ភ្នំពេញ ៖ ក្រសួងការបរទេសកម្ពុជា បានឲ្យដឹងថា ស្ថានតំណាងកម្ពុជានៅក្រៅប្រទេសបានជួយប្រជាពលរដ្ឋខ្មែរ នៅក្រៅប្រទេសចំនួន ២៦នាក់ ពីប្រទេសចំនួន ០៣ ឲ្យបានវិលត្រឡប់មកកម្ពុជាវិញ។ នេះបើយោងតាមសេចក្ដីប្រកាសព័ត៌មានរបស់ក្រសួងការបរទេសកម្ពុជា ផ្សព្វផ្សាយនៅថ្ងៃទី២៨ ខែសីហានេះ។
ស្ថានឯកអគ្គរាជទូតកម្ពុជាប្រចាំប្រទេសចិន បានជួយស្ដ្រីខ្មែរចំនួន ១៧នាក់ ឲ្យបានវិលត្រឡប់មកកាន់ប្រទេសកម្ពុជាវិញ បន្ទាប់ពីរកឃើញថា ពួកគេត្រូវបានពួកមេខ្យលបោកបញ្ឆោតយកទៅរៀបការជាមួយបុរសជនជាតិចិនដោយខុសច្បាប់។ ស្ដ្រីទាំង ១៧នាក់នេះ មានអាយុចន្លោះពី ១៩ ដល់ ៣៤ឆ្នាំ។
ទន្ទឹមគ្នានេះ ស្ថានឯកអគ្គរាជទូតកម្ពុជា ប្រចាំនៅប្រទេស ម៉ាឡេស៊ី ក៏បានជួយដល់ពលរដ្ឋខ្មែរ ចំនួន ០៧នាក់ ដែលបានទៅធ្វើការងារដោយខុសច្បាប់នៅប្រទេសនេះ ឲ្យបានវិលត្រឡប់មកកម្ពុជាផងដែរ។ ក្នុងចំណោមពលរដ្ឋទាំង ០៧នាក់នេះ មានម្នាក់ជាស្ដ្រី។ ជាមួយគ្នានេះ ស្ថានឯកអគ្គរាជទូតកម្ពុជា ប្រចាំនៅឥណ្ឌូនេស៊ី ក៏បានជួយពលរដ្ឋខ្មែរចំនួន ០២នាក់ផងដែរ ឲ្យបានវិលត្រឡប់មកកម្ពុជាវិញ។ បន្ទាប់ពីពួកគេ ត្រូវបានអាជ្ញាធរ ឥណ្ឌូនេស៊ីចាប់ខ្លួន ហើយរកឃើញថា ពួកគេលួចទៅធ្វើការដោយខុសច្បាប់នៅប្រទេសនេះ។
សូមជម្រាបថា ពលរដ្ឋខ្មែរទាំងអស់នេះ ត្រូវបញ្ជូនមកដល់ប្រទេសកម្ពុជាវិញជាបន្ដបន្ទាប់ ហើយគិតមកដល់ថ្ងៃទី២៨ ខែសីហានេះ ពួកគេបានមកដល់កម្ពុជាអស់ហើយ៕
