ខេត្តកំពង់ធំ៖ រយៈពេល ៩ខែ ឆ្នាំ២០១៨ នៅខេត្តកំពង់ធំ មានបទល្មើសព្រហ្មទណ្ឌកើតឡើង ៦០លើក លើ ៥៩លើក ប្រៀបធៀបរយៈពេល ៩ខែ ឆ្នាំ២០១៧ កើន ១លើក ស្មើ២%។
នេះបើតាមរបាយការណ៍បូកសរុបសភាពការណ៍ក្នុងកិច្ចប្រតិបត្តិការ រក្សាសន្តិសុខ សណ្តាប់ធ្នាប់សង្គមរយៈពេល ៩ ខែ ឆ្នាំ២០១៨ និងលើកទិសដៅភារកិច្ចបន្តត្រូវបានអគ្គស្នងការដ្ឋាននគរបាលជាតិផ្សព្វផ្សាយកាលពីរសៀលថ្ងៃទី០៣ ខែកញ្ញា ឆ្នាំ២០១៨។
តាមរបាយការណ៍ដដែល សភាការណ៍សណ្ដាប់ធ្នាប់សាធារណៈ និងគ្រោះថ្នាក់ផ្សេងៗ កើតមានចំនួន ២៥៨លើក លើ ២៧៥លើក ប្រៀបធៀបរយៈពេល ៩ខែឆ្នាំ២០១៧ ថយចុះ ១៧លើក ស្មើនឹង ៦%។
ជុំវិញរឿងនេះដែរ លោក អ៊ុក កុសល ស្នងការនគរបាលខេត្តកំពង់ធំ បានវាយតម្លៃខ្ពស់ចំពោះកិច្ចប្រតិបត្តិការ ថែរក្សាសន្តិសុខ សណ្តាប់ធ្នាប់សង្គមកន្លងមក ធានាបានសន្តិសុខសណ្ដាប់ធ្នាប់សាធារណៈ ល្អ ជូនសង្គមជាតិ ។
ក្នុងឱកាសនោះ ស្នងការនគរបាលខេត្តកំពង់ធំក៏បានក្រើនរំលឹក និងណែនាំដល់មន្ត្រីថ្នាក់ក្រោម ត្រូវសាមគ្គីភាព ឯកភាពផ្ទៃក្នុង ផ្លាស់ប្តូរឥរិយាបទពីអ្នកដឹកនាំគ្រប់គ្រង់ ទៅជាអ្នកបំរើសេវាសាធារណៈជូនប្រជាពលរដ្ឋ ប្រកបដោយតម្លាភាព យុត្តិធម៌ មានប្រសិទ្ធភាព ព្រមទាំងពង្រឹងសមត្ថ ភាពការងារជំនាញដល់មន្ត្រីជំនាញ និងតាមបណ្ដាអធិការដ្ឋាននគរបាលទាំង ៨ ក្រុង ស្រុក ។
ជំរុញការផ្សព្វផ្សាយផលប៉ះពាល់នៃគ្រឿងញៀនដល់ស្រទាប់មហាជន តាមគ្រឹះស្ថានសិក្សា សិប្បកម្មកែច្នៃផ្សេងៗ ទីកន្លែងកំសាន្តសប្បាយភាពរមណីយដ្ឋាន បណ្តាមូលដ្ឋាននានា តំបន់ដែលងាយរងគ្រោះ ដើម្បីបញ្ជៀបការយល់ដឹងដល់ស្រទាប់មហាជនអោយយល់ដឹងពីផលប៉ះពាល់នៃគ្រឿង ញៀន ៕
