ភ្នំពេញ៖ ខេត្តកោះកុង នឹងរៀបចំពីធីបុណ្យសមុទ្រ នៅថ្ងៃទី ១៤ និង១៦ខែ ធ្នូ ឆ្នាំ២០១៨ ដើម្បីត្រៀមទទួលសម្ដេចហ៊ុនសែនជាអធិបតី ព្រមទាំងភ្ញៀវទេសចរណ៍ជាតនិងអន្តរជាតិ និងពលរដ្ឋខ្មែរគ្រប់មជ្ឈដ្ឋានទាំងអស់។ នេះបើយោងតាមការចុះផ្សាយលើទំព័រហ្វេសបុករបស់ក្រសួងទេសចរណ៍នៅថ្ងៃទី ១ ខែតុលានេះ។
តាមរយៈការចុះផ្សាយនេះបញ្ជាក់ថា ការរៀបចំពីធីនេះ ធ្វើឡើងនៅទីរួមខេត្តកោះកុង និងរមណីយដ្ឋានវិសមកាលតារាសាគរ ដែលមានទីតាំងនៅជាប់ឆ្នេរសមុទ្រ នៃស្រុកបទុមសាគរ ខេត្តកោះកុង។ ជាងនេះ សម្រាប់ខេត្តកោះកុង ក្នុងការធ្វើពិធីបុណ្យសមុទ្រលើកនេះ នឹងធ្វើឡើងក្រោមការចូលរួមរបស់សម្តេច ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត។
ក្នុងកិច្ចប្រជុំលើកទី២ នៃការត្រៀមរៀបចំបុណ្យសមុទ្រនៅខេត្តកោះកុង នៅសាលាខេត្តកោះកុង នាព្រឹកថ្ងៃទី៣០ ខែកញ្ញាម្សិលមិញ លោក ថោង ខុន រដ្ឋមន្ត្រីក៏បានណែនាំ ដល់រដ្ឋបាលខេត្ត និងមន្ទីរទេសចរណ៍ខេត្តកោះកុងនូវការត្រៀមលក្ខណៈឱ្យបានល្អជាមុន។
តួយ៉ាង រដ្ឋបាលខេត្តនេះ ត្រូវពន្លឿនឲ្យទាន់ពេលបុណ្យសមុទ្រ លើផ្នែកស្នាក់នៅ អនាម័យ គុណភាពចំណីអាហារ ពិសេសត្រូវយកចិត្តទុកដាក់លើបញ្ហាបង្គន់អនាម័យ បញ្ហាសំរាម ដាច់ខាតមិនត្រូវឱ្យមានសំរាម ឬក្រដាសក្រោមតុនៅតាមភោជនីយដ្ឋាន អាហារដ្ឋាន និងសន្តិសុខសុវត្តិភាព។ អ្វីដែលពិសេសជាងនេះនោះ គឺត្រូវរៀបចំខ្សែទស្សនកិច្ចនៅតាមរមណីយដ្ឋាន និងសហគមន៍ទេសចរណ៍ ដូចជាជីផាត អារ៉ែង តាតៃ ពាមក្រសោបជាដើម។
លោក ថោង ខុន បញ្ជាក់ថា ពិធីបុណ្យសមុទ្រនៅខេត្តកោះកុងលើកនេះ មានការរៀបចំកម្មវិធីកម្សាន្តសប្បាយនានា នៅទីរួមខេត្តកោះកុងផង និងមានព្រឹត្តិការណ៍ប្រកួតកីឡាវាយកូនគោលពានរង្វាន់ សម្ដេចតេជោនាយករដ្ឋមន្ត្រី ដើម្បីអបអរសាទរពីធីនេះផងដែរ៕ អត្ថបទដោយលោក សោម លាភ
