ភ្នំពេញ៖ នៅទីបំផុតតុលាការក្រុងភ្នំពេញបានសម្រេចផ្តន្ទាទោសលោក James Ricketson ជាផលិតករភាពយន្តជនជាតិអូស្ត្រាលី ឱ្យជាប់ពន្ធនាគាររយៈ ៦ឆ្នាំក្នុងបទចោទប្រកាន់ពី«បទចារកម្ម»។
ក្នុងសម្លៀកបំពាក់ពណ៌ស្លាទុំ ឈរក្នុងរង្វង់ក្រចកសេះពីមុខអង្គចៅក្រមនៅក្នុងបន្ទាប់សវនាការសាលាដំបូងរាជធានីភ្នំពេញនៅថ្ងៃទី៣១ សីហានេះ ផលិតករជនជាតិអូស្ត្រាលីលោក James Ricketson វ័យ ៦៩ ឆ្នាំ ត្រូវបានចៅក្រមលោក សេង លាងប្រកាសសាលក្រមផ្តន្ទាទោសឱ្យជាប់គុក ៦ឆ្នាំ ពីបទចារកម្មពាក់ព័ន្ធនឹងការបង្ហោះយន្តហោះ Drone ផ្តិតយករូបភាពការធ្វើក្បួនរបស់អតីតគណបក្សសង្គ្រោះជាតិក្នុងយុទ្ធនាការឃោសនាបឡឆ្នាំឃុំសង្កាត់ឆ្នាំ២០១៧។
ភ្លាមៗក្រោយចៅក្រមប្រកាសសាលក្រមឱ្យលោកជាប់គុករយៈពេល ៦ឆ្នាំ លោក James Ricketson បានបង្ហាញអារម្មណ៍ភ្ញាក់ផ្អើលហើយលោកលាន់មាត់ថា«ខ្ញុំស្ទើរមិនជឿថា តុលាការសម្រេចទោសខ្ញុំបែបនេះទេ»។ ភ្លាមៗនោះដែល លោក Ricketson បានចោទសួរទៅចៅក្រមវិញថា៖ «តើលោកធ្វើជាចារកម្មឲ្យប្រទេសណា?» ប៉ុន្តែ ចៅក្រមមិនបានឆ្លើយតបនោះទេ។
បុរសវ័យ ៦៩ ឆ្នាំ ជនជាតិអូស្ត្រាលី រូបនេះ ត្រូវបាននគរបាលកម្ពុជាចាប់ខ្លួន នៅថ្ងៃទី៣ មិថុនា ឆ្នាំ ២០១៧ បន្ទាប់ពីលោកបង្ហោះយន្តហោះ Drone ថតយករូបភាព នៃការហែក្បួនឃោសនានយោបាយរបស់អតីគណបក្សសង្គ្រោះជាតិ។ គិតចាប់ពីការចាប់ខ្លួនលោក James ស្ថិតនៅក្នុងការឃុំខ្លួនជាងមួយឆ្នាំមកហើយ។
កាលពីដើមខែកក្កដាលោក James Ricketson ធ្លាប់បានសរសេរលិខិតសុំទោសសម្តេចនាយករដ្ឋមន្ត្រី ហ៊ុន សែន ដោយសារភាពកំហុសអំពីការអត្ថាធិប្បាយរបស់ខ្លួន។
លោក Ricketson ត្រូវគេស្គាល់ជាទូទៅថា ជាអ្នកសារព័ត៌មាន និងជាអ្នកជំនាញខាងថតរូបផលិតខ្សែភាពយន្ត។ ជាងនេះទៀតលោកចាប់ផ្តើមអាជីពជាអ្នកសារព័ត៌មានតាំងពីទសវត្ស១៩៧០មកម្ល៉េះ។ លោកចាប់ផ្ដើមបញ្ចេញរូបភាព រឿងទុរគតនៃប្រទេសកម្ពុជា ទៅក្រៅប្រទេស គឺនៅពេលលោកផ្ដោតអំពីសកម្មភាពរបស់អតីតប្រធានគណបក្សប្រឆាំងរបស់លោក សម រង្ស៊ី។
លោក Ricketson បានតាមប្រមាញ់ផ្ដិតរូបភាពអតីតមេបក្សប្រឆាំងលោក សម រង្ស៊ី ស្ទើរគ្រប់វេទិកា នៅពេលលោក សម រង្ស៊ី វិលប្រទេសកម្ពុជានៅថ្ងៃទី១៩ ខែកក្កដា ឆ្នាំ២០១៣៕
