អ្នកនាំពាក្យទីស្ដីការគណៈរដ្ឋមន្ត្រីឲ្យដឹងថា លោកនាយករដ្ឋមន្ដ្រីហ៊ុនសែន នឹងបើកិច្ចប្រជុំគណៈរដ្ឋមន្ដ្រីពេញអង្គ នាថ្ងៃទី៩ ខែតុលា ឆ្នាំ២០១៥ វេលាម៉ោង៨:៣០នាទីព្រឹក នៅវិមានសន្ដិភាព ដើម្បីពិភាក្សាលើសេចក្ដីព្រាងច្បាប់ទូរគមនាគមន៍ និងសារព្រមានលើកញ្ចប់បារី។
លោក ផៃ ស៊ីផាន បានសរសេរលើហ្វេសប៊ុកផ្លូវការរបស់លោក នៅថ្ងៃទី៧ ខែតុលា ២០១៥នេះថា កិច្ចប្រជុំគណៈរដ្ឋមន្ដ្រីពេញអង្គ នាថ្ងៃសុក្រសប្ដាហ៍នេះ នឹងជជែកពិភាក្សាលើ របៀបវារៈមួយចំនួនដូចជា សេចក្ដីព្រាងច្បាប់ ស្តីពីទូរគមនាគមន៍ សេចក្តីព្រាងអនុក្រឹត្យ ស្តីពីការ បោះពុម្ពសារព្រមានសុខភាពជាភាសាខ្មែរ និងជារូបភាពលើកញ្ចប់ផលិតផលថ្នាំជក់ ព្រមទាំងបញ្ហាផ្សេងៗ ទាក់ទងនឹងសំណើសុំការយល់ព្រមពីគណៈរដ្ឋមន្ត្រី ដើម្បីស្នើសុំសច្ចាប័នពី ស្ថាប័ននីតិប្បញ្ញត្តិ លើកិច្ចព្រមព្រៀងស្តីពីការបង្កើតធនាគារវិនិយោគហេដ្ឋារចនាសម្ព័ន្ធអាស៊ី។
