ភ្នំពេញ៖ ពលរដ្ឋស្លាប់៣នាក់ និងរបួស៤១នាក់ធ្លាក់ខ្លួនឈឺ សង្ស័យថាជាករណីពុលស្រាស នៅឃុំបឹងចារ ស្រុកសំបូរ ខេត្តក្រចេះ។ នេះបើយោងតាមការចុះផ្សាយលើគេហទំព័ររបស់អគ្គស្នងការដ្ឋាននគរបាលជាតិនៅថ្ងៃទី១៩ តុលានេះ។
តាមរយៈការចុះផ្សាយនេះបញ្ជាក់ថា ករណីពុលស្រាសនេះកើតមានឡើងក្រោយពីពលរដ្ឋ ទាំងនោះ បានច្រូតស្រូវ ហើយនាំគ្នាផឹកស្រាសកាលពីរសៀលថ្ងៃទី១៨ ខែតុលា ឆ្នាំ២០១៨។
ក្នុងចំណោមអ្នកស្លាប់៣នាក់ មានបុរស២នាក់ និងស្រ្តីម្នាក់ ដោយបានដាច់ខ្យល់ស្លាប់ក្នុងសភាពណែនដើមទ្រូង ថប់ដង្ហើម និងបានដាច់ខ្យល់ស្លាប់ជាបន្តបន្ទាប់ ក្រោយពីនាំទៅសង្រ្គោះនៅមន្ទីរពេទ្យខេត្ត។
យ៉ាងណាមិញ ចំពោះអ្នក ទាំង៤១នាក់ ត្រូវបានបញ្ជូនទៅមន្ទីរពេទ្យស្រុក និងពេទ្យខេត្តហើយ។
ករណីនេះ អាជ្ញាធរមានការសង្ស័យថាករណីនេះជាករណីពុលស្រាស ហើយអាជ្ញាធរបានឃាត់ខ្លួនម្ចាស់ផលិតស្រាសមួយកន្លែងនៅក្នុងភូមិនោះដើម្បីសាកសួរ។ ទោះបីជាបែបនេះក្ដី សមត្ថកិច្ចនៅតែបន្តខិតខំស្រាវជ្រាវបន្ថែមទៀត ដើម្បីបង្ហាញអំពីមូលហេតុច្បាស់លាស់។
គួររំលឹកថា កាលពីថ្ងៃទី ២៤ ខែ ឧសភា ឆ្នាំ ២០១៨ ក្រសួងពាក់ព័ន្ធបីអះអាងថា មានពលរដ្ឋពុលស្រាសស្លាប់ ១៤នាក់ និងជិត៣០០នាក់ធ្លាក់ខ្លួនឈឺនៅស្រុកចិត្របុរី ខេត្តក្រចេះ ដោយសារស្រាសមានសាធារតុមេតាណុលកម្រិតខ្ពស់៕
អត្ថបទ៖ លោក សោម លាភ
