បន្ទាប់ពីក្រុមគ្រូបង្រៀន សឹងតែគ្រប់រាជធានីខេត្ត ស្នើសុំដំឡើងប្រាក់ខែ នៅឆ្នាំ២០១៦ ចំនួន ១លានប្រាំសែនរៀល រួចមក លោក ហង់ ជូនណារ៉ុន រដ្ឋមន្ដ្រីក្រសួងអប់រំ បានឆ្លើយតបថា រដ្ឋាភិបាលនឹងដំឡើងប្រាក់បៀវត្សគ្រូបង្រៀននៅឆ្នាំ២០១៦នេះ ប៉ុន្តែលោករដ្ឋមន្ត្រីមិនបានបញ្ជាក់ថានឹងត្រូវដំឡើងប្រាក់ខែចំនួនប៉ុន្មានក្នុងមួយខែនោះទេ។
រដ្ឋមន្ត្រីក្រសួងអប់រំ យុវជន និងកីឡា ថានៅឆ្នាំ២០១៦ ខាងមុខនេះ រដ្ឋាភិបាលនឹងដំឡើងប្រាក់ខែដល់គ្រូបង្រៀន ដើម្បីលើកស្ទួយកិត្តិយស និងឋានៈពួកគាត់។
លោកហង់ ជួនណារ៉ុន បានថ្លែងបែបនេះ នៅក្នុងទិវាគ្រូបង្រៀន ដែលរៀបចំនៅវិទ្យាស្ថានបច្ចេកវិទ្យាកម្ពុជា នាថ្ងៃទី០៧ ខែតុលា ក្រោមប្រធានបទ «ការលើកកម្ពស់សក្ដានុពលបង្រៀន ដើម្បីកសាងសង្គម ប្រកបដោយនិរន្ដភាព»។ លោកបានលើកឡើងថា ដើម្បីលើក ស្ទួយកិត្តិយស និងឋានៈគ្រូបង្រៀននៅកម្ពុជានោះ រដ្ឋាភិបាលនឹងសម្រេចដំឡើងប្រាក់បៀវត្ស នៅឆ្នាំ២០១៦ខាងមុខ ដល់គ្រូបឋមសិក្សា គ្រូអនុវិទ្យាល័យ និងគ្រូវិទ្យាល័យ ទូទាំង រាជធានីខេត្ដ រួមទាំងធ្វើកំណែទម្រង់លើការបណ្ដុះបណ្ដាលគ្រូ និងសិស្សដែលពូកែ ឲ្យក្លាយទៅជាគ្រូបង្រៀនផងដែរ។ លោក ថា៖ «នៅថ្ងៃខាងមុខនេះ ឆ្នាំក្រោយនេះ សម្ដេចនាយករដ្ឋមន្ដ្រី នឹងបន្ដដំឡើងប្រាក់បៀ វត្សទៀត។ ខ្ញុំមិនទាន់អាចថាប៉ុន្មានទេ ព្រោះថា ថវិកានៅឆ្នាំ២០១៦ នឹងអនុម័ត ហើយ សម្ដេចនាយករដ្ឋមន្ដ្រី និងមានផែនការដំឡើងប្រាក់បៀវត្សទៀតបាទ។ ហើយទន្ទឹមនឹង នោះ យើងហៅថា ធ្វើយ៉ាងម៉េច ឲ្យគ្រូដែល សិស្សដែល ដូចថា ពូកែៗ ចូលធ្វើគ្រូ ហើយ យើងនឹងធ្វើកំណែទម្រង់បណ្ដុះបណ្ដាលគ្រូទៀត បាទ»។
ជុំវិញរឿងនេះដែរ ប្រធានស្ដីទីគ្រូបង្រៀនកម្ពុជាឯករាជ្យ លោកស្រី អ៊ុក ឆាយ៉ាវី សាទរចំពោះ ការលើកឡើងរបស់ក្រសួងអប់រំដូច្នេះថា៖ «ខ្ញុំសាទរ ប៉ុន្ដែសូមឲ្យក្រសួងចាត់វិធានការចំពោះទំនិញទីផ្សារ ក៏ដូចជា លោកគ្រូ អ្នកគ្រូយើងដែលមានប្រាក់បៀវត្សតិច កុំតឹងនូវផ្នែកអារម្មណ៍របស់គាត់ ដូចគ្រាន់តែ គាត់និយាយពីបញ្ហា សមាគម ពីបញ្ហាសហជីពនៅក្នុងសាលា បានចាប់ដាក់ពន្ធធនាគារ និងការផាកពិន័យនោះ។ ខ្ញុំមិនចង់ឃើញ ក្រសួងអប់រំ ក៏ដូចជា រដ្ឋាភិបាល ដែលកំពុងតែប្រើយន្ដការមួយ គាបសង្កត់ផ្នែកអារម្មណ៍ របស់លោកគ្រូ អ្នកគ្រូដែលទេ ចា៎»។
សូមបញ្ជាក់ផងដែរថា នៅក្នុងទិវាគ្រូបង្រៀនដែលរៀបចំឡើងដោយក្រសួងអប់រំយុវជន និងកីឡា លោក ហង់ ជួនណារ៉ុន បានរម្លឹកឲ្យដឹងថា ចាប់ពីឆ្នាំ២០១៣ រហូតមកដល់នឹងសព្វថ្ងៃនេះ ប្រាក់បៀវត្សគ្រូបង្រៀនបានកើនឡើងពី ពីរទៅបីដងហើយ ដោយលោក បញ្ជាក់ថា ប្រាក់បៀវត្សគ្រូបង្រៀនទាបបំផុតនៅពេលនេះសំរាប់គ្រូបឋម គឺ ៦៥ម៉ឺនរៀល ឯគ្រូអនុវិទ្យាល័យប្រមាណជា៧២ម៉ឺនរៀល ហើយសម្រាប់គ្រូនៅវិទ្យាល័យ គឺ៨០ម៉ឺនរៀល៕
