ភ្នំពេញ ៖ គណៈកម្មាធិការអន្ដរជាតិ នៃកាកបាទក្រហម (ICRC) ប្រចាំទេសកម្ពុជា និងនៅទីស្នាក់ការកណ្ដាល ក្នុងទីក្រុងហ្សឺណែវ បានរួមគ្នាបង្កើតយុទ្ធនាការរៃអង្គាសប្រាក់ ដើម្បីកសាងដំបូលថ្មីមួយ នៅទីតាំងហាត់បាល់បោះ ក្នុងខេត្ដបាត់ដំបង។ ការសាងសង់ដំបូងនេះ គឺដើម្បីផ្ដល់ភាពងាយស្រួល ដល់ក្រុមកីឡាការិនីបាល់បោះ ដែលជាជនពិការ។ យុទ្ធនាការនេះ នឹងធ្វើរយៈពេល ៤៥ថ្ងៃ ហើយគឺត្រូវការទឹកប្រាក់ប្រមាណជាង ៩ម៉ឺនដុល្លារ។
លោក លៀ ស៊ីណា រាយការណ៍ ៖
សេចក្ដីប្រកាសព័ត៌មានរបស់ គណៈកម្មាធិការអន្ដរជាតិ នៃកាកបាទក្រហម ហៅកាត់ថា (ICRC) ដែលផ្សព្វផ្សាយកាលពីថ្ងៃទី២៤ ខែតុលា បញ្ជាក់ថា នេះជាយុទ្ធនាការ រៃអង្គាសប្រាក់ ដើម្បីសាងសង់ដំបូល សម្រាប់ក្រុមកីឡាការិនីបាល់បោះ ជាជនពិការ របស់កម្ពុជា ក្នុងការហាត់បាល់។ យុទ្ធនាការនេះ គឺធ្វឡើងត្រឹមតែរយៈពេល ៤៥ថ្ងៃប៉ុណ្ណោះ ដោយចាប់ផ្ដើមពីថ្ងៃទី២៤ ខែតុលា ឆ្នាំ២០១៨ ដល់ថ្ងៃទី៣០ ខែវិច្ឆិកា ឆ្នាំ២០១៨។ ការសាងសង់ដំបូលសម្រាប់ឲ្យក្រុមកីឡាការិនីពិការ ហាត់បាល់បោះនេះ ត្រូវការទឹកប្រាក់ចំនួន ៩ម៉ឺន ៥ពាន់ដុល្លារ។ ទីតាំងដែលត្រូវសាងសង់ គឺស្ថិតក្នុងបណ្ឌលស្ដារលទ្ធភាពពលកម្មកាយសម្បទា នៅក្នុងខេត្ដបាត់ដំបង។
លោកស្រី ចាន់ ផល្គុណ មន្ដ្រីទំនាក់ទំនង ICRC ប្រចាំប្រទេសកម្ពុជា បានបញ្ជាក់បន្ថែមប្រាប់វិទ្យុស្ដ្រីថា គណៈកម្មាធិការអន្ដរជាតិ នៃកាកបាទក្រហម មានគម្រោងគាំទ្រដល់ជនពិការ ពិសេសស្ដ្រី នៅខេត្ដជុំវិញបឹងទន្លេសាប។ បច្ចុប្បន្ននេះ ICRC បានផ្ដល់ការគាំទ្រដល់ស្ដ្រីជាជនពិការ ហើយមានចំណងហាត់បាល់បោះនេះ នៅខេត្ដបាត់ដំបង និងខេត្ដកំពង់ស្ពឺ ៖«សព្វថ្ងៃហ្នឹងគាត់មានពីរក្រុម ក្រុមមួយគឺនៅខាងបាត់ដំបងហ្នឹង ហើយមួយក្រុមទៀតគឺនៅខាងកំពង់ស្ពឺ។ ដោយសារតែ ICRC យើងមានគម្រោងមួយ គេហៅថា គម្រោង ស្ដារលទ្ធភាពពលកម្មកាយសម្បទា យើងធ្វើទៅលើជនពិការយើងផ្ដល់ជារណបជើងសិប្បនិម្មិត ហើយនិងការព្យាបាលជូនដល់ពួកគាត់។ អញ្ចឹងទៅយើងមានកម្មវិធីតូចមួយផ្សេងទៀត សម្រាប់ដាក់ចូលពិការភាពរបស់ពួកគាត់ចូលទៅក្នុងសង្គម។ ដើម្បីឲ្យពួកគាត់ មានឱកាស បានចូលរួមក្នុងសង្គមតាមរូបភាពផ្សេងៗ។ ឧទាហរណ៍ដូចកីឡាអញ្ចឹង»។
ក្រុមកីឡាបាល់បោះរទេះនារីកម្ពុជា មានសមាជិកសរុបទាំងអស់ ទាំងនៅបាត់ដំបង និងកំពង់ស្ពឺ គឺមានចំនួន ២២រូប ដែលក្នុងនោះមានអាយុចាប់ពី ២២ឆ្នាំ ដល់ ៣៥ឆ្នាំ។ សមាជិកខ្លះពិការដោយសារគ្រាប់មីន ខ្លះទៀតពិការដោយសារជំងឺ ឬហៅកាត់ថា ប៉ូលីយ៉ូ ដោយសារតែកង្វះការទទួលបានវ៉ាក់ស៊ាំងក្នុងប្រទេសកម្ពុជា។
កីឡាបាល់បោះនេះ បានកែប្រែជីវិតរបស់ក្រុមស្ដ្រីជាជនពិការ ឲ្យមានក្ដីសង្ឃឹម និងការខិតក្នុងជីវិតឡើងវិញ។ កីឡាការិនីរទេះ ដែលជាជនពិការ ទាំង ២២រូបនេះ ពួកគាត់ បានបង្ហាញសមត្ថភាព និងទេពកោសល្យដែលម្នាក់ៗមាន ដើម្បីលេងបាល់បោះនេះ។ ពួកគាត់ គឺពោរពេញទៅដោយទំនុកចិត្ដ ហើយមានជំនឿជាក់លើខ្លួនឯង។ ក្រុមកីឡាការិនីបាល់បោះរទេះនេះ បានខិតខំក្នុងការហ្វឹកហាត់ជារៀងរាល់ថ្ងៃ ប៉ុន្ដែបញ្ហាអាកាសធាតុគឺបញ្ហាចម្បងរារាំងដល់សកម្មភាពរបស់ពួកគាត់។
ក្រោយពិនិត្យឃើញថា ពួកគាត់បានជួបផលលំបាកក្នុងការហាត់ នៅហាលវាល ដែលប្រឈមនិងអាកាសធាតុ ទន្ទឹមនិងកាយសប្បទាពួកគាត់ មិនល្អ ផងទើប គណៈកម្មាធិការអន្ដរជាតិ នៃកាកបាទក្រហម ហៅកាត់ថា (ICRC) ផ្ដួចផ្ដើម យុទ្ធនាការរៃអង្គាសប្រាក់ ដើម្បីសាងសង់ដំបូល ហាត់បាល់សម្រាប់ពួកគាត់។ លោកស្រី ចាន់ ផល្គុណ មានប្រសាសន៍ថា បើទោះជាការរួមចំណែកតិចក្ដីច្រើនក្ដី ក៏ប្រជាពលរដ្ឋគ្រប់រូបគួរតែចូលរួម ដើម្បីជាការលើកទឹកចិត្ដដល់ជនពិការ ពិសេសពួកគាត់ជាស្ដ្រីថែមទៀត ៖«អ្វីដែលខ្ញុំចង់អំពាវនាវ គឺចង់ឲ្យមហាជនទូទៅគាត់ យល់ដឹងបន្ថែមពីក្រុមនារីបាល់បោះហ្នឹង។ ពីព្រោះតែរាល់ថ្ងៃនេះ គឺពួកគាត់ខំប្រឹងលេងណាស់ អញ្ចឹងពួកគាត់ចង់ក្លាយជាមនុស្សមានតម្លៃសម្រាប់ជាតិដែរ។ អញ្ចឹងស្របពេលដែលពួកគាត់ខំប្រឹងហ្នឹង យើងទាំងអស់គ្នាគួរឲ្យតម្លៃគាត់ និង លើកទឹកចិត្ដពួកគាត់។ ឥឡូវអ្វីដែលពួកគាត់កំពុងជួបប្រទះ គឺអត់មានដំបូលហាត់ឲ្យត្រឹមត្រូវ អញ្ចឹងអ្វីដែលយើងអាចរួមចំណែកជួយបាន សុំឲ្យជួយទាំងអស់គ្នា»។
ក្រុមបាល់បោះរទេះនារីកម្ពុជា ទាំង ២២រូបនេះ ទើបតែបានបញ្ចប់ការចូលរួមប្រកួតជាលក្ខណៈអន្ដរជាតិ អាស៊ាន ប៉ារ៉ាហ្គេម នៅទីក្រុហ្សាកាតា ប្រទេសឥណ្ឌា កាលពេលថ្មីៗនេះ។ ពួកគាត់មានក្ដីស្រមៃ រំពឹងថា នឹងអាចបានចូលរួមប្រកូតជាថ្មីទៀត កីឡាប៉ារ៉ាឡាំពិកហ្គេម នៅទីក្រុងតូក្យូ ប្រទេសជប៉ុន ក្នុងឆ្នាំ២០២០ ខាងមុខ។
លោក ឌែនវើរ័ ក្រាហាម ប្រធានគម្រោងស្ដារលទ្ធភាពពលកម្មកាយសម្បទា បានប្រាប់ឲ្យដឹងថា ទឹកប្រាក់ដែលបានមកពីការរៃអង្គាសនេះ នឹងផ្ដល់ជាធនធានមួយនៅក្នុងការជួយជម្រុញពួកគាត់ ឲ្យខិតខំទាំងកម្លាំងកាយចិត្ដ ដើម្បីពង្រឹងសមត្ថភាពក្រុមឲ្យបានកាន់តែប្រសើរជាងនេះ ដើម្បីសម្រេចនូវក្ដីប្រាថ្នារបស់ពួគេ ដែលចេញទៅប្រកួតប៉ារ៉ាឡាំពិកហ្គេម នៅទីក្រុងតូក្យូ នៅឆ្នាំ២០២០។
បើទោះបីជាគោលបំណងចម្បង គឺជាការរៃអង្គាសប្រាក់ពីអ្នកគាំទ្រ និងអ្នកឧបត្ថមថ្មីៗក៏ដោយ ក៏ ICRC ចង់ឆ្លៀតយកឱកាសនេះ បំភ្លឺបង្ហាញអំពីទុក្ខលំបាកដែលស្ដ្រី មានពិការភាពបានជួបប្រទះក្នុងប្រទេសកម្ពុជា និងជុំវិញសកលលោក។
ជាមួយគ្នានេះលោក រ៉ូម៉ាន់ ប៉ារ៉ាមូណូវ ប្រធានបេសកកម្មប្រចាំប្រទេសកម្ពុជា មានប្រសាសន៍ឲ្យដឹងថា នេះគឺជាលើកដំបូងហើយ ដែល ICRC បានបង្កើតឲ្យមានយុទ្ធនាការរៃអង្គាសប្រាក់ជាសកលបែបនេះ សម្រាប់ប្រទេសកម្ពុជា។ លោកបន្ដថា អ្វីដែលសំខាន់បំផុតនោះ គឺជាការលើកស្ទួយដល់ការដាក់បញ្ចូលពិការភាពទៅក្នុងសង្គម ដើម្បីឲ្យពួកគាត់អាចមានឱកាសធ្វើសមាហរណកម្មក្នុងសង្គម ហើយលើកទឹកចិត្ដពួកគេឲ្យចូលរួមកាន់តែច្រើន។
លោកស្រី ចាន់ ផល្គុណ ចង់ឲ្យប្រជាពលរដ្ឋគ្រប់រូបប្ដូរផ្នត់គំនិតដែលធ្លាប់តែគិតថា ជនពិការមិនអាចធ្វើអ្វីបាន មកចូលរួមគាំទ្រលើកទឹកចិត្ដ និងផ្ដល់កម្លាំងចិត្ដដល់ពួកគាត់វិញ។ លើសពីនេះលោកស្រី ស្នើឲ្យស្ដ្រីគ្រប់រូប ខិតខំដោយការតាំងចិត្ដ និងព្យាយាម ដូចក្រុមកីឡាបាល់បោះរទេះនារីកម្ពុជា មួយក្រុមនេះ ក្នុងការបង្ហាញសមត្ថភាព នៅក្នុងសង្គម ៖«ចាស ខ្ញុំចង់ឲ្យនារីផ្សេងៗទូទៅ គឺថា អាចយកពួកគាត់ហ្នឹងជាគំរូក៏ថាបាន តែបើទោះជាមិនមែនជាគំរូអីណាស់ណា ក៏ប៉ុន្ដែគឺការតាំងចិត្ដ និងការព្យាយាម។ គឺយើងមើលទៅឃើញពួកគាត់លំបាក ប៉ុន្ដែពួកគាត់អាចក្លាយជាជនមួយដែលគំរូថ្នាក់ជាតិ សម្រាប់នារីទូទៅ ថា ពួកគាត់អាចធ្វើបាន។ អញ្ចឹងស្ដ្រីផ្សេងទៀត ដែលចង់ឲ្យក្ដីស្រមៃរបស់ពួកគាត់ក្លាយជាការពិត ចាំបាច់គឺត្រូវមានក្ដីតាំងចិត្ដ ការព្យាយាមហ្នឹងឯង»។
សូមជម្រាបថា គណៈកម្មាធិការអន្ដរជាតិ នៃកាកបាទក្រហម ហៅកាត់ថា (ICRC) គឺមានវត្ដមាន និងបានចុះប្រតិបត្ដិការសកម្មភាពមនុស្សធម៌ នៅក្នុងប្រទេសកម្ពុជាជាង ៣៨ឆ្នាំមកហើយ ក្រោយពីរបបកម្ពុជាប្រជាធិបតេយ្យបានបញ្ចប់ (ប៉ុលពត)។ ក្នុងចំណោមបេសកកម្មចម្បងរបស់ ICRC គម្រោងស្ដារលទ្ធភាពពលកម្មកាយសម្បទា គឺជាគម្រោងដ៏ចម្បងមួយក្នុងប្រទេសកម្ពុជា។
សម្រាប់អ្នកដែលចង់ចូលរួមបរិច្ចាកប្រាក់ ដល់ការសាងសង់ដំបូល ហាត់បាល់បោះ របស់ក្រុមកីឡាការិនី ដែលជាជនពិការនេះ អាចទូរស័ព្ទសាកសួរព័ត៌មានបន្ថែមទៅលោកស្រី ចាន់ ផល្គុណ តាមរយៈលេខ 017 940 036 ឬអ៊ីម៉ែល (Email) ៖ [email protected] និងមួយវិញទៀត សូមចូលទៅកាន់គេហទំព័រផ្លូវការ រៃអង្គាសប្រាក់ របស់ គណៈកម្មាធិការអន្ដរជាតិ នៃកាកបាទក្រហម ហៅកាត់ថា (ICRC) www.crowdfunding.icrc.org ៕
