ភ្នំពេញ៖ ជនជាតិវៀតណាម ១៥នាក់ ត្រូវបានសមត្ថកិច្ចចាប់ឃាត់ខ្លួនបញ្ចូនទៅអគ្គនាយកដ្ឋានអន្ដោប្រវេសន៍ បន្ទាប់ពីរកឃើញថា ពួកគេលួចឆ្លងដែន និងធ្វើការខុសច្បាប់ ចូលទឹកដីកម្ពុជា។
តាមការចុះផ្សាយរបស់គេហទំព័រអគ្គស្នងការដ្ឋាននគរបាលជាតិនៅថ្ងៃទី០៥ ខែសីហា ឆ្នាំ២០១៨នេះ ជនជាតិវៀតណាមទាំង ១៥នាក់ ដែលក្នុងនោះមានស្រ្ដី ៦នាក់ ត្រូវបានសមត្ថកិច្ចចាប់ឃាត់ខ្លួននៅចំណុច ភូមិច្រាងបាក់ សង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ ។
ការចាប់ខ្លួនរបស់ពួកគេ ក្រោយកម្លាំងការិយាល័យស៊ើបអង្កេតនិងអនុវត្តនីតិវិធី នៃស្នងការដ្ឋាននគរបាលរាជធានីភ្នំពេញ សហការជាមួយ នាយកដ្ឋានស៊ើបអង្កេត និងអនុវត្តនីតិវិធីនៃអគ្គនាយកដ្ឋានអន្តោប្រវេសន៍ និងកម្លាំងសមត្ថកិច្ចមូលដ្ឋាន ខណ្ឌច្បារអំពៅ សម្របសម្រួលផ្លូវច្បាប់ដោយលោក សៀង សុខ ព្រះរាជអាជ្ញារងនៃអយ្យការ អមសាលាដំបូងរាជធានីភ្នំពេញនឹងលោក លឹម ស៊ាងហៃ ក្រឡាបញ្ជី ចុះត្រួតពិនិត្យ ជនជាតិវៀតណាម ដែលឆ្លងដែន និងធ្វើការខុសច្បាប់ស្ថិតនៅចំណុចកើតហេតុខាងលើ។
សូមជម្រាបផងដែរថា ជនជាតិវៀតណាមទាំង ១៥នាក់ខាងលើនេះ ពួកគេត្រូវបានចាប់ឃាត់ខ្លួន និងបញ្ជូនទៅអគ្គនាយកដ្ឋានអន្តោប្រវេសន៍ដើម្បីអនុវត្តនីតិវិធីបន្តនៃច្បាប់៕
