ភ្នំពេញ៖ លោក សួន សេរីរដ្ឋា អតីតប្រធានគណបក្សអំណាចខ្មែរ ថា ការដោះលែងលោកឱ្យមានសេរីភាពឡើងវិញ មិនមែនដោយសារអង្គការសិទ្ធិមនុស្ស ឬរដ្ឋាភិបាលអន្តរជាតិនោះទេ។ នេះបើតាមការចុះផ្សាយលើទំព័រហ្វេសរបស់លោក នៅថ្ងៃទី ៣១ ខែសីហានេះ។ ក្នុងសារដែលចុះផ្សាយនេះ បញ្ជាក់ទៀតថា នៅពេលដែលលោកជាប់ឃុំឃាំងក្នុងពន្ធនាគាររយៈពេល ១ឆ្នាំ និង១០ ថ្ងៃនោះ ពុំមានអង្គការសិទ្ធិមនុស្សជាតិ និងអន្តរជាតិ ណាមួយ មកសួរសុខទុក្ខ សួរនាំលើកទឹកចិត្តលោកនោះទេ។
លោក សួន សេរីរដ្ឋា ថា អង្គការលីកាដូ ដែលចូលទៅក្នុងពន្ធនាគារៀងរាល់អាទិត្យ យកថ្នាំពេទ្យទៅចែកគ្រូពេទ្យ ទៅជួយពិនិត្យសុខភាព ក៏មិនដែលហៅលោក មកជួប មកសួរ មកពិនិត្យសុខភាព ឬឲ្យថ្នាំលោកសូម្បីតែមួយគ្រាប់។ យ៉ាងណាលោកបន្ថែមថា មន្ត្រីស្ថានទូតអាមេរិក បានទៅជួបលោកបាន ៣ដង កាកបាទក្រហមអន្តរជាតិ ទៅជួបបាន ២ ដង, ក្រុមគ្រូពេទ្យពីស្ថានទូតថៃ ជួយពិត្យសុខភាពឲ្យលោកបានម្តង និងក្រៅពីនេះ មានតែប្រពន្ធកូនគ្រួសាររបស់លោក មិត្តភក្តិ អ្នកគាំទ្ររបស់លោកតែប៉ុណ្ណោះ ដែលបានចូលទៅជួបសួរសុខទុក្ខខ្ញុំ ដល់ពន្ធនាគារ។
លោកបញ្ជាក់ថា មានតែក្រុមការងារ និងក្រុមគ្រួសាររបស់លោកទេ ដែលព្យាយាមតាមលទ្ធភាពជាក់ស្តែងតាមផ្លូវតុលាការ និងតាមផ្លូវដំណោះស្រាយនយោបាយ ក្នុងស្មារតីខ្មែរជាតិសាសន៍តែមួយ ទើបលោកអាចត្រូវបានដោះលែងមានសេរីភាពបែបនេះ។
សូមបញ្ជាក់ថា លោក សួន សេរីរដ្ឋា ត្រូវបានកម្លាំងសមត្ថកិច្ចចាប់ខ្លួនកាលពីថ្ងៃទី១៣ ខែសីហា ឆ្នាំ២០១៧ ក្រោយពេលដែលលោកបានបង្ហោះសារមួយនៅទំព័រហ្វេសប៊ុករបស់លោក ដែលមានលក្ខណៈវាយប្រហារដល់កងទ័ពកម្ពុជា។ ករណីនេះ លោកត្រូវបានតុលាការកម្ពុជា សម្រេចផ្តន្ទាទោសដាក់ពន្ធនាគាររយៈពេល ៥ឆ្នាំ និងពិន័យជាប្រាក់១០លានរៀល ពីបទញុះញង់កុំឲ្យយោធិនស្ដាប់បង្គាប់ ធ្វើឲ្យខូចទឹកចិត្តកងទ័ព និងបទញុះញង់ឲ្យប្រព្រឹត្តបទឧក្រិដ្ឋជាអាទិ៍។
លោក សួន សេរីរដ្ឋា ត្រូវបានដោះលែងឲ្យមានសេរីភាពកាលពីថ្ងៃទី ២៤ ខែសីហា ឆ្នាំ ២០១៨ តាមរយៈការលើកលែងទោសពី ព្រះមហាក្សត្រ៕ អត្ថបទដោយលោក សោម លាភ