ភ្នំពេញ ៖ ក្រុមហ៊ុនចិន គ្រោងបើកសាលារៀនតាម Online ឯកជនដំបូងគេនៅកម្ពុជា។ ក្រសួងការងារគ្រោងជំរុញសាលានេះ ឲ្យបើកដំណើរការបានឆាប់ៗ ព្រោះក្រសួងគិតថា ជាសាលាល្អសម្រាប់យុវជន និងអ្នកធ្វើការមួយចំនួន អាចរៀនបានដោយងាយស្រួល។
លោក លៀ ស៊ីណា រាយការណ៍ ព័ត៌មាននេះ ៖
រដ្ឋមន្ដ្រីក្រសួងការងារ និងបណ្ដុះបណ្ដាលវិជ្ជាជីវៈ កាលពីថ្ងៃព្រហស្បត្ដិ៍ ទី២៧ ខែកញ្ញា កន្លងទៅ បានជួបជាមួយក្រុមចិនមួយ ដែលពិភាក្សាអំពី គម្រោងបើកសាលារៀនតាម Online ឯកជនដំបូងគេនៅកម្ពុជា។
ក្រោយបញ្ចប់ជំនួបនេះ លោក ឡៅ ហ៊ឹម ប្រតិភូរាជរដ្ឋាភិបាលទទួលបន្ទុកជាអគ្គនាយកអប់រំ បណ្ដុះបណ្ដាលបច្ចេកទេស និងវិជ្ជាជីវៈ នៃក្រសួងការងារ បានប្រាប់អ្នកសារព័ត៌មានថា មូលហេតុដែលក្រុមហ៊ុនចិននេះ ចង់បើកសាលារៀននេះ គឺបំណងចង់បណ្ដុះបណ្ដាលធនធានមនុស្សកម្ពុជា ឲ្យស្របនិងយុទ្ធសាស្ដ្ររបស់រាជរដ្ឋាភិបាលកម្ពុជា។
លោកបន្ដថា សាលារៀននេះ នឹងបើកបង្រៀននូវមុខវិជ្ជា ព័ត៌មានវិទ្យា (IT) ទេសចរណ៍ ពាណិជ្ជកម្ម គណនេយ្យ និងមុខវិជ្ជាមួយចំនួនទៀត។ លោក ឡៅ ហ៊ឹម បន្ថែមថា ក្រសួងការងារ គ្រោងនិងជួបពិភាក្សាជាមួយក្រុមហ៊ុននេះម្ដងទៀត ដើម្បីជំរុញ ឲ្យសាលារៀននេះ បើកដំណើរការក្នុងពេលឆាប់ៗ ពីព្រោះតែវាជាសាលាល្អ ហើយផ្ដល់ភាពងាយស្រួលដល់យុវជនទាំងមានការងារ ឬគ្មាន ហើយមិនតែប៉ុណ្ណោះអ្នកដែលមានការងារហើយ ក៏អាចឈ្លៀតពេលរៀនបាន ៖«អញ្ចឹងនេះក៏ជាលទ្ធភាពមួយ ផ្ដល់ឱកាសអ្នកដែលមានការងារធ្វើហើយ អាចរៀន ហើយអ្នកដែលមិនទាន់មានការងារក៏អាចរៀនបានដែរ។ អញ្ចឹងវាផ្ដល់នូវជម្រើសច្រើនដល់យុវជនខ្មែរយើង ដើម្បីអាចសិក្សាបាន»។
បន្ថែមលើនេះ លោក ឡៅ ហ៊ឹម បញ្ជាក់ថា គ្រូបង្រៀននៅសាលា Online របស់ចិននេះ គឺភាគច្រើនជាគ្រូរបស់ប្រទេសចិន ដែលមានបទពិសោធន៍ក្នុងការបង្រៀនយូរឆ្នាំ។ តែយ៉ាងណាក្រសួងការងារ នៅតែបន្ដសិក្សានៅឡើយ ពីកម្រិតគ្រូទាំងនោះ ថា តើសមសម្របសម្រាប់បង្រៀនពលរដ្ឋកម្ពុជាឬយ៉ាងណា។ ម្យ៉ាងវិញទៀត ក្រសួងការងារចង់ឲ្យសាលារៀននេះ គឺមានស្ដង់ដាតែមួយដូចសាលាដទៃទៀត ដើម្បីងាយស្រួលក្រោយពីសិស្សបញ្ចប់ការសិក្សា ពួកគាត់ មានភាពងាយស្រួលទៅបន្ដការសិក្សានៅសាលាផ្សេង ក៏ដូចជាទៅក្រៅប្រទេសជាដើម។
ប្រទេសចិន គឺជាប្រទេសដ៏ធំមួយក្នុងចំណោមប្រទេសដទៃទៀត ដែលបានចូលមកវិនិយោគនៅកម្ពុជា។ បើគិតពីឆ្នាំ១៩៩៤ រហូតដល់ឆ្នាំ ២០១៦ មូលធនវិនិយោគទុកសរុបមានប្រហែល ១៤,៧ពាន់លានដុល្លារ ដែលបានផ្ដោតទៅលើវិស័យចំនួន ៤ ដាច់ដោយឡែកពីគ្នានៅកម្ពុជា។ វិស័យទាំងនោះរួមមាន វិស័យកសិកម្ម ឧស្សាហកម្ម ហេដ្ឋារចនាសម្ព័ន្ធរូបវន្ដ និងសេវាកម្ម និងវិស័យទេសចរណ៍៕
