ភ្នំពេញ ៖ ក្រសួងបរិស្ថានបានបញ្ជាឲ្យ ស្ថាប័នពាក់ព័ន្ធ និងរដ្ឋបាលថ្នាក់ក្រោមជាតិទាំងអស់ ចាត់វិធានការទប់ស្កាត់ និងបង្ក្រាបជាបន្ទាន់ នូវអ្នកដែលបានចូលទៅកាន់កាប់ដីដោយខុសច្បាប់នៅតំបន់ ឧទ្យានជាតិព្រះសុរាម្រិត-កុសមៈ “គិរីរម្យ”។ សេចក្ដីជូនដំណឹងរបស់ក្រសួងផ្សព្វផ្សាយកាលពីថ្ងៃទី២៤ ខែតុលា។
ក្រសួងបរិស្ថានបញ្ជាក់ថា កន្លងមក ក្រសួងពិនិត្យឃើញថា តំបន់មួយចំនួននៅក្នុងឧទ្យានជាតិព្រះសុរាម្រិត-កុសមៈ “គិរីរម្យ” មានចលនាទន្ទ្រាន កាន់កាប់ដីរដ្ឋដោយខុសច្បាប់ ដែលមានទាំងការទន្ទ្រានកាន់កាប់ ការផ្ទេរ និងទិញ លក់ ដី ដោយខុសច្បាប់ថែមទៀត។ សកម្មភាពនេះ បានប្រព្រឹត្ដផ្ទុយនិងច្បាប់ស្ដីពីតំបន់ការពារធម្មជាតិ បើទោះជាក្រសួងបរិស្ថាន រដ្ឋបាលខេត្ដកំពង់ស្ពឺ និងរដ្ឋបាលខេត្ដព្រះសីហនុ បានខិតខំការពារ និងទប់ស្កាត់យ៉ាងណាក៏ដោយ។
ដើម្បីទប់ស្កាត់សកម្មភាពល្មើសច្បាប់ទាំងនេះ ក្រសួងបរិស្ថានបញ្ជាឲ្យស្ថាប័ន និងរដ្ឋបាលថ្នាក់ក្រោមជាតិពាក់ព័ន្ធទាំងអស់ ត្រូវចាត់វិធានការទប់ស្កាត់ និងបង្ក្រាប ការកាប់គាស់ រុករានដីព្រៃ ឆ្ការ ដុត និងឈូសឆាយដីព្រៃ ព្រមទាំងការសាងសង់ផ្ទះ សង់តូប សង់រោង ដើម្បីយកដីធ្វើជាកម្មសិទ្ធិ នៅក្នុងដែនឧទ្យានជាតិព្រះសរាម្រិត-កុសមៈ “គិរីរម្យ” ដែលជាបទល្មើសធនធានធម្មជាតិ មានចែងក្នុងមាត្រា ៦២ និងមាត្រា ៦៣ នៃច្បាប់ស្ដីពីតំបន់ការពារធម្មជាតិ។ បន្ថែមពីនេះ ក្រសួងបរិស្ថាន សង្កត់ធ្ងន់ថា រដ្ឋបាលមូលដ្ឋាន ជាពិសេសភូម ឃុំ និងស្រុក ត្រូវបញ្ឈប់ជាបន្ទាន់នូវការបញ្ជាក់លិខិត ទិញ លក់ ដីរដ្ឋ និងវិញទៀតត្រូវបញ្ឈប់ដូចគ្នាដែរ គឺការផ្ទេរកម្មសិទ្ធ ឬការបញ្ជាក់ប្លង់បង្ហាញទីតាំងដី នៅក្នុងដែន ឧទ្យានជាតិព្រះសុរាម្រិត-កុសមៈ “គិរីរម្យ”។
លើសពីនេះក្រសួងបរិស្ថានបញ្ជាក់ទៀតថា ក្រសួងសូមបដិសេធចោលទាំងអស់នូវរាល់ឯកសារពាក់ព័ន្ធនឹងការកាន់កាប់ដី ដោយខុសច្បាប់គ្រប់ប្រភេទ ដែលមានដូចជា ការកាប់ទន្ទ្រានកាន់កាប់ ការផ្ទេរ និងទិញលក់ដីដោយខុសច្បាប់ នៅក្នុងឧទ្យានជាតិព្រះសុរាម្រិត-កុសមៈ “គិរីរម្យ”។ ចំណែកអ្នកដែលនិងកំពុងកាន់កាប់ដីដោយខុសច្បាប់ត្រូវបញ្ឈប់សកម្មភាពទាំងអស់ ដែលរាប់ទាំងការឈូសឆាយ និងការសាងសង់សំណង់នានា ជាបន្ទាន់ ហើយត្រូវរុះរើសំណង់គ្រប់ប្រភេទ ដោយខ្លួនឯង និងប្រគល់ទីតាំងដីនោះ ដោយឥតលក្ខខណ្ឌ មកក្រសួងបរិស្ថានគ្រប់គ្រងវិញ។
ក្រសួងបរិស្ថាន រំពឹងថា ក្រោយពីទទួលបានសេចក្ដីជូនដំណឹងនេះ គ្រប់អង្គភាពមានសមត្ថកិច្ច រដ្ឋបាលមូលដ្ឋាន សាធារណជន ពិសេសពលរដ្ឋដែលកំពុងកាន់កាប់ដីដោយខុសច្បាប់ នៅតំបន់ឧទ្យានជាតិព្រះសុរាម្រិត-កុសមៈ “គិរីរម្យ”នេះ។
សូមជម្រាបថា កាលពីឆ្នាំ១៩៩៣ អតីតព្រះមហាវីរក្សត្រ សម្ដេច សីហនុ ព្រះអង្គបានកំណត់ដាក់តំបន់គិរីរម្យ ដែលមានទំហំផ្ទៃដីជាង ៣ម៉ឺនហិកតា ទៅជាតំបន់ឧទ្យានជាតិ ដើម្បីថែរក្សាធនធានធម្មជាតិ និងដើម្បីបម្រើឲ្យវិស័យទេសចរណ៍ ដោយមិនឲ្យខូចខាតដល់បរិស្ថានឡើយ។ ភ្នំគិរីរម្យ គឺស្ថិតនៅក្នុងឃុំចំបក់ ស្រុកភ្នំស្រួច ខេត្ដកំពង់ស្ពឺ ត្រូវបានដាក់សម្ពោធទៅជាឧទ្យានជាតិព្រះសុរាម្រិត កុសមៈ កាលពីខែមិថុនា ឆ្នាំ១៩៩៥ ដើម្បីរក្សទុកជាតំបន់អភិរសក្ស។ ភ្នំគិរីរម្យ មានកម្ពស់ ៧០០ម៉ែត្រ ស្ថិតនៅចំងាយ ១១២គីឡូម៉ត្រ ពីរាជធានីភ្នំពេញ ធ្វើដំណើរតាមបណ្ដោយផ្លូវជាតិលេខ ៤ ទៅកាន់ខេត្ដព្រះសីហនុ៕
