ភ្នំពេញ ៖ អាជ្ញាធរមីនកម្ពុជា CMAA បានឲ្យដឹងថា ប្រទេសតួកគី បានចុះហត្ថលេខាលើអនុស្សរណៈ ស្ដីពីកិច្ចសហប្រតិបត្ដិការរវាងអាជ្ញាធរមីនកម្ពុជា ក្នុងការគ្រប់គ្រងសកម្មភាពកម្ចាត់មីន និងសង្គ្រោះជនពិការដោយសារមីន និងមជ្ឈមណ្ឌលជាតិសកម្មភាពមីនតួកគី។ នេះបើតាមសេចក្ដីថ្លែងការណ៍ របស់អាជ្ញាធរកម្ពុជា គ្រប់គ្រងសកម្មភាពកម្ចាត់មីន និងសង្គ្រោះជនពិការដោយសារមីន កាលពីថ្ងៃចន្ទ ទី២២ ខែតុលា។
សេចក្ដីថ្លែងការណ៍នេះឲ្យដឹងទៀតថា អនុស្សរណៈនេះធ្វើឡើងខណៈដែលសម្ដេច ហ៊ុន សែន ទៅបំពេញទស្សនកិច្ចជាផ្លូវការនៅប្រទេសតួកគី កាលពីថ្ងៃទី២១ ខែតុលា។ អាជ្ញាធរមីនកម្ពុជា បញ្ជាក់ថា ការចុះអនុស្សរណៈនេះ គឺជាការផ្ដល់ទំនុកបន្ថែមទៀតដល់កម្ពុជា ដើម្បីឈានទៅសម្រេចនូវយុទ្ធសាស្ដ្រ “ឆ្ពោះទៅរកកម្ពុជាមួយដែលគ្មានមីន ឆ្នាំ២០២៥”។ អាជ្ញាធរមីនកម្ពុជា សង្កត់ធ្ងន់ថា បើទោះបីជាកម្ពុជា បានខិតខំប្រឹងប្រែងបោសម្អាតមីន ចាប់តាំងពីឆ្នាំ១៩៩២ មកក្ដី ក៏ពលរដ្ឋកម្ពុជាជាច្រើន នៅតែទទួលរងផលប៉ះពាល់ដោយសារមីន និងសំណល់ជាតិផ្ទុះពីសង្គ្រាមនៅឡើយ។
អាជ្ញាធរមីនកម្ពុជា ហៅកាត់ថា CMAA បានបង្កើតឡើងក្រោមព្រះរាជក្រឹត្យលេខ ១៧៧ នៅថ្ងៃទី០៦ ខែកញ្ញា ឆ្នាំ២០០០ និងបានប្រគល់សិទ្ធិដើម្បីគ្រប់គ្រង តាមដាននិងសម្របសម្រួលវិស័យសកម្មភាពមីននៅកម្ពុជា។ អាជ្ញាធរមីន គឺជាសេនាធិការរបស់រាជរដ្ឋាភិបាលកម្ពុជា ដែលមានបេសកកម្មដឹកនាំ និងគ្រប់គ្រងវិស័យកិច្ចប្រតិបត្ដិការសកម្មភាពមីន ក្នុងព្រះរាជាណាចក្រកម្ពុជា ក្នុងគោលដៅជំរុញ ចលនាបោសសម្អាតមីន ការប្រើប្រាស់ជំនួយ និងការបែងចែកដីធ្លី ដែលបានបោសសម្អាតមីនរួចហើយ ឲ្យមានសុវត្ថិភាព ប្រិសិទ្ធភាព និងតម្លាភាព ព្រមទាំងសម្រួលកិច្ចប្រតិបត្ដិការរវាងបណ្ដាលប្រតិបត្ដិករទាំងអស់៕
