ភ្នំពេញ៖ សាលាដំបូងរាជធានីភ្នំពេញនៅថ្ងៃចន្ទនេះ បានសម្រេចលើកពេលសវនាការ លើសំណុំរឿងអ្នកការពារសិទិ្ធមនុស្ស ដោយសារ អវត្តមានសាក្សីនាងខុម ចាន់តារ៉ាទី ហៅស្រីមុំ។
លោក ធូ វិរៈ ជូនសេចក្តីរាយការណ៍
សាលាដំបូងរាជធានីភ្នំពេញសម្រេចលើកពេលសវនាការក្នុងសំណុំរឿងមន្ត្រីការពារសិទ្ធិមនុស្ស និងអគ្គលេខាធិការរងគណៈកម្មាធិការជាតិរៀបចំការបោះឆ្នោត ដោយសារអវត្តមានសាក្សីសំខាន់ដែល ប្រកាសនឹងធ្វើឡើងវិញខែក្រោយ។
មន្ត្រីអាដហុក៤រូបនិងអគ្គលេខាធិការរង គ.ជ.ប ១រូប ជាប់ពន្ធនាគារអស់រយៈពេលជាង ១ ឆ្នាំ ក្រោមការចោទពីបទ សមគំនិត និងសូកប៉ាន់សាក្សី ពាក់ព័ន្ធនឹងសំណុំរឿងនាង ខុម ចាន់តារ៉ាទី ហៅ ស្រីមុំ ជាមួយ លោក កឹម សុខា។ អ្នកទាំង៥ រូប ត្រូវបានតុលាការដោះលែងឱ្យនៅក្រៅឃុំបណ្តោះអាសន្ន កាលពីខែ មិថុនា ឆ្នាំ ២០១៧។
លោក យី សុខសាន្ត មន្ត្រីការពារសិទ្ធិមនុស្សមួយរូបក្នុងចំណោមនោះ មានប្រសាសន៍ថា តុលាការសម្រេចលើកពេលសវនាការទៅថ្ងៃទី ១៨ ខែ កញ្ញា ខាងមុខនេះ ព្រោះសាក្សី និងជនជាប់ចោទជាច្រើនរូបអវត្តមាន។
ក្នុងសវនការព្រឹកម៉ិញនេះ នាងខុម ចាន់តារ៉ាទី ជាសាក្សីសំខាន់ត្រូវអវត្តមាន ហើយជនជាប់ចោទ លោកស្រី លឹម មុន្នី និង លោក នី ចរិយា ក៏ត្រូវអវត្តមានព្រោះពួកគាត់ពុំទទួលបានដីកាកោះហៅនោះទេ។
មន្ត្រីអង្គការពារសិទ្ធិមនុស្សអាដហុកទាំង៤រូបនោះ លោក ណៃ វ៉ង់ដា លោក យី សុខសាន្ត លោក នី សុខា និងលោកស្រី លឹម មុន្នី ត្រូវបានតុលការចោទប្រកាន់ពីបទសូកប៉ាន់សាក្សី តាមមាត្រា ៥៤៨ នៃក្រមព្រហ្មទណ្ឌ។
រីឯ លោក នី ចរិយា អតីតមន្ត្រីអង្គការពារសិទ្ធិមនុស្សអាដហុកដែល បច្ចុប្បន្នជាអគ្គលេខាធិការរង គ.ជ.ប ត្រូវបានចោទប្រកាន់ពីបទសមគំនិតសូកប៉ាន់សាក្សីតាមមាត្រ២៩ និង មាត្រា ៥៤៨ នៃក្រមព្រហ្មទណ្ឌក្នុងសំណុំរឿងនាងខុម ចាន់ដារ៉ាទីហៅស្រីមុំ និង លោក កឹម សុខា អតីតប្រធានគណបក្សសង្គ្រោះជាតិ។
លោក អំ សំអាត មន្ត្រីការពារសិទ្ធិមនុស្សអង្គការលីកាដូដែលឃ្លាំមើលសវនាការព្រឹកម៉ិញ យល់ថា ការលើកពេលសវនាការជារឿងចាំបាច់ព្រោះអវត្តមានសាក្សីដ៏សំខាន់។ លោកសង្ឃឹមថា សវនាការនៅខែក្រោយនេះនឹងផ្តល់ភាពយុត្តិធម៌ដល់អ្នកទាំង៥នាក់នោះ។
មុនចូលសវនាការ លោក យី សុខសាន្ត ស្នើឱ្យតុលាការទម្លាក់ចោលការចោទប្រកាន់មកលើអ្នកការពារសិទ្ធិមនុស្សទាំងអស់នៅលើបណ្តាញសង្គមហ្វេសប៊ុករបស់លោក ព្រោះកិច្ចការរបស់អ្នកការពារសិទ្ធិមនុស្សគ្រាន់តែចង់ឱ្យសង្គមមានការគោរពច្បាប់ប៉ុណ្ណោះ។
សូមរំលឹកថា សំណុំរឿង អ្នកការពារសិទិ្ធមនុស្ស អាដហុកទាំង៥រូបនេះ ដែលត្រូវ នាងស្រីមុំចោទដាក់នោះ គឺពាក់ព័ន្ធលោកកឹមសុខាហើយករណីនេះនាំអោយលោកកឹមសុខា លាក់ខ្លួន នៅស្នាក់ការគណបក្សសង្គ្រោះជាតិ នៅចាក់អង្រែលើ រយៈពេល៦ខែ ដែលប្រឈមមុខនឹងការមិនចូលខ្លួនតាមដីកាកោះរបស់តុលាការ។
តែក្រោយមកលោកកឹមសុខា ត្រូវបានព្រះមហាក្សត្រលើកលែងទោស តាមសំណើរបស់សម្ដេចនាយករដ្ឋមន្ត្រី។ ដោយឡែកលោកកឹមសុខាអតីតប្រធានគណបក្សសង្គ្រោះជាតិ កំពុងស្ថិតក្នុងការឃុំខ្លួនថ្មីមួយទៀត ក្រោមបទចោទ ក្បត់ជាតិ ៕
