែលោកប្រើប្រាស់ អំណាចកណ្ដាប់ដៃដែកគាបសង្គត់ក្រុមប្រឆាំងក្រោមលេសថាមានទំនាក់ទំនងជាមួយពួកឧទ្ទាមខ្លាតាមីឡ។ ក្រោមអំណាចរបស់បុរសនេះ ប្រជាធិបតេយ្យនិងសេរីភាពស្រីលង្កាស្ថិតក្រោមភាភរួមរឹតជាខ្លាំង។ សេរីភាពប្រព័ន្ធផ្សព្វផ្សាយដែលជាឧបករណ៏ពង្រឹងការតស៊ូរបស់ពលរដ្ឋដើម្បីសេរីភាពត្រូវបានរឹតបន្តឹងជាខ្លាំង។
អ្នកនយោបាយក្រុមប្រឆាំងត្រូវបំបិទសេរីភាព។ តែជាអកុលស បុរសខ្លាំងនេះ មានការបែកបាក់ផ្ទៃក្នុងបក្ស ជាខ្លាំងនាំឱ្យ លោកMaithripala Sirisena ដែល សព្វថ្ងៃជាប្រធានាធិបតី បានបង្កើតគណបក្ស ដាច់ដោយឡែក ហើយ បានច្របាច់ចូលគ្នា ជាមួយគណបក្សប្រឆាំងរបស់នាយករដ្ឋ Ranil Wickremesinghe។ ទីបំផុតលោកបានឈ្នះឆ្នោត នៅក្នុងការបោះឆ្នោតប្រធានា ធិបតីកាលពីឆ្នាំ២០១៥គឺឈ្នះលោក Mahinda ។
តើកត្តានយោបាយសេដ្ឋកិច្ច និងឥទ្ធិពលចិន នាំឱ្យមានការបែកបាក់ជាតិស្រីលង្កាមែនឬ?
រដ្ឋមន្ត្រីម្នាក់របស់នាយករដ្ឋមន្ត្រី Ranil Wickremesinghe គឺលោក Ranjan Ramanayake បានប្រាប់សារព័ត៌មាន The Economic Times ដោយចោទចោទថាចិន បានចំណាយប្រាក់អោយលោក Rajapaksa ដើម្បីទិញអ្នកតំណាងរាស្ត្រស្រីលង្កកា។
លោកបានបញ្ជាក់ដូចនេះថា«សូមប្រាប់ចិនថាកុំចំណាយប្រាក់រាប់លានដុល្លារដើម្បីទិញអ្នកតំណាងរាស្ត្រស្រីលង្កាអី គឺអ្នកទិញ ប្រទេសនេះទាំងអស់ម្ដងទៅ»។តែ ស្ថានទូតចិន នៅក្រុងកូឡំបូបានបដិសេធ ការចោទប្រកាន់របស់អ្នកនយោបាយស្រីលង្ការូបនេះ។
លោក Mahinda Rajapaksa បានដឹកនាំប្រទេសស្រីលង្កា រយៈពេល១០ឆ្នាំ ។ លោក ជាមេដឹកនាំដែលមាននិន្នាការទៅរកប្រទេសចិនជាខ្លាំង។ ភាពស្និទ្ធស្នារបស់លោក ក្រោមឥទ្ធិពលចិន គឺ ការដាក់ទុនវិនិយោគរបស់ចិន នាំឱ្យការដឹកនាំរបស់លោក មានភាពរុងរឿងនិងអភិវឌ្ឍជាខ្លាំង ខណៈប្រទេសនេះជាប់បំណុលចិនរាប់ពាន់លានដុលា្លរ។ តែគ្រួសារ និងបក្សពួករបស់លោក ត្រូវបានរកឃើញថាបានក្លាយជាអ្នកមានប្រាក់ស្ដុកស្ដម្ភក្រោមការវិនិយោគមកពីប្រទេសចិន។
លោក Mahinda Rajapaksa ត្រូវបានតែងតាំងជានាយករដ្ឋមន្ត្រីថ្មីក្រោមការបែកបាក់ជាតិ
ភ្លាមៗបន្ទាប់ពី លោក ប្រធានាធិបតី Maithripala Sirisena បានបណ្ដេញលោក នាយករដ្ឋន្ត្រី Ranil Wickremesinghe ពីតំណែង គឺលោក Mahinda Rajapaksa ស្រាប់តែត្រូវបានតែងតាំងជានាយករដ្ឋមន្ត្រី។ លោក Mahinda បានបង្ហាញអារម្មណ៍រំភើប ដោយគិតថា លោកសមនឹងទទួលតំណែងនេះ ទោះជាលោកធ្លាប់ជាប្រធានាធិបតីក៏ដោយ។ មិនថាឡើយ ក្រុមលោក Mahinda សប្បាយចិត្តគឺមេដឹកនាំចិន ក៏សប្បាយចិត្តដែរព្រោះមិត្តរបស់ខ្លួនបានឡើងកាន់អំណាចម្ដងទៀត។ មេដឹកនាំចិន បានសាទរលោក លោក Mahinda ជានាយករដ្ឋមន្ត្រី។
មូលហេតុនៃការបណ្ដេញលោក Ranil Wickremesingheពីតំណែង
មានកត្តាជាច្រើននៅពីក្រោយរឿងនេះ។ កត្តាទីមួយគឺអាចមកពីការបែកបាក់ក្នុងរដ្ឋាភិបាល ចម្រុះដែលមិនចុះសម្រុងគ្នា លើគោលនយោបាយ ការបរទេសនិងកិច្ចការវិនិយោគធំៗ។ កត្តាមួយទៀត គឺដោយសារតែលោក ប្រធានាធិបតី Maithripala Sirisena ព្យាយាមពង្រីកអំណាចរបស់លោក ដែល ធ្វើឱ្យលោក Ranil Wickremesinghe ចោទថា លោកប្រើអំណាចហួសព្រំដែន ហើយប៉ះពាល់រដ្ឋធម្មនុញ្ញ។ តែមួយទៀតគេថា ជាល្បិចរបស់ប្រធានាធិបតី ចង់ ធ្វើតេស អំណាចនិងទិ្ធពលរបស់លោក Mahinda ។ លោកចង់អោយ លោក Mahinda ឆ្លងកាត់ការបោះឆ្នោតពីសមា ជិកសភាថាតើមានសំឡេងគ្រប់គ្រាន់ដើម្បីគឺទ្រដែរទេ។
រដ្ឋសភាប្រទេសស្រីលង្កាមានសមាជិក ២២៥រូប ។ រដ្ឋសភានេះ នឹងកោះប្រជុំដើម្បីបោះឆ្នោតទុកចិត្តលោក Mahinda នៅថ្ងៃទី៧វិច្ឆិកា។ ប្រធានរដ្ឋសភាKaru Jayasuriyaបានប្រកាសថា លោកមានការខកចិត្តចំពោះហេតុការណ៍នេះ។ លោកទទូច ឱ្យ ស្ដារសភាឡើងវិញ បើពុំនោះទេ ប្រទេសនឹងធ្លាក់ក្នុងភាព ចលាចល ។ លោកក៏ទទូចឱ្យ ប្រធានាធិបតី Maithripala ពិចារណាឡើងវិញូ ចំពោះ ការដកលោក Wickremesinghe។ លោក ចំណែក អ្នកតំណាងរាស្ត្រ គាំទ្រ លោក Wickremesinghe ទាមទារឱ្យបោះឆ្នោត ទំលាក់លោក Mahinda នៅថ្ងៃបោះឆ្នោតនោះតែម្ដង៕