ភ្នំពេញ៖ ការិយាល័យអ្នកនាំពាក្យរាជរដ្ឋាភិបាល ព្រមានដកសមាជិកភាពរបស់កម្ពុជានៅក្នុងសហភាពអន្តរសភា (IPU)។ ការព្រមានរបស់រដ្ឋាភិបាលទំនងជាមិនពេញចំពោះ IPU អនុម័តសេចក្តីសម្រេចទទួលស្គាល់ភាពស្របច្បាប់របស់អតីតតំណាងគណបក្សសង្ត្រោះជាតិដែលត្រូវបានរំលាយដោយតុលាការកំពូល។
គណៈកម្មាធិការសិទ្ធិមនុស្ស របស់សហភាពអន្តរសភា IPU កាលពីថ្ងៃទី ១៨ ខែ តុលា បានអនុម័តសេចក្តីសម្រេច អំពីស្ថានភាពនយោបាយនៅប្រទេសកម្ពុជាដោយប្រកាសទទួលស្គាល់ភាពស្របច្បាប់របស់CNRP ។
ករណីនេះនាំឱ្យការិយាល័យអ្នកនាំពាក្យរាជរដ្ឋាភិបាលកម្ពុជានៅថ្ងៃទី ២៦ តុលា ម្សិលមិញសម្រេចចេញសេចក្តីបំភ្លឺមួយ បកស្រាយចំពោះការលើកឡើងរបស់គណៈកម្មាធិការសិទ្ធិមនុស្សសហភាពអន្តរសភា។
ក្នុងលិខិតបំភ្លឺបញ្ជាក់ថា អាស្រ័យដោយមានការភ័ន្ដច្រឡំពីមតិមហាជនចំពោះការលើកឡើង របស់ IPU។ កម្ពុជាសូមបំភ្លឺឱ្យអស់ការសង្ស័យថា កម្ពុជាមានបំណង និងទិសដៅដូចសហភាពអន្តរសភា ក្នុងការលើកស្ទួយនិងពង្រឹងវប្បធម៌សន្ទនានយោបាយ ប៉ុន្តែកិច្ចសន្ទនានយោបាយនោះគ្មានវិសាលភាពនៅក្នុងច្បាប់ឡើយ។
ក្នុងលិខិតបំភ្លឺនេះ បញ្ជក់ថា កម្ពុជាមិនស្ថិតនៅក្រោមការបង្គាប់បញ្ជាពីជនណា ក្រុមណា អង្គការណាទាំំងក្នុងនិងក្រៅប្រទេសទេ។ កម្ពុជាមានសិទ្ធិរក្សាពេញលេញ និងគ្រប់ពេលវេលា ក្នុងការដកសមាជិកភាពរបស់កម្ពុជាចេញពី IPU ប្រសិនបើមានការឈ្លានពាន ឬជ្រៀតជ្រែកធ្ងន់ធ្ងរមកលើដែនអធិបតេយ្យភាព និងផលប្រយោជន៍កម្ពុជា។
ពាក់ព័ន្ធការសម្រេចរបស់សហភាពអន្តរសភា IPU នេះ ប្រតិភូរដ្ឋសភាកម្ពុជាដែលដឹកនាំដោយអនុប្រធានរដ្ឋសភាទី២ បានចាត់ទុកសេចក្តីសម្រេចនេះថា មានភាពលំអៀងទៅរកអតីតតំណាងរាស្ត្រគណបក្សប្រឆាំង ដែលត្រូវបានតុលាការកាត់ផ្តន្ទាទោសដោយទោសក្បត់ជាតិ។
អ្នកវិភាគបញ្ហានយោបាយនិងសង្គមវ័យក្មេង កញ្ញា លី ស្រីស្រស់ យល់ថា ប្រសិនបើកម្ពុជា ដក់សមាជិកភាពចេញពី IPU កម្ពុជានឹងអាចបាត់ប្រយោជន៍ និងប៉ះពាល់មុខមាត់កម្ពុជាលើឆាកអន្តរជាតិ៕
